ຂະນະດຽວກັນ ລັດຖະມົນຕີປ້ອງກັນປະເທດສະຫະລັດ ແລະ ຄູ່ຕຳແໜ່ງຝ່າຍເກົາຫລີໃຕ້ ກໍໄດ້ຫາລືກັນ ກ່ຽວກັບບັນຫາຄວາມໝັ້ນຄົງ ໃນເຂດເອເຊຍ ຮວມທັງເລື້ອງເກົາຫລີເໜືອ ແລະໂຄງການອາວຸດນິວເຄລຍທີ່ເປັນບັນຫາໂຕ້ຖຽງຂອງປະເທດດັ່ງກ່າວ.
ທ່ານ Ash Carter ແລະທ່ານ Han Ming-koo ໄດ້ພົບປະກັນໃນວັນເສົາມື້ນີ້ຢູ່ຂ້າງນອກ ຂອງກອງປະຊຸມ ວ່າດ້ວຍຄວາມໝັ້ນຄົງ Shangri-La ທີ່ສິງກະໂປ ຊຶ່ງເປັນກອງປະຊຸມ ຄວາມໝັ້ນຄົງປະຈຳປີທີ່ໃຫຍ່ທີ່ສຸດໃນເຂດເອເຊຍ.
ລັດຖະມົນຕີທັງສອງໄດ້ປະນາມຢ່າງແຮງ ຕໍ່ການທົດລອງອາວຸດນິວເຄລຍແລະລູກສອນ ໄຟຂອງເກົາຫລີເໜືອຫວ່າງໄວໆມານີ້ ໂດຍຮຽກຮ້ອງໃຫ້ເກົາຫລີເໜືອ ປະຖິ້ມໂຄງການ ອາວຸດນິວເຄລຍຂອງຕົນ ໂດຍສິ້ນເຊີງ ໃນວິທີທີ່ສາມາດກວດສອບ ແລະຕ່າວປີ້ນບໍ່ໄດ້ ອີງຕາມຂໍ້ຄວາມໃນຖະແຫຼງການ.
ຖະແຫຼງການກ່າວວ່າ ສະຫະລັດຂໍຢືນຢັນອີກຄັ້ງນຶ່ງ ເຖິງຄວາມໝັ້ນໝາຍຢ່າງແຂງຂັນ ຂອງຕົນ ທີ່ຈະປົກປ້ອງເກົາຫຼີໃຕ້.
ໃນເດືອນແລ້ວນີ້ ເກົາຫລີໃຕ້ບໍ່ໄດ້ໃຫ້ຄວາມສຳຄັນຕໍ່ຂໍ້ສະເໜີຂອງເກົາຫລີເໜືອທີ່ຢາກ ເປີດການເຈລະຈາທາງທະຫານ ໃນທ້າຍເດືອນພຶດສະພາຫລືຕົ້ນເດືອນມິຖຸນານີ້.
ກະຊວງປ້ອງກັນປະເທດເກົາຫລີໃຕ້ ກ່າວວ່າ ຂໍ້ສະເໜີຂອງເກົາຫລີເໜືອບໍ່ໄດ້ຮວມທັງ ແຜນການເຮັດໃຫ້ແຫຼມເກົາຫຼີເປັນເຂດປອດນິວເຄລຍແຕ່ກັບແນໃສ່ເພື່ອລົບກວນການ ຮ່ວມມືຂອງນາໆຊາດໃນການລົງໂທດແລະເພື່ອສ້າງຄວາມ ແຕກແຍກໃຫ້ແກ່ຫາງສຽງ ພາຍໃນປະເທດແທນ.
ເກົາຫລີທັງສອງມີຊາຍແດນທີ່ມີການເສີມກຳລັງຢ່າງເຂັ້ມແຂງທີ່ສຸດໃນໂລກ ນັບແຕ່ສົງ ຄາມໃນຕົ້ນຊຸມປີ 1950 ສິ້ນສຸດລົງໂດຍການສະຫງົບເສິກຊົ່ວຄາວ ບໍ່ແມ່ນດ້ວຍສົນທິ ສັນຍາສັນຕິພາບ. ມີທະຫານສະຫະລັດປະມານ 28,500 ຄົນ ປະຈຳການຢູ່ເກົາຫຼີໃຕ້ ເພື່ອຢັບຢັ້ງເກົາຫລີເໜືອ.