ອົງການຊ່ອຍເຫຼືອທາງພາກພື້ນດິນອົງການນຶ່ງໃນອາຟຣິກາ
ຕາເວັນຕົກ ແລະສູນຄວບຄຸມພະຍາດຕ່າງໆຂອງສະຫະລັດ
ກ່າວວ່າ ຍັງມີ “ໂອກາດຢູ່່” ທີ່ຈະຄວບຄຸມການລະບາດຂອງ
ເຊື້ອໄວຣັສ ອີໂບລາ.ໃນຂະນະດຽວກັນ ບັນດາເຈົ້າໜ້າທີ່ຂັ້ນ
ສູງຈາກອົງການອະນາໄມໂລກ ກໍໄດ້ທຳການຢ້ຽມຢາມ
ນະຄອນນີວຢອກ ແລະນະຄອນວໍຊິງຕັນ ເພື່ອຂໍເງິນຕື່ມອີກ
ສຳລັບນຳໃຊ້ໃນການຫາທາງຄວບຄຸມການລະບາດຂອງເຊື້ອ
ໄວຣັສດັ່ງກ່າວ. ສິງຈະນຳເອົາລາຍງານເລື້ອງນີ້ຈາກຜູ້ສື່ຂ່າວ
ວີໂອເອມາສະເໜີທ່ານ.
Your browser doesn’t support HTML5
ຟັງລາຍງານເລື້ອງອົງການອະນາໄມໂລກ ຂໍເງິນທຶນເພີ່ມອີກ ເພື່ອຄວບຄຸມການລະບາດຂອງອີໂບລາ
ເຊື້ອໄວຣັສອີໂບລາກຳລັງລະບາດຢູ່ໃນ 3 ປະເທດໃນອາຟຣິກາຕາເວັນຕົກ ແລະສົ່ງຜົນກະທົບຕໍ່ຜູ້ຄົນຢູ່ໃນອີກ 3 ປະເທດ. ໃນວັນພຸດຜ່ານມານີ້ ອົງການອະນາໄມໂລກ ໄດ້ເພີ້ມ
ຈຳນວນຜູ້ຄົນເສຍຊີວິດຍ້ອນພະຍາດດັ່ງກ່າວເປັນຫຼາຍກວ່າ 1900 ຄົນແລ້ວ. ແຕ່ບັນດາ
ນັກຊ່ຽວຊານ ກ່າວວ່າ ບໍ່ມີຄົນໃດຮູ້ຈັກແທ້ໆວ່າ ມີຈັກຄົນໄດ້ຕິດເຊື້ອ ແລະມີຈັກຄົນໄດ້
ເສຍຊີວິດໄປແລ້ວ ຈາກເຊື້ອໄວຣັສດັ່ງກ່າວ.
ອົງການອະນາໄມໂລກ ກະປະມານວ່າ ການທີ່ຈະເອົາເຊື້ອໄວຣັສດັ່ງກ່າວນີ້ີ້ໄວ້ໄດ້ນັ້ນ ຈະ
ສິ້ນເປືອງຄ່າໃຊ້ຈ່າຍ 500 ລ້ານດອນລາ. ອົງການອະນາໄມໂລກ ໄດ້ສະເໜີແຜນການອັນນຶ່ງ ທີ່ເອີ້ນວ່າ “ roadmap” ຫຼືເເຜນທີ່ ເພື່ອຍຸດຕິການລະບາດຂອງເຊື້ອອີໂບລານັ້ນ.
Dr. Margaret Chan ກ່າວວ່າ ແຜນທີ່ທີ່ສະເໜີໄປນີ້ ໄດ້ຮັບການສະໜັບສະໜຸນຢ່າງກວ້າງຂວາງຈາກບັນດາປະເທດ ແລະສະຖາບັນຕ່າງໆໃນທົ່ວອາຟຣິກາ ແລະວ່າ ຫຼາຍ
ປະເທດທີ່ໄດ້ຮັບການພັດທະນາແລ້ວ ກໍໄດ້ໃຫ້ການສະໜັບສະໜຸນເຊັ່ນກັນ.
Dr. Margeret Chan ກ່າວວ່າ “ເລື້ອງເຊື້ອອີໂບລານີ້ ເປັນເລື້ອງຂອງນາໆຊາດ
ເປັນໄພຂົ່ມຂູ່ຂອງໂລກ ທີ່ຈຳເປັນຕ້ອງມີການປະສານງານກັນຂອງໂລກ ເພື່ອໃຫ້
ເລື້ອງນີ້ເສັດສິ້ນລົງໄປ."
Dr. David Navarro ຜູ້ປະສານງານເລື້ອງເຊື້ອອີໂບລາ ຂອງສະຫະປະຊາຊາດ ແລະທ່ານ Keiji Fukuda ຜູ້ຊ່ອຍວຽກຫົວໜ້າອົງການອະນາໄມໂລກ ໄດ້ຮ່ວມກັນກັບ Dr. Margaret Chan ໃນຄຳຮຽກຮ້ອງຂອງ Dr. Chanh ນັ້ນ.
ບຸກຄົນເຫຼົ່ານີ້ ໄດ້ເວົ້າກ່ຽວກັບຄວາມຕ້ອງການທີ່ສຳຄັນໆຂອງບັນດາປະເທດຕ່າງໆ ຊຶ່ງ
ໃນນັ້ນແມ່ນຮວມທັງການເປີດ ໃຫ້ມີການເດີນທາງອາກາດຄືນອີກ ເພື່ອວ່າພວກພະນັກ
ງານການແພດ ແລະສິນຄ້າຕ່າງໆຈະຜ່ານໄປມາໄດ້ ການຮັບປະກັນການຈ່າຍເງິນເດືອນໃຫ້ພວກທ່ານໝໍ ແລະພວກພະນັກງານການແພດອື່ນໆ ການສະໜອງເຂົ້າປາອາຫານ ແລະນ້ຳມັນເຊື້ອໄຟສຳລັບໃຊ້ຄົວກິນ ທີ່ທັງສອງຢ່າງນີ້ໄດ້ຖີບໂຕສູງຂຶ້ນ ແລະການຊ່ອຍ
ເຫຼືອແກ່ພວກບຸກຄົນອື່ນໆ ທີ່ເສຍວຽກເສຍການໄປ ຍ້ອນໂຣກລະບາດດັ່ງກ່າວ.
ພວກເຈົ້າໜ້າທີ່ເຫຼົ່ານີ້ຍັງໄດ້ຮຽກຮ້ອງ ໃຫ້ຈັດຕັ້ງສູນປິ່ນປົວຕື່ມອີກ ການເປີດພວກໂຮງໝໍ
ທຳມະດານັ້ນຄືນ ໃຫ້ການສະໜັບສະໜຸນ ແກ່ປະເທດຕ່າງໆເພື່ອເກັບກູ້ສົບພວກທີ່ເສຍ
ຊີວິດອອກຈາກຖະໜົນຫົນທາງນັ້ນໄວຂຶ້ນ ໃຫ້ກຽດແກ່ການຝັງສົບພວກທີ່ເສຍຊີວິດ ແລະ
ໃຫ້ການສຶກສາເພີ້ມຂຶ້ນແກ່ປະຊາຊົນ ກ່ຽວກັບອັນຕະລາຍອັນແທ້ຈິງ ຂອງພວກທີ່ຕິດເຊື້ອອີໂບລາ ທີ່ບໍ່ໄດ້ຮັບການປິ່ນປົວນັ້ນ.
ເບິ່ງວີດີໂອກ່ຽວກັບລາຍງານນີ້:
Dr. Navarro ເນັ້ນເຖິງຄວາມຕ້ອງການສຳລັບການນຳພາ ແລະການປະສານງານກັນຂອງນາໆຊາດ.
ທ່ານ ກ່າວວ່າ: “ສຳລັບພວກເຮົາທີ່ໄດ້ເຮັດວຽກ ຢູ່ໃນສະພາບການທີ່ສັບສົນມາກ່ອນ
ແມ່ນຮູ້ຈັກດີວ່າ ການປະສານງານກັນຊ່ອຍຊີວິດ ແລະປັບປຸງປະສິດທິພາບໃຫ້ດີຂຶ້ນ.
ພວກເຮົາບໍ່ຢູ່ໃນຖານະ ທີ່ຈະສາມາດສູນເສຍເວລາມື້ນຶ່ງໄປໄດ້ ເພາະວ່າການລະບາດ
ຂອງໂຣກນີ້ ກຳລັງເຄື່ອນໄຫວໄປໜ້າ ກ່ອນຄວາມພະຍາຍາມ ເພື່ອຄວບຄຸມມັນນັ້ນ.”
Dr. Chan ໄດ້ກ່າວອອກມາວ່າ ບັນດານັກວິທະຍາສາດ ທີ່ສຳນັກງານໃຫຍ່ຂອງອົງການອະນາໄມໂລກ ທີ່ນະຄອນເຈເນວາ ຈະຊັ່ງຊາຕີລາຄາເບິ່ງການບຳບັດໃນການທົດລອງທີ່ໃຫ້ຄວາມຫວັງຫຼາຍ ທີ່ສຸດ ທີ່ສາມາດໄດ້ຮັບການອະນຸມັດຢ່າງວ່ອງໄວ ເພື່ອຊ່ອຍຄວບຄຸມ
ການລະບາດຂອງໂຣກດັ່ງກ່າວ.
Dr. Margaret Chan ກ່າວວ່າ “ ພວກເຮົາສາມາດ ແລະກໍຈະຄວບຄຸມການລະບາດ
ຂອງເຊື້ອອີໂບລາໃຫ້ໄດ້.”
ກຸ່ມນາຍແພດບໍ່ມີພົມແດນ ຫຼື Doctors Without Borders ໄດ້ຮຽກຮ້ອງໃຫ້ມີການ
ເຄື່ອນໄຫວຢ່າງຮີບດ່ວນເປັນເທື່ອທຳອິດ ເພື່ອຮັບມືກັບວິກິດການອີໂບລາ ໃນເດືອນມີນາ
ຜ່ານມາ. ໃນວັນອັງຄານກ່ອນນີ້ ກຸ່ມດັ່ງກ່າວໄດ້ຕຳໜິຕິຕຽນອົງການອະນາໄມໂລກວ່າ
ບໍ່ໄດ້ທຳການເຄື່ອນໄຫວໄວພໍ ເພື່ອຫາທາງຄວບຄຸມການລະບາດຂອງໂຣກນີ້.