ລັດຖະມົນຕີກະຊວງການເງິນຂອງສະຫະລັດ ທ່ານນາງ ເຈເນັດ ເຢລເລັນ ກ່າວໃນວັນອັງຄານວານນີ້ວ່າ ຜູ້ນຳ ສະຫະລັດ ແລະ ຢູໂຣບ ຕ້ອງດຳເນີນການກ່ຽວກັບນະໂຍບາຍອຸດສາຫະກຳຂອງ ຈີນ ທີ່ເຮັດໃຫ້ເກີດໄພຂົ່ມຂູ່ຕໍ່ອຸດສາຫະກຳພະລັງງານສະອາດຢູ່ໃນທົ່ວໂລກ.
ທ່ານນາງກ່າວໃນລະຫວ່າງກ່າວປາໄສຢູ່ນະຄອນ ແຟຣງເຝີດ ວ່າ “ປັດຈຸບັນ ຄວາມອາດສາມາດທາງດ້ານອຸດສາຫະກໍາຂອງຈີນ ແມ່ນນໍາໄປສູ່ການຜະລິດທີ່ເກີນຄວາມຕ້ອງການໃນທົ່ວໂລກ ໃນຂະແໜງການທີ່ສໍາຄັນຕ່າງໆ ລວມທັງຂະແໜງຍານພາຫະນະໄຟຟ້າ, ຫມໍ້ໄຟ lithium-ion ແລະຂະແໜງພະລັງງານແສງຕາເວັນ.”
ທ່ານນາງ ເຢລເລັນ ກ່າວວ່າ ທ່ານນາງ ແລະປະທານາທິບໍດີສະຫະລັດ ທ່ານ ໂຈ ໄບເດັນ ຈະດໍາເນີນງານເພື່ອປົກປ້ອງບັນດາພະນັກງານ ແລະບໍລິສັດຕ່າງໆໃນບັນດາພາກຂະແໜງການຍຸດທະສາດ.
ທ່ານນາງ ເຢລເລັນ ກ່າວໃນນະຄອນຂອງເຢຍຣະມັນວ່າ “ນະໂຍບາຍດ້ານອຸດສາຫະກຳຂອງຈີນ ອາດເບິ່ງຄືວ່າຢູ່ຫ່າງໄກ ໃນຂະນະທີ່ພວກເຮົານັ່ງຢູ່ໃນຫ້ອງນີ້, ແຕ່ຖ້າຫາກພວກເຮົາຫາກບໍ່ຕອບໂຕ້ແບບມີຍຸດທະສາດ ແລະເປັນເອກະພາບກັນ, ຄວາມຢູ່ລອດຂອງບັນດາທຸລະກິດຂອງທັງສອງປະເທດພວກເຮົາ ແລະ ໃນທົ່ວໂລກ ອາດຢູ່ໃນຄວາມສ່ຽງ.”
ທ່ານນາງ ເຢລເລັນ ໄດ້ອອກມາເຕືອນເຈົ້າໜ້າທີ່ຈີນໃນເດືອນເມສາທີ່ຜ່ານມາວ່າ ສະຫະລັດ ຈະບໍ່ຍອມຮັບການຜະລິດທີ່ເກີນຄວາມຕ້ອງການຂອງສິນຄ້າລາຄາຕໍ່າກວ່າຄວາມເປັນຈິງ ທີ່ກໍາລັງຖ້ວມລົ້ນຢູ່ໃນຕະຫຼາດໂລກຂະນະນີ້.
ທ່ານນາງ ເຢລເລັນ ກ່າວຕໍ່ບັນດານັກຂ່າວໃນເດືອນແລ້ວນີ້ວ່າ “ພວກເຮົາເຄີຍເຫັນເລື່ອງນີ້ມາກ່ອນແລ້ວ. ເປັນເວລາຫຼາຍກວ່າທົດສະວັດຜ່ານມາ, ການສະຫນັບສະຫນູນຢ່າງຫຼວງຫຼາຍຂອງລັດຖະບານ ຂອງ ສປ ຈີນ ຫຼື PRC ເຮັດໃຫ້ເຫຼັກກ້າຂອງຈີນທີ່ມີລາຄາຖືກກວ່າ ຖ້ວມລົ້ນຢູ່ໃນຕະຫຼາດໂລກ ແລະສົ່ງຜົນເຮັດໃຫ້ອຸດສາຫະກໍາຕ່າງໆຢູ່ໃນທົ່ວໂລກ ແລະ ສະຫະລັດ ຊຸດໂຊມລົງ.”
ທ່ານນາງກ່າວຕື່ມວ່າ ທ່ານ ໄບເດັນ “ຈະບໍ່ຍອມຮັບຄວາມເປັນຈິງນັ້ນອີກຄັ້ງ.” ເຊັ່ນກັນ.
ລັດຖະບານ ທ່ານ ໄບເດັນ ໄດ້ປະກາດອັດຕາພາສີໃຫມ່ຕໍ່ອຸດສາຫະກໍາຍຸດທະສາດຂອງຈີນໃນອາທິດທີ່ຜ່ານມາ ລວມມີພາສີກ່ຽວກັບ ເຫຼັກກ້າ, ພະລັງງານແສງຕາເວັນ, ຍານພາຫະນະໄຟຟ້າ ແລະຊິ້ນສ່ວນຕ່າງໆຂອງຫມໍ້ໄຟ.