ເຈົ້າໜ້າທີ່ຂັ້ນສູງຈາກທໍານຽບຂາວໄດ້ກ່າວໃນວັນອາທິດວານນີ້ວ່າສະຫະລັດໄດ້ຕັດ
ສິນໃຈງົດການຊ່ອຍເຫຼືອທາງທະຫານໃນມູນຄ່າ 800 ລ້ານໂດລາ ແກ່ປາກີສຖານ.
ຫົວໜ້າຫ້ອງການປະຈໍາທໍານຽບຂາວ ທ່ານ Wlliam Daley ໄດ້ກ່າວຢູ່ໃນລາຍການ
ອາທິດນີ້ ຫລື This Week ຂອງສະຖານີໂທລະພາບຊ່ອງ ABC ວ່າ ເຖິງແມ່ນວ່າ
ສາຍພົວພັນລະຫວ່າງສະຫະລັດແລະປາກີສຖານຈະຝືດເຄືອງແລະຫຍຸ້ງຍາກສັບສົນ
ແດ່ໃນໄລຍະນີ້ກໍຕາມ, ແຕ່ທັງສອງຝ່າຍກໍຈະຕ້ອງເຮັດໃຫ້ສາຍພົວພັນນັ້ນໃຊ້ການໄດ້
ໃນຊ່ວງເວລາຕໍ່ໄປ. ທ່ານຍັງກ່າວວ່າ ປາກີສຖານແມ່ນໄດ້ເປັນພາຄີທີ່ສໍາຄັນໃນການ
ຕໍ່ສູ້ຕ້ານພວກກໍ່ການຮ້າຍ ແຕ່ວ່າປາກີສຖານໄດ້ດໍາເນີນບາດກ້າວບາງຢ່າງ ທີ່ເຮັດ
ໃຫ້ສະຫະລັດຕ້ອງງົດການຊ່ອຍເຫຼືອທາງການທະຫານບາງຢ່າງໄວ້ ຊຶ່ງທ່ານບໍ່ໄດ້
ອະທິບາຍເພີ່ມຕື່ມແຕ່ຢ່າງໃດ.
ໄດ້ມີລາຍງານຂ່າວທີ່ອ້າງຄໍາເວົ້າຂອງພວກເຈົ້າໜ້າທີ່ສະຫະລັດ ທີ່ເວົ້າວ່າ ການເຄື່ອນ
ໄຫວດັ່ງກ່າວນີ້ແມ່ນເປັນການຕອບໂຕ້ຕໍ່ການຕັດສິນໃຈຂອງປາກີສຖານ ທີ່ໄດ້ຂັບໄລ່
ພວກເຈົ້າໜ້າທີ່ເຝິກແອບທະຫານຂອງສະຫະລັດອອກຈາກປະເທດແລະຈໍາກັດການ
ອອກວີຊາໃຫ້ແກ່ພວກພະນັກງານຂອງສະຫະລັດນໍາ.
ພວກນັກວິເຄາະກ່າວວ່າ ນອກນີ້ແລ້ວ ການງົດການຊ່ອຍເຫຼືອທີ່ວ່ານັ້ນຍັງມີເປົ້າໝາຍ
ເພື່ອກົດດັນໃຫ້ທາງກອງທັບປາກີສຖານດໍາເນີນການຫຼາຍກ່ວານີ້ໃນການຮ່ວມມືກັບ
ທາງການທະຫານສະຫະລັດ ໃນການຕໍ່ສູ້ກັບພວກຫົວຮຸນແຮງນັ້ນ.
ໃນວັນອາທິດວານນີ້ເຊັ່ນກັນ ທາງປາກີສຖານໄດ້ຮຽກຮ້ອງໃຫ້ສະຫະລັດແບ່ງປັນ
ຂໍ້ມູນກ່ຽວກັບບ່ອນຢູ່ຂອງຜູ້ນໍາຄົນໃໝ່ຂອງກຸ່ມກໍ່ການຮ້າງ al-Qaida ນາຍ
Ayman al-Zawahri ນັ້ນ. ການຮ້ອງຂໍທີ່ວ່ານີ້ ແມ່ນມີຂຶ້ນຫຼັງຈາກທີ່ລັດຖະມົນຕີ
ປ້ອງກັນປະເທດສະຫະລັດ ທ່ານ Leon Panetta ໄດ້ກ່າວໃນລະຫວ່າງການຢ້ຽມ
ຢາມນະຄອນຫລວງ Kabul ຂອງອັຟການິສຖານໃນວັນເສົາແລ້ວນີ້ວ່າ ທາງວໍຊີງຕັນ
ເຊື່ອວ່ານາຍ Zawahri ລົບລີ້ຢູ່ໃນປາກີສຖານໃນເຂດເກິ່ງປົກຄອງຕົນເອງຂອງພວກ
ຊົນເຜົ່າ ຢູ່ເລາະຕາມຊາຍແດນຕິດກັບອັຟການີສຖານນັ້ນ.