ກອງທັບ ສະຫະລັດ ແມ່ນກຳລັງຮື້ຖອນຂົວບັກຊົ່ວຄາວທີ່ຖືກສ້າງຂຶ້ນເພື່ອນຳ ສົ່ງການຊ່ວຍເຫຼືອໄປໃຫ້ຊາວປາແລັສໄຕນໃນເຂດ ກາຊາ. ແຕ່ບັນດາເຈົ້າ ໜ້າທີ່ກ່າວວ່າ ກອງທັບຈະສືບຕໍ່ເພື່ອຊ່ວຍຂົນສົ່ງການຊ່ວຍເຫຼືອສຳລັບເຂດ ກາຊາ ຈາກປະເທດ ໄຊປຣັສ ໄປທ່າເຮືອ ອາຊດອດ ຂອງ ອິສຣາແອລ. ດັ່ງນັກຂ່າວປະຈຳທຳນຽບຂາວຂອງວີໂອເອ ຄາລາ ແບບ ລາຍງານນັ້ນ, ການປ່ຽນແປງດັ່ງກ່າວມີຂຶ້ນໃນຂະນະທີ່ຊາວ ອິສຣາແອລ ແລະ ກາຊາ ສືບຕໍ່ລໍຖ້າສຳລັບຂໍ້ຕົກລົງການຢຸດຍິງ ທີ່ຈະອະນຸຍາດໃຫ້ການຊ່ວຍເຫຼືອເຂົ້າ ໄປໃນ ກາຊາ ເພີ່ມເຕີມ. ພຸດທະສອນ ມີລາຍລະອຽດມາສະເໜີທ່ານ ໃນອັນດັບຕໍ່ໄປ.
Your browser doesn’t support HTML5
ສະຫະລັດ ຈະມ້າງຂົວບັກທີ່ຖືກສ້າງຂຶ້ນເພື່ອນຳສົ່ງການຊ່ວຍເຂົ້າໃນເຂດ ກາຊາ
ພຽງສອງເດືອນຫຼັງຈາການຂົນສົ່ງການຊ່ວຍເຫຼືອຊຸດທຳອິດໄດ້ໄປຮອດຊາຍຝັ່ງ ຂອງເຂດກາຊາ ໂດຍເສັ້ນທາງໆທະເລ, ກອງທັບ ສະຫະລັດ ແມ່ນກຳລັງມ້າງ ຂົວບັກຊົ່ວຄາວ ທີ່ເຂົາເຈົ້າສ້າງຂຶ້ນເພື່ອຂະຫຍາຍການຂົນສົ່ງການຊ່ວຍເຫຼືອ.
ທ່ານນາງ ຊາບຣີນາ ຊິງ, ຮອງໂຄສົກທຳນຽບຫ້າແຈ ກ່າວວ່າ “ພວກເຮົາຮູ້ວ່າສະພາບທົ່ວໄປຂອງທະເລແມ່ນຈະຮ້າຍແຮງຂຶ້ນໃນຂະນະທີ່ລະດູຮ້ອນດໍາເນີນໄປ. ນັ້ນແມ່ນສິ່ງທີ່ຮູ້ກັນຕະຫຼອດມາ.”
ຂົວບັກດັ່ງກ່າວມີຄ່າໃຊ້ຈ່າຍປະມານ 230 ລ້ານໂດລາ ແລະ ຖືກໃຊ້ການ ພຽງປະມານ 20 ວັນເທົ່ານັ້ນໃນໄລຍະເວລາ 2 ເດືອນ ຍ້ອນສະພາບນໍ້າ ທະເລທີ່ຮ້າຍແຮງ. ແຕ່ທຳນຽບຫ້າແຈກ່າວວ່າ ຂົວບັກດັ່ງກ່າວໄດ້ນຳເອົາການ ຊ່ວຍເຫຼືອຢ່າງຫຼວງຫຼາຍໄປໃຫ້ຊາວ ກາຊາ ທ່າມກາງວິກິດການອາຫານທີ່ ຮຸນແຮງ ແລະ ການຫຼ້າຊ້າຂອງລົດບັນທຸກຂະໜາດໃຫຍ່ຢູ່ເຂດຊາຍແດນ.
ທ່ານນາງ ຊາບຣີນາ ຊິງ ກ່າວວ່າ “ຂົວບັກດັ່ງກ່າວໄດ້ນໍາສົ່ງການຊ່ວຍເຫຼືອດ້ານມະນຸດສະທໍາຈໍານວນທີ່ຫຼາຍທີ່ສຸດ ທີ່ກອງທັບສະຫະລັດ ໄດ້ນຳສົ່ງໄປພາກພື້ນຕາເວັນອອກກາງ. ສະນັ້ນຂ້າພະ ເຈົ້າຮູ້ວ່າມັນໄດ້ມີການຕຳໜິຕິຕຽນ, ແລະ ຂ້າພະເຈົ້າຮູ້ຈາກບາງຄົນຢູ່ໃນ ຫ້ອງນີ້, ແລະ ຂ້າພະເຈົ້າຮູ້ວ່າມັນໄດ້ມີອຸປະສັກຈຳນວນນຶ່ງ ເມື່ອເວົ້າເຖິງ ຂົວບັກດັ່ງກ່າວ, ແຕ່ໃນທ້າຍຂອງວັນ, ພວກເຮົາກໍໄດ້ນຳສົ່ງການຊ່ວຍເຫຼືອ ໜັກເກືອບ 20 ລ້ານປອນໄປໃຫ້.”
ນາຍົກລັດຖະມົນຕີ ອິສຣາແອລ ທ່ານ ເບັນຈາມິນ ເນຕັນຢາຮູ ຈະເດີນທາງ ມານະຄອນຫຼວງ ວໍຊິງຕັນ ອາທິດໜ້າ ໃນຂະນະທີ່ບັນດາຜູ້ນຳຝ່າຍຄ້ານ ອິສຣາແອລ ໄດ້ຕຳໜິວິຈານການບໍລິຫານສົງຄາມຂອງທ່ານ ແລະ ໄດ້ຮຽກ ຮ້ອງໃຫ້ທ່ານເຮັດຫຼາຍກວ່າເກົ່າ ເພື່ອເຈລະຈາການປ່ອຍຕົວປະກັນ ອິສຣາແອລ ຈາກກຸ່ມ ຮາມາສ. ການປ່ອຍຕົວປະກັນຈະປະກອບມີຂໍ້ຕົກລົງຢຸດຍິງໄລຍະນຶ່ງ ທີ່ຍັງບໍ່ໄດ້ ຖືກໄກ່ເກ່ຍເທື່ອ.”
ທ່ານ ນິມຣອດ ໂກເຣັນ, ຈາກສະຖາບິນເຂດຕາເວັນອອກກາງ ກ່າວວ່າ “ຄວາມແຕກຕ່າງຫຼັກລະຫວ່າງຝ່າຍຕ່າງໆ ກ່ຽວກັບ ການຢຸດຍິງກໍແມ່ນວ່າ ອິສຣາແອລ ຈະສືບຕໍ່ການຕໍ່ສູ້ຂອງເຂົາເຈົ້າໃນເຂດກາຊາຫຼືບໍ່ ຫຼັງຈາກໄລຍະທີ 1, ຕົວເລືອກນີ້ແມ່ນສິ່ງທີ່ທ່ານ ເນຕັນຢາຮູ ຢາກຮັກສາໄວ້, ເຊິ່ງກຸ່ມ ຮາມາສ ໄດ້ປະຕິເສດຢ່າງຊິ້ນເຊີງ, ແລະ ຄວາມບໍ່ເຫັນພ້ອມ ກ່ຽວກັບສິ່ງນັ້ນແມ່ນ ມີຢູ່ແລ້ວ ນັບຕັ້ງແຕ່ເດືອນກຸມພາຈົນມາຮອດມື້ນີ້, ໂດຍປາສະຈາກການປ່ຽນ ແປງທີ່ສຳຄັນໃດໆ.”
ບັນດາເຈົ້າໜ້າທີ່ຫວັງວ່າທັງສອງຝ່າຍຈະສາມາດບັນລຸຂໍ້ຕົກລົງ ເພື່ອທີ່ຈະຫຼຸດຜ່ອນຄວາມເຄັ່ງຕຶງລະຫວ່າງ ອິສຣາແອລ ກັບກຸ່ມເຮັສບອລລາ ທີ່ໄດ້ຮັບການໜູນຫຼັງໂດຍ ອີຣ່ານ ຂອງ ເລບານອນ.
ບ່ອນດັ່ງນັ້ນ, ບັນດານັກວິເຄາະຢ້ານວ່າ ອິສຣາແອລ ອາດເຫັນສົງຄາມເຕັມອັດຕາຢູ່ເຂດຊາຍແດນພາກເໜືອຂອງເຂົາເຈົ້າເຊັ່ນກັນ, ເຊິ່ງຈະເຮັດໃຫ້ພາກພື້ນນັ້ນມີຄວາມວຸ້ນວາຍຕໍ່ໄປ.