ທ່ານ Rex Tillerson ລັດຖະມົນຕີກະຊວງການຕ່າງປະເທດສະຫະລັດ ມີກຳນົດທີ່
ຈະພົບປະກັບ ທ່ານ Sergei Lavrov ລັດຖະມົນຕີກະຊວງການຕ່າງປະເທດຣັດ
ເຊຍ ໃນວັນພຸດມື້ອື່ນນີ້ ເພື່ອສົນທະນາກັນເລື່ອງຊີເຣຍ, ຢູເຄຣນ ແລະບັນຫາອື່ນໆ ອີກ.
ກະຊວງການຕ່າງປະເທດ ສະຫະລັດ ກ່າວຢູ່ໃນຖະແຫຼງການ ໃນວັນຈັນວານນີ້ວ່າ
“ກ່ຽວກັບເລື່ອງຊີເຣຍ ທ່ານລັດຖະມົນຕີ ມີຄວາມຕັ້ງໃຈຈະສົນທະນາກ່ຽວກັບຄວາມພະຍາຍາມ ເພື່ອຫລຸດຜ່ອນຄວາມຮຸນແຮງລົງ, ສະໜອງການຊ່ວຍເຫລືອດ້ານມະນຸດ
ສະທໍາແກ່ປະຊາ ຊົນຊີເຣຍ ແລະ ວາງຂັ້ນຕອນເພື່ອແກ້ໄຂຂໍ້ຂັດແຍ້ງທາງການເມືອງ.”
ຄໍາປະກາດດັ່ງກ່າວໄດ້ນຳອອກເຜີຍແຜ່ໃນຂະນະທີ່ທ່ານ Jim Mattis ລັດຖະມົນຕີ
ກະຊວງ ປ້ອງກັນປະເທດສະຫະລັດ ເວົ້າວ່າ ສະຫະລັດຈະກວດກາແຜນການຂອງ
ຣັດເຊຍ ໃນການສັ້າງຕັ້ງເຂດ "ຫລຸດຜ່ອນຄວາມຮຸນແຮງ" ຢູ່ໃນຊີເຣຍ ນັ້ນຢ່າງລະອຽດ.
ເມື່ອຖືກຖາມກ່ຽວກັບຄວາຄິດລິເລີ້ມດັ່ງກ່າວ ທ່ານ Mattis ກ່າວໃນວັນຈັນວານນີ້ວ່າ
"ຄວາມຫຍຸ້ງຍາກສຸດ ຍາມໃດກໍແມ່ນຢູ່ໃນລາຍລະອຽດ" "ພວກເຮົາຈະຕ້ອງເບິ່ງຂໍ້ສະ
ເໜີນັ້ນ ວ່າມັນຈະໃຊ້ການໄດ້ຫລືບໍ່."
ຣັດເຊຍ, ເທີກີ ແລະອີຣ່ານໄດ້ເຫັນດີນໍາກັນກ່ຽວກັບຂໍ້ຕົກລົງທີ່ລັດຖະບານມົສກູນໍາສະ
ເໜີ ໃນອາທິດແລ້ວນີ້ ເພື່ອໃຫ້ຕັ້ງໃນອັນທີ່ເອີ້ນວ່າເຂດ "ຫລຸດຜ່ອນຄວາມຮຸນແຮງ" ຢູ່
ໃນຊີເຣຍ ໃນການພະຍາຍາມທີ່ຈະຢຸດຕິຂໍ້ຂັດແຍ້ງລົງ.
ຄໍາສະເໜີນັ້ນໄດ້ຮຽກຮ້ອງໃຫ້ເອົາມາດຕະການ ໃນການຫລຸດຜ່ອນການສູ້ລົບກັນ ຢູ່ໃນ
4 ຂົງເຂດທີ່ຖືກກໍານົດໄວ້ຢູ່ໃນຊີເຣຍ ຊຶ່ງເປັນເຂດທີ່ພວກກະບົດທີ່ບໍ່ມີສ່ວນພົວພັນກັບ
ກຸ່ມຫົວຮຸນແຮງລັດອິສລາມ ຫລື IS ຄວບຄຸມພື້ນທີ່ຢູ່ນັ້ນ.
ແຜນການດັ່ງກ່າວໄດ້ເກີດຂຶ້ນພາຍຫລັງທີ່ມີການເຈລະຈາສັນຕິພາບຮອບຫລ້າສຸດ
ລະຫວ່າງ ຣັດເຊຍ, ອີ່ຣ່ານ, ແລະເທີກີ ທີ່ຈັດຂຶ້ນຢູ່ໃນນະຄອນ Astana ຂອງ
Kazakhstan. ສະຫະລັດໄດ້ສົ່ງເຈົ້າໜ້າທີ່ຂັ້ນສູງທ່ານນຶ່ງໄປຮ່ວມກອງປະຊຸມດັ່ງກ່າວ
ແຕ່ກໍບໍ່ໄດ້ເປັນພາຄື ຂອງສັນຍາສະບັບນີ້.
ແຜນລິເລີ້ມດັ່ງກ່າວ ມີຜົນບັງຄັບໃຊ້ໃນທ່ຽງຄືນຂອງວັນສຸກແລ້ວນີ້. ຣັດເຊຍເວົ້າວ່າ
ເຂດດັ່ງກ່າວໄດ້ຖືກປິດ ບໍ່ໃຫ້ເຮືອບິນຂອງກອງກໍາລັງປະສົມ ທີ່ນໍາພາໂດຍສະຫະລັດ
ບິນເຂົ້າໄປ.
ການເຈລະຈາທີ່ນະຄອນ Astana ບໍ່ແມ່ນອັນດຽວກັນກັບຄວາມພະຍາຍາມຂອງສະ
ຫະປະ ຊາຊາດ ທີ່ຈະນຳເອົາພັກຝ່າຍຕ່າງໆ ທີ່ກໍາລັງຕໍ່ສູ້ກັນຢູ່ນັ້ນ ຫັນໜ້າມາເຈລະຈາ
ກັນ ເພື່ອແນໃສ່ຢຸດຕິສົງຄາມ ແລະເລີ້ມຕົ້ນມີການປ່ຽນແປງທາງການເມືອງ ໂດຍທີ່ມີ
ລັດຖະທໍາມະ ນູນ ແລະການເລືອກຕັ້ງຕ່າງໆ ຂຶ້ນ.
ທ່ານ Staffan de Mistura ທູດພິເສດຂອງສະຫະປະຊາຊາດປະຈໍາຊີເຣຍ ກ່າວໃນ
ວັນຈັນວານນີ້ວ່າ ທ່ານຫວັງວ່າ ແຜນການໃນການຫລຸດຜ່ອນຄວາມຮຸນແຮງທີ່ Astana
ຈະໄດ້ຖືກນໍາໄປປະຕິບັດຢ່າງເຕັມສ່ວນ ແລະຊ່ວຍໃນການສ້າງລັກສະນະທ່າທີທີ່ດີ
ໃຫ້ແກ່ການເຈ ລະຈາ ລະຫວ່າງລັດຖະບາຍຊີເຣຍ ແລະພວກກະບົດ ຮອບໜ້າທີ່ນໍາ
ພາໂດຍ ສະຫະປະຊາຊາດ ທີ່ຈະເລີ້ມຕຂຶ້ນໃນວັນທີ 16 ພຶດສະພາ ທີ່ນະຄອນ Geneva.
ອ່ານຂ່າວນີ້ເພີ້ມເປັນພາສາອັງກິດ