ເຈົ້າໜ້າທີ່ສະຫະລັດ ແລະຢູໂຣບ ໄດ້ເຕືອນກ່ຽວກັບຄວາມເປັນໄປໄດ້ທີ່ສົງຄາມໃນເຂດກາຊາຈະຂະຫຍາຍຂອບເຂດອອກໄປຕື່ມ ໂດຍມີແນວໂນ້ມວ່າອິສຣາແອລ ຈະດຳເນີນການບຸກໂຈມຕີຕອບໂຕ້ຕໍ່ກຸ່ມຫົວຮຸນແຮງ ເຮັສໂບລລາ (Hezbollah) ທີ່ໜູນຫຼັງໂດຍອີຣ່ານ ໃນເລບານອນ.
ຫົວໜ້ານະໂຍບາຍການຕ່າງປະເທດຂອງສະຫະພາບຢູໂຣບ ທ່ານ ໂຈເຊບ ບໍແຣລ (Josep Borrell) ກ່າວຕໍ່ບັນດານັກຂ່າວໃນວັນຈັນມື້ນີ້ ຢູ່ທີ່ປະເທດ ລັກເຊັມເບີກ (Luxembourg) ວ່າຄວາມສ່ຽງທີ່ສົງຄາມຈະຂະຫຍາຍ ກວ້າງອອກແມ່ນເພີ້ມຂຶ້ນນັບມື້.
"ຂ້າພະເຈົ້າຄິດວ່າ ພວກເຮົາກຳລັງຢູ່ໃນຊ່ວງກ່ອນສົງຄາມຈະຂະຫຍາຍວົງ ກວ້າງອອກ ຢ່າງໜ້າເສົ້າໃຈ," ທ່ານ ບໍແຣລ (Borrell) ກ່າວ.
ນອກຈາກນີ້, ທ່ານຍັງກ່າວອີກວ່າ ການຢຸດຍິງຢູ່ເຂດກາຊາແມ່ນມີຄວາມຈຳເປັນຢ່າງຍິ່ງ ເພື່ອອຳນວຍຄວາມສະດວກໃຫ້ແກ່ການດຳເນີນການທີ່ຕໍ່ເນື່ອງຂອງການຊ່ວຍເຫຼືອດ້ານມະນຸດສະທຳ, ໂດຍກ່າວວ່າ “ການຈັດສົ່ງການຊ່ວຍເຫຼືອດ້ານມະນຸດສະທຳຢູ່ໃນເຂດກາຊາ ໄດ້ກາຍເປັນວ່າເປັນໄປບໍ່ໄດ້.”
ຄຳເຫັນຂອງທ່ານ ບໍແຣລ (Borrell) ມີຂຶ້ນບໍ່ພໍເທົ່າໃດຊົ່ວໂມງ ຫຼັງຈາກເຈົ້າໜ້າທີ່ທະຫານຂັ້ນສູງຂອງ ສະຫະລັດ ໄດ້ເຕືອນວ່າ ການບຸກໂຈມຕີຂອງ ອິສຣາແອລ ໃນ ເລບານອນ ຈະເພີ່ມຄວາມສ່ຽງຂອງຄວາມຂັດແຍ້ງທີ່ກວ້າງອອກໄປທີ່ຈະເຮັດໃຫ້ ອີຣ່ານ ເຂົ້າມາຊ່ວຍເຫຼືອ ກຸ່ມເຮັສໂບລລາ (Hezbollah).
ອິສຣາແອລ ໄດ້ຕໍ່ສູ້ກັບກຸ່ມ ຮາມາສ ທີ່ໜູນຫຼັງໂດຍອີຣ່ານ ໃນການບຸກໂຈມຕີ ຕໍ່ຕ້ານຂອງຕົນຢູ່ໃນເຂດ ກາຊາ ເປັນເວລາຫຼາຍເດືອນ ໃນຂະນະດຽວກັນ ກໍຍັງມີສ່ວນຮ່ວມໃນການປະທະກັນປະຈຳວັນກັບກຸ່ມ ເຮັສໂບລລາ (Hezbollah) ຢູ່ຕາມແລວຊາຍແດນ ອິສຣາແອລ (Israel) ແລະ ເລບານອນ (Lebanon).