ບັນດາຜູ້ນຳໂລກທັງຫຼາຍ ແມ່ນກຳລັງທີ່ຈະມາລວມຕົວກັນເປັນຈຳນວນທີ່ຫຼາຍທີ່ສຸດຢູ່ ອົງການສະຫະປະຊາຊາດ. ປະທານາ ທິບໍດີ ແລະ ນາຍົກລັດຖະມົນຕີ ຫຼາຍກວ່າ 150 ຄົນຈະເຂົ້າຮ່ວມໃນກອງປະຊຸມສະມັດຊາໃຫຍ່ໃນປີນີ້ ເຊິ່ງກໍຍັງຈະເປັນການສະເຫຼີມສະຫຼອງວັນຄົບຮອບ 70 ປີຂອງອົງການສະຫະປະຊາຊາດ. ນັກຂ່າວວີໂອເອ Magaret Besheer ລາຍງານວ່າ ວິກິດການຕ່າງໆແມ່ນມີຫຼາຍເກີນໄປ ສຳລັບບັນດາຜູ້ນຳຈະນຳມາປຶກສາຫາລືກັນ. ຕໍ່ໄປ ພຸດທະສອນ ຈະນຳເອົາລາຍລະອຽດ ສຳລັບລາຍງານນີ້ ມາສະເໜີທ່ານ.
Your browser doesn’t support HTML5
ຟັງລາຍງານ ບັນດາ ຜູ້ນຳໂລກ ຈະຫາລື ກ່ຽວກັບ ສິ່ງທ້າທາຍ ຂອງໂລກ ໃນກອງປະຊຸມ ສປຊ
ພະສັນຕະປາປາ Francis ຈະໄດ້ເດີນທາງມາຮອດສຳນັກງານໃຫຍ່ ສະຫະປະຊາຊາດ ໃນວັນທີ 25 ກັນຍາມື້ນີ້, ພຽງບໍ່ເທົ່າໃດຊົ່ວໂມງ ກ່ອນການເປີດກອງປະຊຸມສຸດຍອດ ຕໍ່ຕ້ານຄວາມທຸກ ຍາກຄັ້ງຍິ່ງໃຫຍ່.
ພະອົງຈະກ່າວຕໍ່ບັນດາພະນັກງານ ສະຫະປະຊາຊາດ ແລະ ພົບປະເປັນການສ່ວນຕົວກັບເລຂາທິການໃຫຍ່ທ່ານ Ban Ki-moon, ຜູ້ທີ່ເຄີຍໄດ້ພົບກັບພະອົງມາກ່ອນແລ້ວ 3 ຄັ້ງ ໃນນະຄອນ Vatican.
ທ່ານ Ban Ki-moon ເລຂາທິການໃຫຍ່ສະຫະປະຊາຊາດກ່າວວ່າ “ພວກເຮົາໄດ້ປຶກສາຫາລືກັນໃນຫຼາຍບັນຫາ, ລວມມີ ການລົບລ້າງຄວາມທຸກຍາກ ແລະການຍົກຍ້າຍຖິ່ນຖານ, ບັນຫາອົບພະຍົບ, ໃນຄັ້ງທີ່ຜ່ານມາ, ແລະ ທີ່ສຳຄັນສຸດ, ກໍຄືການປ່ຽນແປງຂອງດິນຟ້າອາກາດ.”
ພະສັນຕະປາປາ ຫຼັງຈາກນັ້ນກໍຈະໃຫ້ການປາໄສທີ່ມີຄວາມມຸ່ງຫວັງທີ່ສຸດໃນຫໍສະມັດຊາໃຫຍ່.
ທ່ານ Carne Ross, ທີ່ປຶກສາດ້ານການທູດໄດ້ກ່າວວ່າ “ຢ່າງໜ້າມະຫັດສະຈັນ, ພະອົງເບິ່ງຄືວ່າ ໄດ້ປະກົດເປັນກະບອກສຽງອັນແທ້ຈິງຂອງອຳນາດແຫ່ງສິນທຳຂອງໂລກ ກ່ຽວກັບສິ່ງຕ່າງໆ ຄືອົບພະຍົບ ແລະ ການປ່ຽນແປງຂອງສະພາບອາກາດ. ຫຼາຍໆຄົນຈະຕ້ອງແນມເບິ່ງພະອົງ ແລະ ສິ່ງທີ່ພະອົງຈະກ່າວ ກ່ຽວກັບສະຖານະການຂອງໂລກ.”
ແລ້ວມັນກໍຈະເປັນການເລີ່ມຕົ້ນວຽກງານຢ່າງຈິງຈັງ ກັບບັນຫາທີ່ຫຍຸ້ງຍາກທີ່ສຸດຂອງໂລກ.
ທ່ານ Richard Gowan ຈາກມະຫະວິທະຍາໄລ ໂຄລຳເບຍ ກ່າວວ່າ “ມັນຈະຕ້ອງມີການສະແດງຄວາມຍິນດີ ຕໍ່ຕົນເອງຢ່າງຫຼວງຫຼາຍ ກ່ຽວກັບຂໍ້ຕົກລົງ ນິວເຄລຍ ກັບ ອີຣ່ານ ແຕ່ສິ່ງດັ່ງກ່າວນັ້ນຈະຖືກຄອບງຳໂດຍວິກິດການດ້ານມະນຸດສະທຳໃນ ຢູໂຣບ ແລະ ການສືບຕໍ່ມີອຳ ນາດຂອງພວກລັດ ອິສລາມ ໃນຕາເວັນອອກກາງ.”
ໃນວັນທີ 30 ກັນຍາ, ຈະມີກອງປະຊຸມລະດັບສູງກ່ຽວກັບວິກິດການອົບພະຍົບໃນ ຢູໂຣບ. ທ່ານເລຂາທິິການໃຫຍ່ກ່າວວ່າ ທ່ານຫວັງທີ່ຈະລະດົມການຕອບຮັບທີ່ມີເມດຕາກະລຸນາ ແລະ ມີປະສິດທິຜົນ.
ພວກອົບພະຍົບສ່ວນໃຫຍ່ແມ່ນເປັນຊາວ ຊີເຣຍ ທີ່ພາກັນຫຼົບໜີສົງຄາມກາງເມືອງທີ່ແກ່ ຍາວມາໄດ້ເກືອບຫ້າປີແລ້ວນັ້ນ.
ການເພີ່ມຂຶ້ນຂອງການສະໜັບສະໜູນທາງດ້ານການທະຫານຂອງ ຣັດເຊຍ ໃຫ້ແກ່ ປະທານາທິບໍດີ ຊີເຣຍ ທ່ານ Bashar al-Assad, ໄດ້ເພີ່ມທະວີຄວາມເຄັ່ງຕຶງ ກັບວໍຊິງຕັນ. ປະທານາທິບໍດີ Vladimir Putin, ຜູ້ທີ່ບໍ່ໄດ້ເຂົ້າຮ່ວມໃນກອງປະຊຸມສະມັດຊາໃຫຍ່ເກືອບ ໜຶ່ງທົດສະວັດແລ້ວນັ້ນ, ອາດຈະນຳເອົາແຜນຍຸດທະສາດໃໝ່ກ່ຽວກັບ ຊີເຣຍ ມາໃນກອງ ປະຊຸມ, ແຕ່ວ່າມັນອາດຈະບໍ່ເປັນສິ່ງຖືກໃຈສຳລັບທຸກໆຄົນ.
ທ່ານ Gowan ກ່າວວ່າ “ແຕ່ມັນມີການແບ່ງແຍກເຊິ່ງເປັນຮາກຖານສຳຄັນກັບ ສະຫະລັດ ແລະ ຢູໂຣບ ກ່ຽວກັບ ທ່ານ Assad, ແລະ ການສືບຕໍ່ສະໜັບສະໜູນທ່ານ Assad ຂອງມອສໂກ, ດັ່ງນັ້ນມັນກໍຈະເປັນຄືການແຕກຫັກລົງທາງດ້ານ ການທູດ ແທນທີ່ຈະເປັນຄວາມ ກ້າວໜ້າ.”
ປະທານາທິບໍດີ ໂອບາມາ ຈະເປັນປະທານໃນກອງປະຊຸມກ່ຽວກັບ ການປາບປາມລັດທິ ກໍ່ການຮ້າຍ.
ທ່ານນາງ Samantha Power, ເອກອັກຄະລັດຖະທູດ ສະຫະລັດ ປະຈຳສະຫະປະຊາ ຊາດກ່າວວ່າ “ທ່ານປະທານາທິບໍດີຈະດຳເນີນການ ປະຊຸມ ເພື່ອຄົ້ນຫາວິທີຕໍ່ ຕ້ານລັດທິຫົວຮຸນແຮງ, ເພື່ອກວດສອບສິ່ງທີ່ ບັນດາພັນທະມິດໄດ້ປະສົບຄວາມ ສຳເລັດ ແລະ ຫາບ່ອນທີ່ມີຊ່ອງຫວ່າງ.”
ກອງປະຊຸມສະມັດຊາໃຫຍ່ທີ່ຈັດຂຶ້ນໃນປີນີ້ ອາດເປັນຄັ້ງທີ່ຍິ່ງໃຫຍ່ ກວ່າທີ່ເຄີຍມີມາ, ທັງໃນແງ່ຂອງບັນດາຜູ້ນຳ ແລະບັນຫາທ້າທາຍຕ່າງໆ.