ພວກເຈົ້າໜ້າທີ່ຕາລີບານ ກ່າວວ່າ ຄະນະເຈລະຈາຂອງກຸ່ມຕາລິບານໃນອັຟການິສຖານ
ກໍາລັງພົບປະກັນກັບເຈົ້າໜ້າທີ່ອາເມຣິກັນຢູ່ທີ່ກາຕ້າ ສໍາລັບການເຈລະຈາແບບຕໍ່ເນື່ອງກັນ
ຫລາຍໆບັ້ນທີ່ແນ່ໃສ່ເພື່ອສ້າງຄວາມໄວ້ວາງໃຈຂຶ້ນ ໃນທັງສອງກໍ້າສອງຝ່າຍ ກ່ອນໜ້າ
ການເຈລະຈາສັນຕິພາບ ທີ່ຈະມາເຖິງນີ້.
ທ່ານ Maulavi Qalamuddin ຊຶ່ງເຄີຍເປັນຜູ້ນໍາໜ່ວຍຕໍາຫລວດ ທາງສາສນາຂອງກຸ່ມ
ຕາລີບານ ກ່າວໃນວັນອາທິດນີ້ວ່າ ພວກຜູ້ແທນຂອງຕົນມີຮວມທັງອະດີດເຈົ້າໜ້າທີ່ຫລາຍ
ຄົນ ແລະອະດີດເລຂາຄົນນຶ່ງຂອງຜູ້ນໍາ Mullah Omar ຫົວໜ້າກຸ່ມຕາລິບານ.
ທ່ານ Qalamuddin ກ່າວວ່າ ຫົວຂໍ້ຂອງການເຈລະຈາແມ່ນຮວມທັງ ການປ່ອຍພວກນັກ
ໂທດຕາລີບານ ຈາກສູນກັງຂັງຂອງກອງທັບສະຫະຣັດ ທີ່ອ່າວ Guantanamo ເທິງເກາະ
Cuba ນັ້ນນໍາ. ທ່ານກ່າວໃຫ້ຮູ້ອີກວ່າ ຄະນະເຈລະຈາໄດ້ເດີນທາງໄປປະເທດກາຕ້າຈາກ
ປາກິສຖານ ຊຶ່ງອາດເປັນຮ່ອງຮອຍຊີ້ບອກວ່າ ລັດຖະບານອິດສະລາມາບັສ ອາດໃຫ້ການ
ສະໜັບສະໜຸນແກ່ການເຈລະຈາສັນຕິພາບນັ້ນ.
ໃນຂະນະດຽວກັນນັ້ນ ທາງເຈົ້າໜ້າທີ່ອັຟການິສຖານ ກໍໄດ້ກ່າວໃນວັນອາທິດວານນີ້ວ່າ
ໃນບໍ່ຊ້ານີ້ເຂົາເຈົ້າກໍຈະເປີດການເຈລະຈາອີກດ້ານນຶ່ງ ເປັນດ້ານທີສອງກັບກຸ່ມຕາລິີບານ
ໂດຍຈະພົບປະກັນຢູ່ຊາອຸດີ ອາເຣເບຍ ໃນຄວາມພະຍາຍາມເພື່ອຍຸດຕິ ສົງຄາມອັຟກາ
ນິສຖານ ທີ່ມີມາໄດ້ນຶ່ງທົດສະວັດແລ້ວນັ້ນ.
ເຈົ້າໜ້າທີ່ສະຫະລັດ ຍັງບໍ່ທັນໄດ້ໃຫ້ຄວາມຄິດເຫັນ ກ່ຽວກັບຄໍາຖະແຫລງດັ່ງກ່າວນີ້.