ບັນດາຊາວໜຸ່ມຂອງປະເທດ ຈະສົ່ງທ່ານນາງ ແຮຣິສ ຫຼື ທ່ານ ທຣຳ ໄປທຳນຽບຂາວຫຼືບໍ່? ບັນດາຜູ້ຈັດງານຈາກທັງສອງຝ່າຍໄດ້ເຫັນຄວາມກະຕືລືລົ້ນ ແລະ ການສະໜັບສະໜູນຂອງບັນດາຜູ້ລົງຄະແນນສຽງຫຼາຍຂຶ້ນ, ໂດຍສະເພາະໃນບັນດາຜູ້ປ່ອນບັດໄວໜຸ່ມ. ແຕ່ປະຊາກອນຊາວໜຸ່ມໃນອະດີດແມ່ນໄດ້ພາກັນອອກໄປປ່ອນບັດຈຳນວນໜ້ອຍຫຼາຍ. ທີນາ ທຣິນ ນັກຂ່າວຂອງວີໂອເອ ໄດ້ໄປຄົ້ນຫາວ່ານັ້ນຈະປ່ຽນແປງຜົນທີ່ອອກມາຂອງການເລືອກຕັ້ງໃນເດືອນພະຈິກຫຼືບໍ່. ເຊິ່ງພຸດທະສອນ ຈະນຳເອົາລາຍລະອຽດມາສະເໜີທ່ານໃນອັນດັບຕໍ່ໄປ.
Your browser doesn’t support HTML5
ຊາວໜຸ່ມ ສະຫະລັດ ມີສ່ວນຮ່ວມໃນວົງຈອນການເລືອກຕັ້ງນີ້ສູງເປັນລະດັບໃໝ່
ມີຜູ້ມີສິດລົງຄະແນນສຽງຂອງ ສະຫະລັດ ຈຳນວນຫຼາຍຂຶ້ນເລື້ອຍ ເປັນຄົນໄວໜຸ່ມທີ່ອາດຈະມີບົດບາດອັນສຳຄັນໃນການເລືອກຕັ້ງທົ່ວໄປໃນເດືອນພະຈິກນີ້ ໂດຍອາດຊ່ວຍໃຫ້ຜູ້ຍິງໄດ້ຮັບເລືອກເປັນປະທານາທິບໍດີຄົນທຳອິດໃນປະຫວັດສາດຂອງ ສະຫະລັດ ໄດ້ອີກດ້ວຍ, ນັ້ນຄືຖ້າພວກເຂົາອອກໄປໃຊ້ສິດລົງຄະແນນສຽງ.
ທ່ານນາງ ຣູດີ ກາເຣັດ, ຈາກກຸ່ມພັນທະມິດເພື່ອການດຳເນີນການຂອງຊາວໜຸ່ມ ກ່າວວ່າ “ເຫດຜົນທີ່ວ່າເປັນຫຍັງຄົນໄວໜຸ່ມຈຶ່ງມີຄວາມໜ້າສົງໄສ ກ່ຽວກັບ ການໄປມີໜ້າໃນວົງຈອນການເລືອກຕັ້ງນີ້ ແມ່ນເຊື່ອມໂຍງໂດຍກົງກັບຄວາມອຶດອັດໃຈຂອງເຂົາເຈົ້າ ດ້ວຍວິທີທີ່ລັດຖະບານຂອງພວກເຮົາກຳລັງເຮັດວຽກ. ຄົນໄວໜຸ່ມແມ່ນກຳລັງປະສົບກັບຄວາມອຶດອັດຢ່າງຫຼວງຫຼາຍ ເພາະວ່າເຂົາເຈົ້າບໍ່ເຫັນການປ່ຽນແປງເກີດຂຶ້ນໃນຢ່າງໄວວາ ທີ່ເຂົາເຈົ້າຢາກເຫັນມັນເກີດຂຶ້ນໃນຊຸມຊົນຂອງເຂົາເຈົ້າ.”
ແຕ່ນັບຕັ້ງແຕ່ຮອງປະທານາທິບໍດີ ທ່ານນາງ ຄາມາລາ ແຮຣິສ ໄດ້ກາຍເປັນຜູ້ຖືກສະເໜີຊື່ເອົາຕຳແໜ່ງຂອງພັກເດໂມແຄຮັດ ມັນກໍໄດ້ມີການປ່ຽນແປງທີ່ຖືກຮັບຮູ້ໄດ້ໃນແງ່ຂອງຄວາມຕື່ມເຕັ້ນ.
ທ່ານ ນິກ ອາຮາເມັດ, ຈາກກຸ່ມ ບູລິມະສິດ ສະຫະລັດ ອາເມຣິກາ ກ່າວວ່າ “ຈຳນວນຂອງຜູ້ລົງຄະແນນສຽງໄວໜຸ່ມທີ່ສະເພາະເຈາະຈົງນັ້ນແມ່ນສູງຫຼາຍ, ໂດຍສະເພາະໃນຄວາມກະຕືລືລົ້ນ, ພວກເຮົາເຫັນການເພີ່ມຂຶ້ນ 5 ເປີເຊັນໃນບັນດາຜູ້ມີສິດປ່ອນບັດໄວໜຸ່ມທີ່ມີເຈຕະນາຈະລົງຄະແນນສຽງ, ໂດຍພື້ນຖານແລ້ວແມ່ນເປັນຊ່ວງໄລຍະຂ້າມຄືນ.”
ນາງ ເຊເລັສ ກາລເວັສ ອາຍຸ 19 ປີ, ແມ່ນນຶ່ງໃນຜູ້ທີ່ຮູ້ສຶກວ່າມີແຮງຕຸ້ນກັບການປ່ຽນແປງນັ້ນ.
ນາງ ເຊເລັສ ກາລເວັສ, ຜູ້ລົງຄະແນນສຽງໄວໜຸ່ມກ່າວວ່າ “ຂ້ອຍບໍ່ໄດ້ມີແຜນທີ່ຈະໄປລົງຄະແນນສຽງຕັ້ງແຕ່ຕອນທຳອິດດ້ວຍຊ້ຳ. ແຕ່ຕອນນີ້ທ່ານ ໄບເດັນ ໄດ້ຖອນຕົວອອກໄປ ແລະ ທ່ານນາງ ຄາມາລາ ມາລົງແຂ່ງຂັນແທນ, ຂ້ອຍຮູ້ສຶກຕື່ມເຕັ້ນຫຼາຍຂຶ້ນ ສຳລັບການກ້າວເຂົ້າມາສູ່ໂລກໃໝ່ ບ່ອນທີ່ພວກເຮົາສາມາດມີແມ່ຍິງເປັນປະທານາທິບໍດີ. ແທ້ຈິງແລ້ວຂ້ອຍຮູ້ສຶກຕື່ນເຕັ້ນ ກ່ຽວກັບ ການເມືອງໃນເວລານີ້.”
ຄວາມຕື່ມເຕັ້ນດັ່ງກ່າວໄດ້ສົ່ງຜົນໃຫ້ມີການລົງທະບຽນຜູ້ມີສິດເລືອກຕັ້ງເພີ່ມຂຶ້ນຢ່າງຫຼວງຫຼາຍ. ອົງການ Vote.org ລາຍງານວ່າມີຜູ້ລົງທະບຽນເພື່ອລົງຄະແນນສຽງຫຼາຍກວ່າ 100,000 ຄົນພາຍໃນ 7 ວັນຫຼັງຈາກທ່ານ ໂຈ ໄບເດັນ ປະກາດອອກຈາກການແຂ່ງຂັນ ໂດຍເປັນຜູ້ມີສິດເລືອກຕັ້ງທີ່ມີອາຍຸລະຫວ່າງ 18 ເຖິງ 34 ປີຄິດເປັນເກືອບ 85 ເປີເຊັນຂອງຜູ້ລົງທະບຽນໃໝ່ທັງໝົດ.
ແຕ່ການແຂ່ງຂັນເອົາຕຳແໜ່ງປະທານາທິບໍດີແມ່ນຍັງຄົງສູສີກັນຢູ່, ແລະ ມັນມີຕົວເລກທີ່ເທົ່າກັນຂອງບັນດາຜູ້ລົງຄະແນນສຽງໄວໜຸ່ມ, ໂດຍສະເພາະຊາຍໜຸ່ມ, ຜູ້ທີ່ສະໜັບສະໜູນອະດີດປະທານາທິບໍດີ ດໍໂນລ ທຣຳ, ຜູ້ຖືກສະເໜີຊື່ເອົາຕຳແໜ່ງປະທານາທິບໍດີສັງກັດພັດຣີພັບບລີກັນ.
ທ່ານ ນິກ ອາຮາເມັດ, ກ່າວວ່າ “ຫຼາຍຄົນໃນນັ້ນບໍ່ເຫັນວ່າເສດຖະກິດ ສະຫະລັດ ໂດຍລວມແມ່ນໄດ້ຜົນສຳລັບເຂົາເຈົ້າ. ສະນັ້ນເວລາພັກເດໂມແຄຣັດເວົ້າກ່ຽວກັບການເຕີບໂຕໃນສະຖິຕິໜ້າທີ່ວຽກງານ, ຕົວເລກຈຳນວນຫຼວງຫຼາຍຂອງວຽກງານທີ່ປະທານາທິບໍດີໄດ້ສ້າງຂຶ້ນ, ເຂົາເຈົ້າບໍ່ເຫັນຕົວເຂົາເຈົ້າເອງຢູ່ໃນໂຄງຮ່າງນັ້ນ.”
ທ້າວ ແຟຣງກີ ຣັດແຊລສ໌ ອາຍຸ 26 ປີກໍແມ່ນນຶ່ງໃນນັ້ນ.
ທ້າວ ແຟຣງກີ ຣັສແຊລສ, ຜູ້ລົງຄະແນນສຽງໄວໜຸ່ມກ່າວວ່າ “ວິທີທີ່ຈະເຂົ້າເຖິງຄົນອາຍຸຂອງຂ້ອຍແມ່ນເຈົ້າຕ້ອງເວົ້າກັບກຸ່ມຄົນທີ່ມີອາຍຸຊ່ຳຂ້ອຍ. ເຈົ້າບໍ່ສາມາດເຮັດຄືກັນກັບໝົດທຸກຄົນ, ການກ່າວອ້າງວ່າ ພາສີຕ່ຳ, ພວກເຮົາຫາກໍ່ຫຼຸດພາສີລົງ, ເວົ້າເລື່ອງປືນ ແລະ ຄວາມເຊື່ອຖືຕ່າງໆ. ນັ້ນແມ່ນບໍ່ພຽງພໍ, ພວກເຮົາຕ້ອງການສິ່ງອື່ນ. ພວກເຮົາຕ້ອງການນະໂຍບາຍອາເມຣິກາມາກ່ອນໝູ່ ໂດຍທົ່ວໄປ. ເຈົ້າຮູ້ບໍ່, ການບໍ່ມີສົງຄາມໃໝ່ເກີດຂຶ້ນ, ບໍ່ຕ້ອງສົ່ງເງິນໄປຕ່າງປະເທດ, ແຕ່ເກັບມັນໄວ້ຢູ່ໃນປະເທດ.”
ທ່ານນາງ ຣູດີ ກາເຣັດ ກ່າວວ່າ “ຄວາມອຶດອັດບໍ່ໄດ້ເທົ່າກັບຄວາມເສີຍຊາ. ຄົນໄວໜຸ່ມແທ້ຈິງແລ້ວເຂົ້າໃຈ ກ່ຽວກັບ ສິ່ງທີ່ກຳລັງເກີດຂຶ້ນໃນການເມືອງ. ເຂົາເຈົ້າເຫັນຫ່ວງ ກ່ຽວກັບ ສິ່ງທີ່ກຳລັງເກີດຂຶ້ນ. ເຂົາເຈົ້າບໍ່ພຽງແຕ່ເຫັນການປ່ຽນແປງທີ່ເຂົາເຈົ້າຢາກໃຫ້ຖືກກະຕຸ້ນຜ່ານການພົວພັນໃນຂະບວນການເລືອກຕັ້ງເທົ່ານັ້ນ. ແຕ່ຂ້າພະເຈົ້າຄິດວ່າການປ່ຽນແປງທີ່ໄດ້ເກີດຂຶ້ນໃນສອງສາມອາທິດທີ່ຜ່ານມາ ໄດ້ສ້າງເສັ້ນໂຄຈອນຂຶ້ນມາໃໝ່ຢ່າງແທ້ຈິງ.”
ບໍ່ວ່າເສັ້ນໂຄຈອນນັ້ນຈະຂະຫຍາຍໄປສູ່ຕູ້ບ່ອນບັດຫຼືບໍ່ນັ້ນຈະຕ້ອງໄດ້ຖ້າເບິ່ງນຳກັນຕໍ່ໄປ, ແຕ່ມັນມີຄວາມກະຈ່າງແຈ້ງທີ່ວ່າ ຜູ້ລົງຄະແນນສຽງໄວໜຸ່ມແມ່ນບໍ່ຄວນຖືກມອງຂ້າມໃນເດືອນພະຈິກນີ້.