ນັກຂ່າວ ເຈົ້າໜ້າທີ່ລັດຖະບານ ແລະດາລາ Hollywood ໄດ້ມາຮ່ວມສັງສັນ ເວົ້າຢອກ
ມ່ວນຊື່ນກັນ ເມື່ອຄືນວັນເສົາທີ່ຜ່ານມານີ້ ໃນງານລ້ຽງນັກສື່ຂ່າວປະຈໍາປີຂອງທໍານຽບ
ຂາວ ທີ່ຈັດຂຶ້ນຢູ່ໂຮງແຮມ Hilton ໃນນະຄອນຫລວງວໍຊິງຕັນ.
ປະທານາທິບໍດີ Barack Obama ໄດ້ກ່າວຄໍາປາໄສຕໍ່ບັນດາແຂກທີ່ໄປຮ່ວມໃນງານ
ແລະໄດ້ເວົ້າແບບຫຍິກແກມຢອກ ເຖິງຄະນະນໍາພາຂອງພັກຣີພັບບລິກັນ ໂດຍໄດ້ກ່າວ
ຂອບໃຈພວກເຂົາເຈົ້າ ທີ່ “ໄດ້ຍາດເວລາທີ່ຫຍຸ້ງຫລາຍ ຈາກໝາຍກໍານົດການແລະວຽງ
ງານອັນອິດເມື່ອຍຂອງພວກເຂົາເຈົ້າ ໃນການບໍ່ອອກກົດໝາຍໃດໆນັ້ນ” ມາຮ່ວມໃນງານລ້ຽງ.
ນອກນີ້ ທ່ານໂອບາມາຍັງໄດ້ເວົ້າຫລິ້ນຫົວ ກ່ຽວກັບຄວາມຄ້າຍຄືກັນຂອງທ່ານ ກັບຄູ່
ແຂ່ງຂອງທ່ານຈາກພັກຣີພັບບລິກັນ ທ່ານມິຕ ຣອມນີ ທີ່ຄາດກັນວ່າຈະໄດ້ຮັບການແຕ່ງ
ຕັ້ງໃຫ້ເປັນຜູ້ຕາງໜ້າພັກສະມັກເລືອກຕັ້ງປະທານາທິບໍດີ ແຂ່ງກັບທ່ານໂອບາມານນັ້ນ
ໂດຍກ່າວວ່າ “ພວກເຮົາທັງສອງຕ່າງກໍຄິດວ່າ ພັນລະຍາຂອງພວກເຮົານັ້ນເປັນອີກ
ເຄິ່ງນຶ່ງຂອງພວກເຮົາ ທີ່ດີກ່ວາເຮົາ ແລະຜົນການຢັ່ງຫາງສຽງມະຫາຊົນກໍສະແດງວ່າ
ປະຊາຊົນອາເມຣິກັນເຫັນພ້ອມນໍາຢ່າງຫລວງຫລາຍ ຊຶ່ງເປັນການດູຖູກັນແທ້ໆເນາະ.
ແລະພວກເຮົາຕ່າງກໍໄດ້ປະລິນຍາມາຈາກມະຫາວິດທະຍາໄລ Harvard. ຂ້າພະເຈົ້າໄດ້
ມາອັນດຽວ ແຕ່ທ່ານຣອມນີໄດ້ມາສອງ. ຈັ່ງແມ່ນເພິ່ນເກ່ງ!”
ຜູ້ທີ່ຖືກເຊີນມາໃຫ້ມາເວົ້າຕະລົກ ໃຫ້ຄວາມມ່ວນຊື່ນແກ່ແຂກໃນງານລ້ຽງປີນີ້ ໄດ້ແກ່
ນັກຕະລົກ Jimmy Kimmel ພິທີກອນລາຍການໂອ້ລົມກັນຕອນເດິນຂອງໂທລະພາບ
ຊ່ອງ ABC. ຜູ້ກ່ຽວໄດ້ເວົ້າຕະລົກ ແບບແຮງໆແດ່ຫລາຍຄັ້ງ ໂຮມທັງໄດ້ເວົ້າຢອກປະທາ
ນາທິບໍດີໂອບາມາ ກ່ຽວກັບຄະແນນນິຍົມຂອງທ່ານ ໃນປີເລືອກຕັ້ງນີ້ ໂດຍກ່າວວ່າ
“ມີຄໍາສັບຄໍານຶ່ງ (a term) ສໍາລັບປະທານາທິບໍດີໂອບາມາ ນັ້ນກໍຄື ຄົງຈະບໍ່ມີສອງ
ສະໄໝ (two terms) ດອກ ປີນີ້.”
ດາຣາຮອລລີວູດ ທີ່ໄປຮ່ວມງານລ້ຽງ ມີໂຮມທັງ George Clooney, Kim Kardashian,
Lindsay Lohan ແລະນັກສ້າງຮູບເງົາ Steven Spielberg.
ລາຍໄດ້ຈາກງານລ້ຽງ ກໍຄືຈາກລາຄາບັດທີ່ແຂກຊື້ເຂົ້າໄປຮ່ວມ ແມ່ນນໍາໄປເປັນທຶນໃຫ້
ແກ່ຜູ້ທີ່ຢາກເປັນນັກຂ່າວ ແລະເງິນລາງວັນສໍາລັບນັກຂ່າວທີ່ມີຜົນງານໂດດເດ່ນ.