ສໍານັກວາຕິກັນຢືນຢັນໃນວັນເສົາວານນີ້ວ່າ ຊາຍຄົນຮັບໃຊ້ປະຈໍາສັນຕະປາປາ Benedict
ໄດ້ຖືກຈັບກຸມໃນຖານຕ້ອງສົງໄສວ່າ ປ່ອຍຂ່າວ ເອກະສານແລະຈົດໝາຍລັບຈາກທີ່ພັກ
ສ່ວນຕົວຂອງສັນຕະປາປາ.
ທ່ານ Federico Lombardi ໂຄສົກສໍານັກວາຕິກັນ ກ່າວວ່າ ນາຍ Paolo Gabriele ໄວ
46 ປີໄດ້ຖືກຈັບກຸມໃນວັນພຸດຜ່ານມາ ຫຼັງຈາກໄດ້ພົບເຫັນເອກະສານລັບຫລາຍສະບັບ
ຢູ່ໃນບ້ານເຮືອນຂອງຜູ້ກ່ຽວ ໃນບໍລິເວນສໍານັກວາຕິກັນ ທີ່ເອີ້ນວ່າ Vatican City ໃນກຸງ
ໂຣມນັ້ນ. ນາຍ Gabriele ໄດ້ເປັນຄົນຮັບໃຊ້ສ່ວນຕົວຂອງສັນຕະ ປາປາ ມາຕັ້ງແຕ່ປີ
2006 ຊຶ່ງເປັນນຶ່ງໃນພວກຄົນຮັບໃຊ້ບໍ່ເທົ່າໃດຄົນ ປະຈໍາທີ່ພໍານັກຂອງອົງສັນຕະປາປາ
ທີ່ຮວມທັງພວກແມ່ຊີແລະເລຂາຈໍານວນບໍ່ເທົ່າໃດຄົນ.
ຂ່າວນອງນັນທີ່ສື່ມວນຊົນຂະໜານນາມວ່າ “Vatileaks” ແມ່ນພົວພັນກັບການປ່ອຍຂ່າວ
ລັບ ໃຫ້ສື່ມວນຊົນອີຕາລີເມື່ອຕົ້ນປີນີ້ ຈາກເອກະສານຈໍານວນນຶ່ງ ທີ່ກ່າວຫາວ່າມີການ
ສໍ້ລາດບັງຫຼວງໃນດານການເງິນຂອງສໍານັກວາຕິກັນ ແລະໄດ້ລວມຈຸດໃສ່ການເຄື່ອນໄຫວ
ຕ່າງໆຂອງຣາຊາຄະນະ ຫຼື Cardinal Tarcisio Bertone ຊຶ່ງເປັນລັດຖະມົນຕີຕ່າງປະ
ເທດ ປະຈໍາສໍານັກວາຕິກັນນັ້ນ.
ອົງສັນຕະປາປາໄດ້ສັ່ງໃຫ້ທໍາການສືບສວນສອບສວນຫລາຍຄັ້ງກ່ຽວກັບ ການຮົ່ວໄຫຼ
ອອກມາຂອງຂ່າວເຫລົ່ານີ້ ຊຶ່ງເປັນທີ່ໜ້າເຊື່ອຖືຫຼາຍຂຶ້ນໃນໄລຍະຫຼາຍມື້ຜ່ານມາ ຫລັງ
ຈາກມີການພິມເຜີຍແຜ່ປຶ້ມ His Holiness ກ່ຽວກັບສັນຕະປາປາ ທີ່ຂຽນໂດຍທ່ານ
Gianluigi Nuzzi ທີ່ລວມເອົາຈົດໝາຍແລະເອກະສານລັບຫລາຍໆສະບັບ ມາລົງພິມ
ທີ່ປື້ມເວົ້າວ່າ ຖືກລັກລອບເອົາອອກມາໂດຍພວກຄົນທີ່ບໍ່ແຈ້ງຊື່ໃຫ້ຊາບ ທີ່ຢາກເປີດເຜີຍ
ຄວາມບໍ່ດີຢູ່ໃນສໍານັກວາຕິກັນນັ້ນ.