ຜູ້ຜະລິດລົດຍົນ VinFast ຂອງ ຫວຽດນາມ ໄດ້ປະກາດໃນວັນອັງຄານວານນີ້ວ່າ ເຂົາເຈົ້າມີແຜນທີ່ຈະຂາຍລົດໄຟຟ້າຂອງເຂົາເຈົ້າໃນປະເທດ ໄທ ແລະ ໄດ້ກ່າວວ່າ ເຂົາເຈົ້າໄດ້ພົວພັນກັບບັນດາບໍລິສັດຂາຍລົດເພື່ອເປີດຫ້ອງວາງສະແດງໃນປະເທດດັ່ງກ່າວ.
ບໍລິສັດ VinFast, ເຊິ່ງໄດ້ເລີ່ມສົ່ງອອກລົດໄຟຟ້າຂອງເຂົາເຈົ້າພຽງປີກາຍນີ້ເທົ່ານັ້ນ, ໄດ້ປະເຊີນກັບການແຂ່ງຂັນທີ່ຫຍຸ້ງຍາກກັບຜູ້ຜະລິດລົດຂອງ ຈີນ ຄື BYD ໃນປະເທດ ໄທ. ສ່ວນ ບໍລິສັດ Tesla ເມື່ອບໍ່ດົນມານີ້ ກໍໄດ້ເຂົ້າສູ່ການແຂ່ງຂັນເຊັ່ນກັນ. ທັງສາມບໍລິສັດນັ້ນ ໄດ້ສະແດງລົດລຸ້ນຫຼ້າສຸດຂອງເຂົາເຈົ້າຢູ່ງານວາງສະແດງລົດສາກົນໃນ ບາງກອກ.
ຕະຫຼາດລົດໄຟຟ້າຂອງ ໄທ ແມ່ນນ້ອຍແຕ່ກຳລັງເຕີບໂຕໄວ, ເຊິ່ງຖືກຄ້ຳຈູນໂດຍສິ່ງກະຕຸ້ນ ແລະ ການຊ່ວຍເຫຼືອດ້ານການເງິນຈາກລັດຖະບານ. ປະເທດທີ່ມີປະຊາກອນຫຼາຍກວ່າ 70 ລ້ານຄົນນັ້ນ ມີແຜນທີ່ຈະຫັນປ່ຽນ 30 ເປີເຊັນຂອງລົດ 2 ລ້ານ 5 ແສນຄັນ ທີ່ເຂົາເຈົ້າຜະລິດໃນແຕ່ລະປີໄປເປັນລົດໄຟຟ້າພາຍໃນປີ 2030.
ບໍລິສັດ VinFast ຫວັງທີ່ຈະເລີ່ມຂາຍທັງ ສກູເຕີ ໄຟຟ້າຂອງເຂົາເຈົ້າ ແລະ ລົດ SUV ໄຟຟ້າໃນປະເທດດັ່ງກ່າວ ໃນສອງເດືອນຂ້າງໜ້າ, ທ່ານນາງ ວູ ດາງ ເຢັນ ຮາງ, ຜູ້ບໍລິຫານໃຫຍ່ຂອງ VinFast ແຫ່ງປະເທດ ໄທ ໄດ້ກ່າວຕໍ່ອົງການຂ່າວ AP.
ລາຍລະອຽດ ກ່ຽວກັບ ລາຄາ ແລະ ການຊື້ລົດໄຟຟ້າແມ່ນມີຄວາມເປັນໄປໄດ້ວ່າ ຈະຖືກປະກາດໃນທ້າຍປີນີ້.
ປະເທດ ໄທ ປະກອບເປັນ 58 ເປີເຊັນຂອງການຂາຍລົດໄຟຟ້າທັງໝົດໃນພາກພື້ນເອເຊຍຕາເວັນອອກສຽງໃຕ້ ໃນປີ 2022, ນຳໜ້າທັງ ຫວຽດນາມ ແລະ ອິນໂດເນເຊຍ, ອີງຕາມບໍລິສັດຄົ້ນຄວ້າຕະຫຼາດ Counterpoint Research. ແຕ່ຕະຫຼາດລົດໄຟຟ້າແມ່ນຍັງນ້ອຍ, ເທົ່າກັບພຽງ 0.5 ເປີເຊັນເທົ່ານັ້ນໃນທົ່ວໂລກ ໃນປີ 2022.
ປະເທດ ໄທ ແມ່ນກຳລັງພະຍາຍາມທີ່ຈະປ່ຽນແປງສິ່ງນີ້ດ້ວຍສິ່ງກະຕຸ້ນເພື່ອສົ່ງເສີມການຜະລິດ ແລະ ຂາຍລົດໄຟຟ້າ, ເຊັ່ນຫຼຸດຜ່ອນພາສີນຳເຂົ້າ ແລະ ການຊ່ວຍເຫຼືອໃນການຈ່າຍເງິນ ເພື່ອເຮັດໃຫ້ມັນມີລາຄາທີ່ສາມາດແຂ່ງຂັນກັນໄດ້ຫຼາຍຂຶ້ນ.
VinFast ໄດ້ຕັ້ງເປົ້າໝາຍທີ່ຈະຂາຍລົດຂອງເຂົາເຈົ້າໃນ 50 ຕະຫຼາດທົ່ວໂລກພາຍໃນທ້າຍປີ 2024.