ສະຫະລັດກ່າວວ່າ ຕົນຈະເປີດການເຈລະຈາຄືນໃໝ່ກັບອີຣ່ານ ກ່ຽວກັບໂຄງການນີວ
ເຄລຍ ທີ່ເປັນບັນຫາຖົກຖຽງໂຕ້ແຍ້ງກັນນັ້ນ ຖ້າວ່າເຕຫະຣ່ານຫາກມີຄວາມຈິງໃຈແທ້
ກ່ຽວກັບການເຈລະຈາແບບເປີດເຜີຍ.
ໂຄສົກກະຊວງການຕ່າງປະເທດສະຫະລັດ ທ່ານນາງ Victoria Nuland ກ່າວໃນວັນ
ມື້ພຸດວ່າ ມັນຂື້ນກັບອີຣ່ານ ທີ່ຈະກັບຄືນເຂົ້າຮ່ວມການເຈລະຈາກັບຫ້າປະເທດສະມາ
ຊິກຖາວອນຂອງສະພາຄວາມໝັ້ນຄົງອົງການສະຫະປະຊາຊາດແລະເຢຍຣະມັນ ຊຶ່ງ
ເປັນກຸ່ມທີ່ຮ້ອງກັນວ່າ P5+1. ຄະນະດັ່ງກ່າວໄດ້ພົບພໍ້ກັນເທື່ອຫຼັງສຸດໃນປີແລ້ວນີ້.
ນັກການເມືອງຄົນນື່ງຂອງອີຣ່ານກ່າວວ່າ ປະທານາທິບໍດີສະຫະຣັດ ທ່ານບາຣັກ
ໂອບາມາ ໄດ້ສົ່ງສານໄປຫາ ອີຣ່ານ ຮ້ອງຂໍໃຫ້ມີການເຈລະຈາໂດຍຕົງ.
ແຕ່ວ່າລັດຖະບານທ່ານໂອບາມາ ບໍ່ໄດ້ໃຫ້ການຢຶຶນຢັນກ່ຽວກັບການຕິດຕໍ່ດັ່ງກ່າວນີ້.
ໂຄສົກທໍານຽບຂາວ ທ່ານ Jay Carney ກ່າວໃນມື້ວັນພຸດວ່າ ການຕິດຕໍ່ໃດໆກໍຕາມ
ທີ່ໄດ້ມີຂຶ້ນຫຼືອາດມີຂຶ້ນ ແມ່ນຄືກັນ ບໍ່ວ່າໃນທາງສ່ວນຕົວຫຼືເປີດເຜີຍກໍດີ ແລະເສັ້ນທາງ
ໃນຂັ້ນຕໍ່ໄປ ກໍຄືຜ່ານການເຈລະຈາຫຼາຍຝ່າຍ.