ຜົນງານພາກຕໍ່ຂອງຮູບເງົາຊຸບເປີຮີໂຣສາຍມືດ ທີ່ເອີ້ນວ່າ “ເວນ້ອມ” (Venom) ເປີໂຕສາຍໃນອາທິດທຳອິດທີ່ມີການຄາດການໄວ້ໃນດ້ານລາຍຮັບ ເຖິງຈະໄດ້ຮັບຕຳແໜ່ງຮູບເງົາທີ່ສ້າງລາຍໄດ້ສູງສຸດປະຈຳອາທິດໄປໄດ້ກໍຕາມ ອີງຕາມລາຍງານຂອງອົງການຂ່າວເອພີ.
Venom: ຕອນ The Last Dance ຈາກບໍລິສັດໂຈນີ ພິກເຊີຣສ໌ (Sony Pictures) ໄດ້ສ້າງລາຍຮັບ ໃນການສາຍທ້າຍອາທິດທຳອິດ 51 ລ້ານໂດລາ ເມື່ອປຽບທຽບກັບໂຕເລກກະປະມານການລາຍຮັບໄວ້ຢູ່ທີ່ເກືອບ 65 ລ້ານໂດລາ.
ພາບຕອນນຶ່ງຂອງຮູບເງົາ ຈາກບໍລິສັດ Sony Pictures ສະແດງໃຫ້ເຫັນ ທອມ ຮາຣດີ ໃນບົດນຳຊາຍເລື້ອງ Venom: ຕອນ The Last Dance
ນອກຈາກຈະທຳລາຍໄດ້ບໍ່ກົງກັບເປົ້າໝາຍແລ້ວ ຜົນງານພາກທີ 3 ຂອງຮູບ ເງົາຊຸບເປີຮີໂຣສາຍມືດນີ້ ໂຕລະຄອນຈາກບໍລິສັດ ມາຣໂວລ (Marvel) ຍັງສ້າງລາຍຮັບຕ່ຳກວ່າສອງພາກທຳອິດຢ່າງຫຼວງຫຼາຍ ຫຼັງຈາກ “ເວນອມ” ພາກທຳອິດສ້າງລາຍຮັບໃນທ້າຍອາທິດທຳອິດໄດ້ເຖິງ 80.2 ລ້ານໂດລາ ກ່ອນທີ່ຜົນງານພາກ 2 ຂອງ “Venom: ຕອນ Let There Be Carnage” ໄດ້ເປີດໂຕໂດຍສ້າງລາຍຮັບໄດ້ 90 ລ້ານໂດລາ.
ລາຍງານຂ່າວລະບຸວ່າ ຮູບເງົາ Venom: ຕອນ The Last Dance ມີຕົ້ນທຶນການສ້າງເຖິງ 120 ລ້ານໂດລາ ໂດຍໂຕເລກນີ້ ຍັງບໍ່ລວມງົບ ປະມານດ້ານການຕະຫຼາດ ແລະໂຄສະໜາສົ່ງເສີມຕ່າງໆ.
ຢ່າງໃດກໍຕາມ ຜົນງານເລື້ອງນີ້ ທີ່ຍັງຄົງນຳສະແດງໂດຍ ທ່ານ ທອມ ຮາຣດີ ນັກສະແດງເກົ່າໃນບົດບາດເປັນນັກຂ່າວທີ່ຖືກຮັບເຊື້ອຊິມບີໂອ ຂອງຕ່າງດາວ ທີ່ເຂົ້າມາອາໄສຢູ່ໃນຕົວ ຍັງສ້າງລາຍຮັບໄດ້ດີໃນຕ່າງປະເທດ ໂດຍໃນທ້າຍ ອາທິດທຳອິດນີ້ ສາມາດເກັບເງິນໄດ້ຈາກຜູ້ຊົມຢູ່ນອກອາເມຣິກາ ໄປໄດ້ເຖິງ 124 ລ້ານໂດລາ ໂດຍ 46 ລ້ານໂດລານັ້ນ ມາຈາກການສາຍເປັນເວລາ 5 ວັນ ໃນຈີນພຽງປະເທດດຽວເທົ່ານັ້ນ.
ພາບຕອນນຶ່ງຈາກຮູບເງົາເລື້ອງ "Smile ພາກທີ 2." ຂອງບໍລິສັດ ພາຣາເມົ້າ ພິກເຊີຣສ໌ (Paramount Pictures via AP)
ອັນດັບທີ 2 ໃນຕາລາງ ຮູບເງົາ Box Office ສຳລັບທ້າຍອາທິດນີ້ເປັນຂອງ “Smile ພາກ 2” ຫຼືເປັນຮູບເງົາສະຫຍອງຂວັນກ່ອນອາທິດແຫ່ງວັນບຸນ ຮໍໂລວີນ ທີ່ຕົກລົງນຶ່ງອັນດັບໃນອາທິດກ່ອນ ພ້ອມການສ້າງລາຍຮັບເພີ້ມໄດ້ອີກ 9.4 ລ້ານໂດລາ ເຮັດໃຫ້ລາຍຮັບລວມເປັນ 83.7 ລ້ານໂດລາ ຈາກການສາຍ ຢູ່ທົ່ວໂລກ.
ພາບນຶ່ງເປີດເຜີຍໂດຍບໍລິສັດ Focus Features ສະແດງໃຫ້ເຫັນ ນັກສະແດງນຳ ຣາລຟ໌ ຟຽນເນສ ໃນຕອນນຶ່ງຂອງຮູບເງົາ Conclave ຈາກບໍລິສັດ Focus Features.
ສ່ວນອັນດັບທີ 3 ນັ້ນເປັນຂອງເລື້ອງ Conclave ເປັນຮູບເງົາລຶກລັບຄາດ ຕະກຳພາຍໃນຄຣິສຕະຈັກ ທີ່ສ້າງຈາກບົດນິຍາຍຊື່ດຽວກັນນັ້ນ ແລະມີນັກ ສະແດງຊື່ດັງໄດ້ເຂົ້າຮ່ວມສະແດງຫຼາຍໆຄົນ ຕັ້ງແຕ່ ທ່ານ ຣາລຟ໌ ຟຽນເນສ ໄປຈົນເຖິງ ທ່ານ ສະແຕນລີ ຕຸຊຊີ ແລະ ນາງ ອິສຊາເບລລາ ຣອສເຊລລິນີ ແລະເຊື່ອກັນວ່າ ໜ້າຈະເປັນນຶ່ງໃນໂຕເຕັງທີ່ຈະຄວ້າເອົາລາງວັນອອສກາ (Oscar) ໃນປີໜ້າດ້ວຍ.
ເລື້ອງ Conclave ສ້າງລາຍຮັບໃນທ້າຍອາທິດທຳອິດ 6.5 ລ້ານໂດລາ.
ເຈົ້າຂອງອັນດັບທີ 4 ຄືເລື້ອງ “The Wild Robot” ເປັນຮູບເງົາປະເພດ ແອນນິເມຊັນ ຈາກບໍລິສັດ DreamWorks ແລະ Universal ທີ່ຕົກລົງ ຈາກອັນດັບທີ 2 ໃນທ້າຍອາທິດແລ້ວນີ້ ແຕ່ສ້າງລາຍຮັບໄດ້ເພີ້ມໄປໄດ້ອີກ 6.5 ລ້ານໂດລາ.
ແລະຍັງຄົງທີ່ ໃນອັນດັບທີ 5 ຄື ເລື້ອງ “We Live In Time” ເປັນຮູບເງົາ ປະເພດລົງທຶນໜ້ອຍ ຈາກບໍລິບິສັດ A24 ທີ່ຍັງສ້າງລາຍຮັບເພີ້ມໄປໄດ້ອີກ 4.8 ລ້ານໂດລາໃນທ້າຍອາທິດນີ້.
ລຳດັບຮູບເງົາທີ່ສ້າງລາຍຮັບໃນທ້າຍອາທິດນີ້:
1. “Venom: The Last Dance,” $51 million.
2. “Smile 2,” $9.4 million.
3. “Conclave,” $6.5 million.
4. “The Wild Robot,” $6.5 million.
5. “We Live in Time,” $4.8 million.
6. “Terrifier 3,” $4.3 million.
7, “Beetlejuice Beetlejuice,” $3.2 million.
8. “Anora,” $867,142.
9. “Piece by Piece,” $720,000.
10. “Transformers One,” $720,000.