ບັນດາຜູ້ມີສິດປ່ອນບັດໃນ 10 ລັດ ພາກັນອອກໄປປ່ອນບັດໃນມື້ນີ້ ທີ່ເອີ້ນວ່າ “Super Tuesday” ຫລືວັນອັງຄານທີ່ຍິ່ງໃຫຍ່ ຊຶ່ງເປັນມື້ປ່ອນບັດທີ່ສໍາຄັນທີ່ສຸດມາຮອດປັດຈຸບັນ ໃນການແຂ່ງຂັນຂອງຜູ້ສະມັກເລືອກຕັ້ງຈາກພັກ Republican ເພື່ອໃຫ້ໄດ້ຖືກແຕ່ງຕັ້ງເປັນຜູ້ຕາງໜ້າຂອງພັກ ໃນການເລືອກຕັ້ງປະທານາທິບໍດີສະຫະລັດນັ້ນ.
ໃນວັນອັງຄານມື້ນີ້ ຈະມີການແຂ່ງຂັນກັນຊີງເອົາພວກຜູ້ແທນໄປຮ່ວມໃນກອງປະຊຸມຫລວງ
ຂອງພັກໃນຈໍານວນຫລາຍກວ່າ 1 ສ່ວນ 3 ຂອງບັນດາຜູ້ແທນພັກທັງໝົດ 1144 ທ່ານ
ທີ່ຕ້ອງການ ເພື່ອໃຫ້ໄດ້ຖືກແຕ່ງຕັ້ງໃຫ້ເປັນຜູ້ສະມັກເລືອກຕັ້ງປະທານາທິບໍດີຕາງໜ້າພັກ
Republican ນັ້ນ ຊຶ່ງແມ່ນຫລາຍກວ່າຈໍານວນຜູ້ແທນທີ່ໄດ້ໃນການເລືອກຕັ້ງຂັ້ນຕົ້ນແລະ
ກອງປະຊຸມຄໍກັສຂອງພັກທີ່ຜ່ານມາແລ້ວນັ້ນບວກເຂົ້າກັນທັງໝົດ.
ທ່ານມິດ ຣອມນີ ທີ່ເວລານີ້ມີຄະແນນນໍາໜ້າແລະໄດ້ຊະນະການແຂ່ງຂັນມາແລ້ວໃນ 5 ລັດ ຫວັງວ່າຈະຊົມໃຊ້ການແຂ່ງຂັນໃນມື້ນີ້ ເພື່ອເສີມຂະຫຍາຍໃຫ້ທ່ານໄດ້ເປັນຜູ້ສະມັກຮັບເລືອກຕັ້ງປະທານາທິບໍດີຕາງໜ້າພັກຢ່າງຫລີກລ່ຽງບໍ່ໄດ້. ຄູ່ແຂ່ງທີ່ສໍາຄັນຂອງທ່ານ ຄືທ່ານ ຣິກ ຊັນໂຕຣັມ ກໍາລັງພະຍາຍາມເພື່ອຟື້ນຄືນມາໂອກາດທີ່ໄດ້ຊ່ອຍໃຫ້ທ່ານໄດ້ຮັບໄຊຊະນະໃນການແຂ່ງຂັນໃນ 3 ລັດລຽນຕິດໃນຕົ້ນເດືອນກຸມພາຜ່ານມານີ້.
ໃນວັນຈັນວານນີ້ ທ່ານຣອມນີແລະທ່ານຊັນໂຕຣັມ ໄດ້ໄປໂຄສະນາຫາສຽງສະໜັບສະໜຸນໃນລັດ Ohio ຊຶ່ງເປັນເຂດຕໍ່ສູ້ທີ່ມີການຕິດຕາມເບິ່ງກັນຢ່າງໃກ້ຊິດ ໃນພາກກາງຕາເວັນຕົກຂອງສະຫະລັດ ບ່ອນທີ່ທັງສອງທ່ານມີສຽງສະໜັບສະໜຸນຢ່າງສູສີກັນນັ້ນ.
ການສໍາຫລວດຫາງສຽງຂອງມະຫາວິທະຍາໄລ Quinnipiac ຄັ້ງໃໝ່ ສະແດງໃຫ້ເຫັນວ່າ ທ່ານມິດ ຣອມນີ ມີຄະແນນດີຂຶ້ນນັບແຕ່ສັບປະ ດາແລ້ວນີ້ເປັນຕົ້ນມາ ແລະເວລານີ້ໄດ້ຮັບສຽງສະໜັບສະໜຸນ 34 ເປີ ເຊັນຈາກບັນດາຜູ້ປ່ອນບັດສັງກັດພັກ Republican ທີ່ມີທ່າທາງວ່າ ຈະໄປໃຊ້ສິດໃຊ້ສຽງຂອງຕົນໃນການເລືອກຕັ້ງຂັ້ນຕົ້ນໃນລັດ Ohio ຊຶ່ງລື່ນທ່ານ ຊັນໂຕຣັມ 3 ເປີເຊັນ. ທ່ານຊັນໂຕຣັມ ມີສຽງນໍາໜ້າທ່ານຣອມນີ ໃນເດືອນແລ້ວນີ້.
ການແຂ່ງຂັນກັນໃນວັນອັງຄານມື້ນີ້ ຈະເຮັດໃຫ້ພວກສະມາຊິກຂອງພັກຫຍັບໃກ້ເຂົ້າໄປສູ່
ການຄັດເລືອກເອົາຜູ້ສະມັກຮັບເລືອກຕັ້ງຂອງພວກເຂົາເຈົ້າ ເພື່ອປະເຊີນໜ້າກັບປະທານາ
ທິບໍດີບາຣັກ ໂອບາມາ ທີ່ສັງກັດພັກເດໂມແກຣດ ໃນການເລືອກຕັ້ງປະທານາທິບໍດີໃນ
ເດືອນພະຈິກທ້າຍປີນີ້.
ພວກລັດອື່ນໆທີ່ມີການເລືອກຕັ້ງຂັ້ນຕົ້ນໃນວັນອັງຄານມື້ນີ້ ກໍມີລັດ Georgia, Massa
chusetts, Vermont, Virginia, Oklahoma ແລະ Tennessee. ສ່ວນລັດທີ່ມີກອງ
ປະຊຸມຄັດເລືອກຜູ້ສະມັກຂອງພັກຣີພັບບລິກັນ ຫລືທີ່ເອິ້ນວ່າ ຄໍກັສ ນັ້ນ ກໍມີລັດ Idaho,
North Dakota ແລະ Alaska.