ເຈົ້າໜ້າທີ່ສະຫະລັດ ແລະເມັກຊິໂກ ພົບປະກັນໃນວັນພຸດວານນີ້ ຢູ່ທີ່ນະຄອນ ຫຼວງເມັກຊິໂກຊິຕີ້ ໂດຍຫາລືກັນວ່າຈະເຮັດແນວໃດ ເພື່ອຈະຫຼຸດຈໍານວນທີ່ເພີ້ມຂຶ້ນຂອງພວກຍົກຍ້າຍຖິ່ນຖານ ຢູ່ຕາມຊາຍແດນຮ່ວມກັນຂອງທັງສອງປະເທດ, ເຊິ່ງເປັນບ່ອນທີ່ມີການຂ້າມຊາຍແດນທີ່ຜິດກົດໝາຍ ເຂົ້າມາໃນສະຫະລັດຫຼາຍຮອດ 10,000 ຄົນໃນທຸກໆມື້ ຂອງເດືອນທັນວານີ້.
ທັງສອງຝ່າຍ, ເຊິ່ງນຳໂດຍລັດຖະມົນຕີການຕ່າງປະເທດສະຫະລັດ ທ່ານແອນໂທນີ ບລິງເກັນ ແລະ ປະທານາທິບໍດີເມັກຊິໂກ ທ່ານອັນເດຣສ ມານູເອລ ໂລເປສ ໂອບຣາດໍ (Andrés Manuel López Obrador) ພົບປະຫາລືກັນເປັນເວລາປະມານ 2 ຊົ່ວໂມງ.
ເຈົ້າໜ້າທີ່ລັດຖະບານຂັ້ນສູງຂອງທ່ານໄບເດັນ ກ່າວຕໍ່ບັນດານັກຂ່າວວ່າ ຜູ້ນໍາຂອງເມັກຊິໂກ ກ່າວຕໍ່ຄະນະຜູ້ແທນສະຫະລັດກ່ຽວກັບມາດຕະການໃໝ່ທີ່ເມັກຊິໂກກຳລັງດໍາເນີນການຢູ່, ລວມທັງການປາບປາມພວກລັກລອບຄ້າມະນຸດ ທີ່ຂົນເອົາພວກອົບພະຍົບຂຶ້ນລົດໄຟ ຫຼື ລົດໂດຍສານ ເພື່ອມຸ່ງໜ້າມາບໍລິເວນຊາຍແດນ.
ເຈົ້າໜ້າທີ່ກ່າວວ່າ “ພວກເຮົາປະທັບໃຈຫຼາຍກັບປະຕິບັດການອັນໃໝ່ທີ່ເມັກຊິໂກກໍາລັງດຳເນີນງານຢູ່, ແລະພວກເຮົາກໍເຫັນໄດ້ ໃນຫຼາຍໆມື້ທີ່ຜ່ານມາວ່າ ການຂ້າມຊາຍແດນ ໄດ້ຫຼຸດລົງມາຫຼາຍ.
ທ່ານໂລເປສ ໂອບຣາດໍ ກ່າວໃນສື່ສັງຄົມໃນຕອນແລງວັນພຸດວານນີ້ວ່າ “ບັນລຸເປົ້າໝາຍຕາມຂໍ້ຕົກລົງທີ່ສຳຄັນ” ເພື່ອໃຫ້ເກີດຜົນປະໂຫຍດແກ່ທັງສອງປະເທດ ແລະປະຊາຊົນຂອງພວກເຂົາເຈົ້າ, ແຕ່ທ່ານບໍ່ໄດ້ໃຫ້ລາຍລະອຽດທີ່ສະເພາະເຈາະຈົງໃດໆ ກ່ຽວກັບຂໍ້ຕົກລົງດັ່ງກ່າວ.