ທຳນຽບຂາວໄດ້ກ່າວວ່າ ການລຽບລຽງໜ້າໃໜ່ ຂອງລາຍງານເຫດການກໍ່ການຮ້າຍ ເມື່ອ ວັນທີ 11 ເດືອນກັນຍາ ຈະບໍ່ປ່ຽນແປງ ການລົງຄວາມເຫັນ ກ່ຽວກັບການສືບສວນ ຂອງ ສະພາ ທີ່ວ່າ ບໍ່ແມ່ນລັດຖະບານຊາອຸດີ ຫລືບັນດາເຈົ້າໜ້າທີ່ຂັ້ນສູງ ຂອງຊາອຸດີ ໄດ້ໃຫ້ ການຊ່ວຍເຫລືອດ້ານການເງິນ ຫລືສະໜັບສະໜູນກຸ່ມ al-Qaida ໂຈມຕີສະຫະລັດ.
ຜູ້ນຳສຽງສ່ວນນ້ອຍຂອງສະພາຕ່ຳ ທ່ານນາງ Nancy Pelosi ໄດ້ກ່າວວ່າ ການເຜີຍແຜ່ເອກກະສານຊຶ່ງຄັ້ງນຶ່ງໄດ້ເປັນຄວາມລັບ 28 ໜ້າຈະ "ຈະມີຂຶ້ນໃນໄວໆນີ້.
ໃນການກ່າວຕໍ່ບັນດານັກຂ່າວໃນວັນສຸກວານນີ້ ໂຄສົກທຳນຽບຂາວທ່ານ Josh Earnest ກ່າວວ່າ ລາຍງານ “ຈະຢືນຢັນໃນອັນທີ່ພວກເຮົາໄດ້ກ່າວມາເປັນເວ ລານານສົມຄວນແລ້ວ” ທີ່ວ່າການລຽບລຽງເອກກະສານໃໝ່ໄດ້ເປັນທີ່ສືບສວນ ມາແລ້ວ.
ທ່ານຍັງກ່າວວ່າຄະນະກຳມາທິການ ຮັບຜິດຊອບກ່ຽວກັບເຫດການກໍ່ການຮ້າຍ ວັນທີ 11 ເດືອນກັນຍາ ໄດ້ຕິດຕາມເບິ່ງລາຍລະອຽດ ແລະໄດ້ພົບເຫັນວ່າ “ບໍ່ມີຫລັກຖານວ່າ ລັດຖະບານຊາອຸດີ ໃນຖານະທີ່ເປັນສະຖາບັນ” ຫລືບັນດາເຈົ້າໜ້າທີ່ຂັ້ນສູງ ບໍ່ໄດ້ໃຫ້ທຶນ ຫລືໄດ້ວາງແຜນການ ໂຈມຕີກໍ່ການຮ້າຍໃນ ວັນທີ 11 ເດືອນກັນຍາ ປີ 2001.
ສະມາຊິກສະພາຈຳນວນນຶ່ງ ແລະຜູ້ຕິຕຽນເຊື່ອວ່າ ລັດຖະບານຊາອຸດີ ໄດ້ຫລິ້ນບົດບາດໃນການໂຈມຕີກໍ່ການຮ້າຍໃນວັນທີ 11 ເດືອນກັນຍາ ແລະໄດ້ກົດດັນເປັນເວລາ 13 ປີ ແລ້ວ ໃຫ້ເນື້ອໄນ 28 ໜ້າທີ່ໄດ້ຖືກກວດກາ ຈະຖືກນຳອອກເຜີຍແຜ່.
ລະຫວ່າງການຖະແຫຼງຂ່າວເມື່ອວັນພະຫັດທີ່ຜ່ານມານີ້ ທ່ານ Earnest ໄດ້ຊີ້ໃຫ້ເຫັນວ່າ ກ່ອນລາຍງານຈະຖືກເປີດເຜີຍ ທຳນຽບຂາວຈະປະສານງານ ກັບຜູ້ອຳນວຍການ ຫ້ອງ ການສືບລັບແຫ່ງຊາດ ແລະລັດຖະສະພາ “ເພື່ອໃຫ້ເປັນທີ່ແນ່ນອນວ່າ ຄວາມສະເໜີພາບດ້ານການທູດ ໄດ້ມີພາກສ່ວນຢ່າງເໝາະສົມຢູ່ໃນນັ້ນ.”