ສະຖານນະການໃນອະນາຄົດສໍາລັບຊາວອາເມຣິກັນທີ່ຫວ່າງງານນັ້ນແມ່ນ ຍັງມືດມົນ ລຸນຫລັງທີ່ມີລາຍງານກ່ຽວກັບວຽກງານທີ່ອ່ອນແອທີ່ສຸດໃນໄລຍະເກືອບນຶ່ງປີ ທີ່ປາກົດອອກມາໃນວັນສຸກແລ້ວນີ້. ພວກນັກວິເຄາະກ່າວວ່າ ການນັດຢຸດງານປະທ້ວງເປັນເວລາສອງອາ ທິດໂດຍບໍລິສັດໂທລະສັບໄຮ້ສາຍທີ່ສໍາຄັນບໍລິສັດນຶ່ງ ໄດ້ອາດເຮັດໃຫ້ຕົວເລກຕົກຕໍ່າລົງ. ແຕ່ເຖິງແມ່ນວ່າອັດຕາການຫວ່າງງານແຫ່ງຊາດຍັງຢຸດຢູ່ທີ່ລະດັບ 9.1 ເປີເຊັນກໍຕາມ ທ່ານ James Bianco ແຫ່ງບໍລິສັດຄົ້ນຄ້ວາ Bianco ຫລື Bianco Research ກ່າວວ່າ ມີຂ່າວດີໜ້ອຍຫລາຍ ຢູ່ໃນລາຍງານສະບັບລ່າສຸດຂອງລັດຖະບານ. ທ່ານ Bianco ເວົ້າວ່າ:
“ເຖິງແມ່ນເຮົາຈະນັບເອົາການນັດຢຸດງານປະທ້ວງຂອງບໍລິສັດໂທລະສັບ Verizon
ຊຶ່ງມີພວກຄົນງານຈໍານວນ 48,000 ຄົນ ພາກັນນັດຢຸດງານນັ້ນ ແລະເພີ່ມຈໍານວນນີ້
ເຂົ້າໃສ່ໜ່ວຍແຮງງານຄືນໃໝ່ ໂຕເລກກໍຍັງຖືວ່າໜ້ອຍຫລາຍຢູ່ ຄືມັນສະແດງໃຫ້ເຫັນ
ເຖິງເສດຖະກິດທີ່ຫົດນ້ອຍຖອຍລົງ ແລະຕະຫລາດວຽກງານທີ່ຍັງສືບຕໍ່ຊັກຊ້າລົງໄປ
ໃນລະດູຮ້ອນນີ້.”
ຕະຫລາດຮຸ້ນສະຫະລັດຕົກຕໍ່າລົງ ຫລັງຈາກລາຍງານກ່ຽວກັບໜ້າວຽກທີ່ອ່ອນແອ ເຊ່ນດຽວກັນກັບພວກຕະຫລາດທີ່ວິຕົກກັງວົນໃຈ ຈາກຂົງເຂດເອເຊຍ ໄປຫາຢຸໂຣບ.
ທີ່ປະເທດອິຕາລີ ບ່ອນທີ່ພວກນັກຊ່ຽວຊານດ້ານເສດຖະກິດໄດ້ໄປເຕົ້າໂຮມກັນເມື່ອວັນສຸກ
ຜ່ານມາ ເພື່ອຫາລືກັນກ່ຽວກັບຊ່ອງທາງຂອງກາ ຟື້ນຕົວຄືນຂອງເສດຖະກິດໂລກນັ້ນ ການ
ປະເມີນສະພາບການແມ່ນບໍ່ແຈ່ມໃສເລີຍ.
ທ່ານ Nouriel Roubini ອາຈານສອນວິຊາເສດຖະສາດ ປະຈໍາມະຫາ ວິດທະຍາໄລ New York ມີຄວາມເຫັນວ່າ:
“ຂ້າພະເຈົ້າບໍ່ຄາດວ່າຈະມີການຖົດຖອຍໃນລະດັບໂລກເກີດຂຶ້ນ. ຂ້າພະເຈົ້າບໍ່ຄາດວ່າ
ຈະມີການຖົດຖອຍຢູ່ໃນພວກຕະຫລາດທີ່ກໍາລັງໂຜ່ໂຕຂຶ້ນມາມີຄວາມສໍາຄັນ ແລະກໍາ
ລັງເຕີບໂຕຂຶ້ນຢ່າງໄວນັ້ນ ແຕ່ວ່າສະຖິຕິດ້ານເສດຖະກິດຈາກສະຫະລັດ ຈາກພວກ
ປະເທດເຂດຢູໂຣສ່ວນໃຫຍ່ ແລະຈາກສະຫະລາດຊະອານາຈັກອັງກິດ ແມ່ນຊີ້ແນະວ່າ
ອາດມີການຫົດຕົວທາງດ້ານເສດຖະກິດເກີດຂຶ້ນ."
ພວກນັກເສດຖະສາດກ່າວວ່າ ການເຕີບໂຕທີ່ຊ້າລົງໃນສະຫະລັດ ແລະວິກິດການໜີ້ສິນ
ໃນພາກພື້ນຢຸໂຣບນັ້ນ ແມ່ນໄດ້ເຮັດໃຫ້ໂອກາດທີ່ຈະເກີດການຖົດຖອຍຢ່າງໜັກອີກຄັ້ງນຶ່ງ
ນັ້ນ ເພີ່ມທະວີຂຶ້ນ. ແລະນັ້ນກໍຈະສ້າງຄວາມກົດດັນຢ່າງໃຫຍ່ກວ່າເກົ່າຕໍ່ວໍຊິງຕັນ ບ່ອນທີ່
ປະທານາທິບໍດີບາຣັກ ໂອບາມາ ຈະປະກາດໂຄງການລິເລີ່ມໜ້າວຽກທີ່ສໍາຄັນໃນແລງວັນ
ພະຫັດມື້ນີ້ ຕໍ່ກອງປະຊຸມຄົບຊຸດຂອງລັດຖະສະພາສະຫະລັດ. ທ່ານ Gene Sperling
ຜູ້ອໍານວຍການສະພາເສດຖະກິດແຫ່ງຊາດປະຈໍາທໍານຽບຂາວ ກ່າວວ່າ ຂໍ້ສະເໜີຂອງ
ປະທານາທິບໍດີນັ້ນ ຖືວ່າສໍາຄັນຫລາຍ ແລະສົມຄວນທີ່ຈະໄດ້ຮັບການສະໜັບສະໜຸນຈາກ
ທັງສອງພັກການເມືອງ. ທ່ານ Sperling ເວົ້າວ່າ:
“ປະຊາຊົນຈະໄດ້ເຫັນວ່າ ໃນດ້ານຕ່າງໆທີ່ທ່ານຈະເວົ້າເຖິງ ເຊ່ນ ກ່ຽວກັບການຕັດພາສີ
ລົງສໍາລັບພວກຄົນງານ ແລະພວກທຸລະກິດນ້ອຍໆ ຍຸດທະວິທີສໍາລັບພວກທີ່ຫວ່າງງານ
ການສ້າງໜ້າວຽກເພື່ອສ້າງສາອາເມຣິກາຄືນໃໝ່ ທັງໝົດທີ່ເວົ້າມານັ້ນແມ່ນໄດ້ເປັນສິ່ງທີ່
ສົມຄວນໄດ້ຮັບການສະໜັບສະໜຸນຈາກທັງສອງພັກຝ່າຍແຕ່ໃດໆມາແລ້ວ. ແລະພວກເຮົາ
ກໍຫວັງ ຢ່າງຍິ່ງວ່າ ທ່ານປະທານາທິບໍດີຈະຮຽກຮ້ອງໃຫ້ລັດຖະສະພາ ແຍກການເຫັນແກ່ພັກແລະການເມືອງໄວ້ຕ່າງຫາກ ແລະເອົາເລື້ອງເສດຖະກິດ ແລະພວກຄົນງານມາຢູ່ຖັ້ນ ແຖວໜ້າ.”
ແຕ່ວ່າ ພ້ອມກັບການເລືອກຕັ້ງທົ່ວປະເທດ ທີ່ຈະມີຂຶ້ນໃນພຽງແຕ່ 15 ເດືອນຕໍ່ໜ້ານີ້ ພວກ ນັກລົງທຶນທັງຫລາຍແມ່ນບໍ່ມີຄວາມຮູ້ສຶກໃນແງ່ດີ ປານໃດເລີຍ.
ເບິ່ງວີດີໂອ ລາຍງານພາສາອັງກິດ: