ບັນດາເຈົ້າໜ້າທີ່ ອາເມຣິກັນ ແລະ ອັງກິດ ໄດ້ປະກາດຂໍ້ກ່າວຫາທາງອາຍາ ແລະ ການວາງມາດຕະການລົງໂທດ ໃນວັນຈັນວານນີ້ ຕໍ່ນັກລັກເຈາະຂໍ້ມູນ 7 ຄົນທີ່ອາໄສຢູ່ໃນ ຈີນ ແລະ ເຊື່ອມໂຍງກັບລັດຖະບານ ຈີນ.
ປະຕິບັດການດັ່ງກ່າວໄດ້ດຳເນີນຂຶ້ນໂດຍກຸ່ມລັກເຈາະຂໍ້ມູນທີ່ເອີ້ນວ່າ ໄພຂົ່ມຂູ່ທີ່ກ້າວໜ້າຢ່າງຕໍ່ເນື່ອງ 31 ຫຼື APT31, ເຊິ່ງແມ່ນປະຕິບັດການອັນກວ້າງຂວາງທີ່ຖືກໜູນຫຼັງໂດຍ ຈີນ ໂດຍແນເປົ້າໃສ່ບັນດາເຈົ້າໜ້າທີ່ ສະຫະລັດ, ນັກຂ່າວ, ບໍລິສັດ, ນັກເຄື່ອນໄຫວສະໜັບສະໜູນປະຊາທິປະໄຕ ແລະ ກຸ່ມຕິດຕາມການເລືອກຕັ້ງຂອງສະຫະຣາຊະອານາຈັກ ອັງກິດ.
ການປະຕິບັດການທີ່ວ່ານັ້ນ, ເຊິ່ງໄດ້ເລີ່ມຂຶ້ນໃນປີ 2010, ໄດ້ພະຍາຍາມທີ່ຈະສອດແນມ ແລະ ຂົ່ມຂູ່ບຸກຄົນລະດັບສູງທາງການເມືອງ ແລະ ນັກວິຈານຕໍ່ລັດຖະບານ ຈີນ. ພວກເຂົາຍັງມີຈຸດປະສົງທີ່ຈະເຕົ້າໂຮມຄວາມລັບດ້ານການຄ້າຈາກບັນດາບໍລິສັດ ອາເມຣິກັນ.
ທ່ານ ບຣາຍອັນ ແນລສັນ, ຮອງລັດຖະມົນຕີກະຊວງການເງິນ ທີ່ຮັບຜິດຊອບສຳລັບລັດທິກໍ່ການຮ້າຍ ແລະ ການສືບລັບດ້ານການເງິນ, ໄດ້ກ່າວໃນຖະແຫຼງການສະບັບນຶ່ງວ່າ “ສະຫະລັດ ໄດ້ເພັ່ງເລັງໃສ່ການກີດຂວາງທີ່ອັນຕະລາຍ ແລະ ການກະທຳທີ່ບໍ່ມີຄວາມຮັບຜິດຊອບຂອງຜູ້ດຳເນີນການມຸ່ງຮ້າຍທາງຄອມພິວເຕີ, ພ້ອມກັບປົກປ້ອງປະຊາຊົນຂອງພວກເຮົາ ແລະ ພື້ນຖານໂຄງລ່າງທີ່ສຳຄັນຂອງພວກເຮົາ.”
ທ່ານກ່າວວ່າ “ຜ່ານວິທີການທົ່ວລັດຖະບານຂອງພວກເຮົາ ແລະ ການປະສານງານຢ່າງໃກ້ຊິດກັບຄູ່ຮ່ວມ ອັງກິດ ຂອງພວກເຮົາ, ກະຊວງການເງິນຈະສືບຕໍ່ໃຊ້ເຄື່ອງມືຂອງພວກເຮົາ ເພື່ອເປີດເຜີຍເຄືອຂ່າຍທີ່ວ່ານີ້ ແລະ ປ້ອງກັນໄພຂົ່ມຂູ່ຈາກພວກນີ້.”
ໃນຖະແຫຼງການສະບັບນຶ່ງ, ລັດຖະມົນຕີກະຊວງຍຸດຕິທຳ ສະຫະລັດ ທ່ານ ເມີຣິກ ກາແລນ ໄດ້ກ່າວວ່າ “ກະຊວງຍຸດຕິທຳ ຈະບໍ່ມີການຜ່ອນຜັນຕໍ່ຄວາມພະຍາຍາມໂດຍລັດຖະບານ ຈີນ ເພື່ອຂົ່ມຂູ່ປະຊາຊົນ ອາເມຣິກັນ ຜູ້ທີ່ເຮັດວຽກເພື່ອສາທາລະນະ, ປິດປາກຜູ້ຄັດຄ້ານລັດຖະບານຜູ້ທີ່ຖືກປົກປ້ອງໂດຍກົດໝາຍ ອາເມຣິກັນ, ຫຼື ລັກຂະໂມຍຈາກທຸລະກິດຕ່າງໆຂອງຊາວ ອາເມຣິກັນ.”