ແມ່ຍິງສັນຊາດອອສເຕຣເລຍ ໄວ 73 ປີ ຄົນນຶ່ງ ໄດ້ຖືກຕັດສິນລົງໂທດ ປະຫານຊີວິດ ຢູ່ໃນຫວຽດນາມ ໃນວັນພະຫັດມື້ນີ້ ໃນຂໍ້ຫາຄ້າຢາເສບຕິດ.
ແມ່ເຖົ້າ Nguyen Thi Huong ຊຶ່ງເປັນຄົນຫວຽດນາມ ໂດຍກຳເນີດ ໄດ້ຖືກ ພົບເຫັນວ່າ ມີຄວາມຜິດ ໃນວັນພຸດວານນີ້ ຍ້ອນມີຢາໂຄເຄນ ຢ່າງນ້ອຍ 1.6 ກິໂລກຣາມ ຢູ່ໃນຄວາມຄອບຄອງ ທີ່ເຊື່ອງໄວ້ຢູ່ໃນສະບູ 36 ກ້ອນ ໃນຂະນະ ທີ່ພະຍາຍາມ ຈະຂຶ້ນເຮືອບິນໄປຍັງອອສເຕຣເລຍ ເມື່ອເດືອນທັນວາ ປີ 2014.
ແມ່ເຖົ້າຄົນນີ້ ໄດ້ອ້າງວ່າ ສະບູໄດ້ຖືກມອບໃຫ້ລາວ ໂດແມ່ຍິງທີ່ມີຊື່ວ່າ Helen ແລະ ວ່ານາງໄດ້ມີແຜນນຳເອົາພວກສະບູໄປອອສເຕຣເລຍ ເພື່ອເປັນຂອງຂວັນ. ແຕ່ທະນາຍຄວາມຂອງຈຳເລີຍ ບໍ່ສາມາດພິສູດໄດ້ກ່ຽວກັບຕົວຕົນຂອງແມ່ຍິງ ທີ່ຊື່ວ່າ Helen ອີງຕາມສື່ມວນຊົນທ້ອງ ຖິ່ນ.
ແມ່ເຖົ້າ Huong ມີເວລາ 15 ມື້ ເພື່ອຂໍອຸທອນ ຕໍ່ການຕັດສິນໂທດປະຫານ ຊີວິດຂອງລາວ ຫຼັງຈາກສານໄດ້ພິພາກສາ ວ່າ ຄວາມຜິດຂອງລາວນັ້ນ ແມ່ນ ເປັນ “ອັນຕະລາຍຕໍ່ປະຊາຄົມຢ່າງຮ້າຍແຮງ.” ນາງຈະປະເຊີນກັບການ ປະຫານຊີວິດ ດ້ວຍການສັກຢາໃຫ້ຕາຍ.
ການມີຢາເຮໂຣອິນຢູ່ໃນຄອບຄອງ ຫຼາຍກວ່າ 100 ກຣາມ ຢູ່ໃນຫວຽດນາມ ແມ່ນມີໂທດໜັກເຖິງຕາຍ.