ກະຊວງການຕ່າງປະເທດສະຫະລັດໄດ້ອອກຄຳເຕືອນກ່ຽວກັບການເດີນທາງໄປຍັງສາ ທາລະນະລັດປະຊາທິປະໄຕຄອງໂກແລະໄດ້ມີຄຳສັ່ງໃຫ້ບັນດາຄອບຄົວຂອງພວກເຈົ້າ ໜ້າທີ່ລັດຖະບານ ທີ່ປະຈຳການຢູ່ທີ່ນັ້ນ ໃຫ້ພາກັນຍົກຍ້າຍອອກຈາກປະເທດດັ່ງກ່າວ.
ຄຳເຕືອນ ກ່ຽວກັບການເດີນທາງ ເວົ້າວ່າ “ມີຄວາມເປັນໄປໄດ້ສູງ ໃນການທີ່ຈະເກີດຄວາມວຸ້ນວາຍຂຶ້ນຢູ່ໃນຫຼາຍໆເຂດຂອງນະຄອນ Kinshasa ແລະເມືອງສຳຄັນອື່ນໆ. Kinshasa ແມ່ນນະຄອນຫຼວງຂອງຄອງໂກ.
ຄຳເຕືອນເວົ້າວ່າ “ອັນເປັນຜົນເນື່ອງມາຈາກສະຖານະການທີ່ຊຸດໂຊມລົງ ສະມາຊິກໃນຄອບຄົວຂອງເຈົ້າໜ້າທີ່ລັດຖະບານສະຫະລັດ ຈຶ່ງໄດ້ຮັບຄຳສັ່ງ ໃຫ້ເດີນທາງອອກຈາກປະເທດດັ່ງກ່າວເລີ້ມແຕ່ວັນທີ 29 ກັນຍານີ້. ການເດີນທາງສ່ວນໃຫຍ່ຂອງພວກເຈົ້າໜ້າ ທີ່ສະຫະລັດ ໄປຍັງສາທາລະນະລັດປະຊາທິປະໄຕຄອງໂກ ແມ່ນໄດ້ຍຸຕິລົງແລ້ວ.”
ການປະທະກັນຢ່າງຮ້າຍແຮງ ໄດ້ລະເບີດຂຶ້ນຢູ່ໃນປະເທດ ຍ້ອນການກຳຕຳແໜ່ງຂອງປະທານາທິບໍດີ Joseph Kabila. ມື້ສຸດທ້າຍໃນຕຳແໜ່ງຂອງທ່ານຄວນຈະແມ່ນວັນທີ 19 ທັນວາ. ທ່ານໄດ້ປົກຄອງປະເທດມາແລ້ວສອງສະໄໝເລີ້ມແຕ່ປີ 2001. ລັດຖະທຳມະນູນໄດ້ຫ້າມບໍ່ໃຫ້ທ່ານເຂົ້ຮັບຕຳແໜ່ງເປັນສະໄໝທີສາມ. ແຕ່ແນວໃດກໍຕາມຄະນະກຳມາທິການເລືອກຕັ້ງຂອງປະເທດດັ່ງກ່າວເວົ້າວ່າ ຕົນບໍ່ສາມາດຈັດການເລືອກຕັ້ງໄດ້ຈົນເທົ່າປີ 2018.
ທ່ານ Kabila ບໍ່ໄດ້ຖະແຫຼງ ຢ່າງເປັນທາງການເທື່ອວ່າ ທ່ານຈະດຳເນີນການແບບໃດ. ພວກຕ້ອງຕິກ່າວວ່າ ທ່ານກຳລັງຫາທາງແກ່ຍາວ ການກຳອຳນາດຂອງທ່ານ ອອກໄປ ຕື່ມອີກ.
ການປະທ້ວງຢ່າງຮຸນແຮງ ກ່ຽວກັບການເລື່ອນເວລາ ໃນການເລືອກຕັ້ງ ພາໃຫ້ເກີດມີ ຄວາມຢ້ານກົວວ່າ ປະເທດດັ່ງກ່າວອາດຈະກາຍເປັນອີກປະເທດນຶ່ງທີ່ໄດ້ເກີດຄວາມ ວຸ້ນວາຍແລະວິກິດການທາງດ້ານການເມືອງທີ່ຮຸນແຮງ. ພວກນັກການທູດກ່າວວ່າບັນ ດາປະເທດເພື່ອນບ້ານຈຳເປັນຕ້ອງໄດ້ເພີ້ມການດຳເນີນຄວາມພະຍາຍາມແລະຊຸກຍູ້ ໃຫ້ມີີການເຈລະຈາກັນ ເພື່ອເຮັດໃຫ້ສະພາບການບໍ່ໄປບໍ່ມາດັ່ງກ່າວນີ້ຍຸຕິລົງ.
ບັນດາກຸ່ມປົກປ້ອງສິດທິມະນຸດ ກ່າວວ່າ ລັດຖະບານສາທາລະນະລັດປະຊາທິປະໄຕ ຄອງໂກ ໄດ້ທຳການປາບປາມພວກຄັດຄ້ານ ໂດຍທຳການຈຳຄຸກພວກນັກເຄື່ອນໄຫວ ແລະປາບປາມການປະທ້ວງດ້ວຍການໃຊ້ຄວາມຮຸນແຮງ.