ອົງການອະນາໄມໂລກ ຫຼື WHO ໄດ້ປະກາດເຖິງການສິ້ນສຸດ
ລົງກ່ຽວກັບການລະບາດຂອງໂຣກອີໂບລາໃນ Liberia ຊຶ່ງ
ໝາຍຄວາມວ່າ 3 ປະເທດໃນອາຟຣິກາຕາເວັນຕົກທີ່ເປັນສູນ
ການຂອງການແຜ່ລະບາດຂອງໂຣກອີໂບລານີ້ ແມ່ນໄດ້ປອດ
ຈາກໂຣກດັ່ງກ່າວແລ້ວ.
ການປະກາດຂອງອົງການ WHO ໄດ້ມີຂຶ້ນໃນວັນພະຫັດມື້ນີ້
ຫຼັງຈາກ 42 ມື້ ບໍ່ມີລາຍງານການລະບາດໃໝ່ ຂອງອີໂບລາໃນ
Liberia. ໃນເວລາທີ່ປະກາດກ່ຽວກັບສິ້ນສຸດລົງທີ່ສຳຄັນນີ້
ທາງອົງການ WHO ໄດ້ລະໝັດລະວັງ ໂດຍກ່າວວ່າການແຜ່
ລະບາດແບບນ້ອຍໆ ແມ່ນຄາດວ່າຍັງຈະມີຢູ່ຕໍ່ ແລະຮຽກຮ້ອງ
ໃຫ້ມີການເຝົ້າສັງເກດການທີ່ເຂັ້ມແຂງ ເພື່ອຄວບຄຸມໂຣກດັ່ງກ່າວ.
ທ່ານ Alex Gasasira ຕົວແທນຂອງ ອົງການ WHO ໃນ Liberia ປະຕິຍານວ່າ ອົງການຂອງທ່ານ ຍັງຈະສືບຕໍ່ໃຫ້ການສະໜັບສະໜຸນ Liberia ໃນຄວາມພະຍາຍາມເພື່ອປ້ອງກັນ ຮັກສາ ແລະຮັບມື ກັບກໍລະນີໃໝ່ໆ ໃດໆຂອງໂຣກດັ່ງກ່າວນີ້.
ຜູ້ຄົນ ຍ່າງຜ່ານປ້າຍທີ່ເຕືອນພວກຜູ້ຄົນໃຫ້ຢຸດເຊົາການຊີດຢາພວກທີ່ເປັນໂຣກອີໂບລາໃນເມືອງ Kenema, ພາກຕາເວັນອອກຂອງ Sierra Leone, 12 ສິງຫາ, 2015.
ນີ້ແມ່ນຄັ້ງທີ 3 ທີ່ Liberia ທີ່ໄດ້ປະກາດກ່ຽວກັບການປອດຈາກໂຣກອີໂບລາ. ການປະກາດ
ຄັ້ງທຳອິດ ແມ່ນມີຂຶ້ນໃນເດືອນພຶດສະພາ 2015 ແຕ່ວ່າ ໄດ້ມີ 2 ກໍລະນີຂອງໂຣກນີ້ ໄດ້ເກີດຂຶ້ນອີກ ນັບຕັ້ງແຕ່ນັ້ນມາ ແລະຕໍ່ມາ ກໍມີອີກກໍລະນີຫລ້າສຸດໄດ້ເກີດຂຶ້ນໃນເດືອນພະຈິກປີກາຍນີ້.
ນີ້ແມ່ນຄັ້ງທຳອິດ ທີ່ສາມປະເທດທີ່ໂຣກອີໂບລາໄດ້ລະບາດ ອັນມີ Liberia, Guinea ແລະ Sierra Leone ໄດ້ປອດຈາກໂຣກອີໂບລາ ໃນເວລາດຽວກັນ. Sierra Leone ໄດ້ປະກາດ
ການປອດຈາກໂຣກອີໂບລາ ໃນວັນທີ 7 ພະຈິກປີກາຍນີ້ ແລະ Guinea ແມ່ນວັນທີ 29 ທັນວາ ຜ່ານມານີ້.
ການແຜ່ລະບາດຂອງໂຣກອີໂບລາ ໃນອາຟຣິກາຕາເວັນຕົກ ໄດ້ເອົາຊີວິດຜູ້ຄົນໄປ 11 ພັນ ຄົນ ແລະຕິດແປດໃສ່ຫຼາຍກວ່າ 28 ພັນ 500 ຄົນ.