ສະຕີໝາຍເລກນຶ່ງຂອງສະຫະລັດ ທ່ານນາງ Michelle Obama
ອອກເດີນທາງໄປຢ້ຽມຢາມສອງປະເທດໃນເອເຊຍ ຍີ່ປຸນແລະກຳ
ປູເຈຍ ເປັນເວລາ 5 ມື້ ຄືຈາກວັນທີ 18 ຫາ 22 ເດືອນມີນານີ້ ເພື່ອ
ເຜີຍແຜ່ໂຄງການລິເລີ້ມ "Let Girls Learn" ຫລື “ປ່ອຍໃຫ້ເດັກ
ນ້ອຍແມ່ຍິງໄດ້ຮ່ຳຮຽນ” ຂອງລັດຖະບານໂອບາມາ ທີ່ມີເປົ້າໝາຍ
ສົ່ງເສີມການສຶກສາຂອງເດັກນ້ອຍແມ່ຍິງ ຫລາຍລ້ານຄົນ ໃນທົ່ວ
ໂລກ. ຜູ້ສື່ຂ່າວວີໂອເອ Victor Beattie ລາຍງານມາວ່າ ທັງທ່ານ
ນາງ Michelle ແລະປະທານາທິບໍດີ ໂອບາມາ ໄດ້ເຕືອນວ່າ
ເລື້ອງຄວາມບໍ່ສາມາດ ບໍ່ມີໂອກາດໄດ້ເຂົ້າຮຽນໜັງສືຂອງເດັກ
ນ້ອຍ ຈຳນວນ 62 ລ້ານຄົນໃນທົ່ວໂລກນັ້ນ ຄວນຈະຖືເປັນບຸລິມະ
ສິດອັນດັບສູງອັນນຶ່ງຂອງນະໂຍບາຍຕ່າງປະເທດ. ດາຣາມີລາຍ
ລະອຽດມາສະເໜີທ່ານ ໃນອັນດັບຕໍ່ໄປ.
Your browser doesn’t support HTML5
ຟັງລາຍງານ ການຢ້ຽມຢາມເອເຊຍ ຂອງທ່ານນາງ Michelle Obama
ສະຕີໝາຍເລກນຶ່ງຂອງສະຫະລັດ ຂຽນລົງໃນໜັງສືພິມ The Wall Street Journal ເມື່ອ
ວັນທີ 15 ມີນານີ້ວ່າ ເລື້ອງທີ່ວ່າມີເດັກນ້ອຍແມ່ຍິງຫລາຍສິບລ້ານຄົນ ບໍ່ໄດ້ຮັບການສຶກສາ
ຢ່າງພຽງພໍນັ້ນ ບໍ່ໄດ້ເປັນພຽງແຕ່ “ການ ສູນເສຍຄວາມສາມາດບົ່ມຊ້ອນຂອງມະນຸດໄປ
ໂດຍເປົ່າປະໂຫຍດ ຢ່າງໜ້າເສົ້າສະລົດໃຈເທົ່ານັ້ນ ແຕ່ມັນຍັງເປັນການທ້າທາຍດ້ານສາທາລະນະສຸກທີ່ຮ້າຍແຮງຢ່າງນຶ່ງ ເປັນການຖ່ວງດຶງຕໍ່ເສດຖະກິດຂອງຊາດ ກໍຄື
ຄວາມຈະເລີນຮຸ່ງເຮືອງຂອງ ໂລກ ແລະເປັນໄພຂົ່ມຂູ່ຕໍ່ຄວາມໝັ້ນຄົງຂອງບັນດາປະ
ເທດໃນທົ່ວໂລກນຳ.”
ທ່ານ ນາງ Michelle Obama ກ່າວວ່າ ມາຮອດປີ 2012 ນັ້ນທຸກໆຂົງເຂດພວມພັດທະ
ນາຂອງໂລກ ແມ່ນໄດ້ບັນລຸ ຫລືບໍ່ກໍໃກ້ຈະບັນລຸ ຄວາມສະເໝີພາບທາງເພດ ໃນລະດັບ
ການສຶກສາຂັ້ນປະຖົມ. ແຕ່ວ່າ ຊ່ອງຫວ່າງທາງເພດແມ່ນຍັງມີຢູ່ ໃນລະດັບການສຶກສາຂັ້ນມັດທະຍົມ ຊຶ່ງໃນລະດັບນີ້ ພວກເດັກຍິງແມ່ນຕົກຢູ່ພາຍໃຕ້ "ຄຸນຄ່າທາງວັດທະນະທໍາ
ແລະພາກປະຕິບັດຕ່າງໆ ທີ່ກໍານົດແລະຈຳກັດ ໂອກາດຂອງແມ່ຍິງຢູ່ໃນສັງຄົມຂອງພວກ
ເຂົາເຈົ້າ."
ໃນງານເປີດຕົວ ການປຸກລະດົມ "Let Girls Learn" ຫລື “ປ່ອຍໃຫ້ເດັກນ້ອຍແມ່ຍິງໄດ້ຮ່ຳຮຽນ” ເມື່ອວັນທີ 3 ຕົ້ນເດືອນນີ້ ທ່ານນາງໂອ ບາມາກ່າວວ່າ ໜ່ວຍສັນຕິພາບ
ຫລື Peace Corps ຊຶ່ງເປັນອົງການ ອາສາສະໝັກເພື່ອການພັດທະນາ ທີ່ໄດ້ທຶນຈາກລັດຖະບານສະຫະລັດ ຈະຫລິ້ນບົດບາດທີ່ສຳຄັນ:
Map showing destinations of Michelle Obama's trip to Asia
ທ່ານ ນາງໂອບາມາກ່າວວ່າ “ຄວາມພະຍາຍາມນີ້ ຈະນໍາໃຊ້
ຄວາມສາມາດແລະພະລັງງານຂອງພວກອາສາສະໝັກຂອງ
ໜ່ວຍສັນຕິພາບ ເກືອບ 7 ພັນຄົນ ທີ່ຮັບໃຊ້ຢູ່ໃນຫລາຍກ່ວາ
60 ປະເທດ. ຜ່ານຄວາມພະຍາຍາມນີ້ ໜ່ວຍສັນຕິພາບແມ່ນ
ຈະໃຫ້ການສະໜັບສະໜຸນຊ່ວຍເຫລືອແກ່ ຫລາຍຮ້ອຍໂຄງ
ການໃໝ່ໆຂອງປະຊາຄົມ ເພື່ອຊ່ວຍໃຫ້ພວກເດັກຍິງໄດ້ໄປ
ໂຮງຮຽນ ແລະໄດ້ເຂົ້າໂຮງຮຽນຕໍ່ໄປ. ແລະຂ້າພະເຈົ້າຢາກ
ຈະເນ້ນວ່າ ພວກໂຄງການເຫລົ່ານີ້ຈະເປັນໂຄງການທີ່ ປະຊາ
ຄົມຫລືຊຸມຊົນ ເປັນຜູ້ກໍ່ຕັ້ງຂຶ້ນມາແລະນຳພາ. ມັນຈະອິງໃສ່
ວິທີແກ້ໄຂບັນຫານີ້ ທີ່ບັນດາຜູ້ນຳທ້ອງຖິ່ນ ຄອບຄົວ ແລະຮອດພວກເດັກຍິງເອງ
ເປັນຜູ້ຄິດຂຶ້ນມາ.”
ໃນງານດຽວກັນນີ້ ປະທານາທິບໍດີໂອບາມາກ່າວວ່າ ລັດຖະບານຂອງທ່ານກຳລັງເຮັດໃຫ້
ເປັນທີ່ແຈ່ມແຈ້ງ ແກ່ພວກປະເທດພາຄີທັງຫລາຍວ່າ ເລື້ອງນີ້ແມ່ນເປັນບຸລິມະສິດອັນນຶ່ງ
ຂອງນະໂຍບາຍຕ່າງປະເທດ.
ທ່ານໂອບາມາກ່າວວ່າ “ພວກເຮົາຮູ້ວ່າ ເວລາພວກເດັກຍິງໄດ້ຮັບການສຶກສານັ້ນ
ມີທາງເປັນໄປໄດ້ຫລາຍກ່ວາວ່າ ພວກເຂົາຈະບໍ່ແຕ່ງງານ ໄວ. ເພາະສະນັ້ນ
ພວກລູກໆຂອງເຂົາໃນອະນາຄົດ ກໍມີທາງຫລາຍຂຶ້ນ ທີ່ຈະມີສຸຂະພາບດີແລະ
ໄດ້ກິນອາຫານດີ. ຄ່າແຮງງານທີ່ພວກເຂົາ ຈະໄດ້ຮັບໃນອະນາຄົດ ແມ່ນຈະສູງ
ຂຶ້ນ ຊຶ່ງກໍຈະສົ່ງຜົນໃຫ້ຄອບຄົວຂອງພວກເຂົາມີຄວາມໝັ້ນຄົງຫລາຍຂຶ້ນ ແລະ
ການເຕີບໂຕຂອງຊາດ ກໍຈະໄດ້ຮັບການຊຸກຍູ້ໃຫ້ສູງຂຶ້ນ. ໃນແງ່ຂອງການເມືອງ
ແລະຄວາມໝັ້ນຄົງນັ້ນ ບ່ອນໃດທີ່ພວກແມ່ຍິງແລະເດັກຍິງໄດ້ຮັບການປະຕິບັດ
ຕໍ່ ໃນຖານະເປັນພົນລະເມືອງໂດຍເຕັມແລະເທົ່າທຽມກັນແລ້ວ ບ່ອນນັ້ນກໍມັກ
ຈະມີສະຖຽນລະພາບຫລາຍກ່ວາ ແລະມີປະຊາທິປະໄຕຫລາຍກ່ວາ. ສະນັ້ນ
ເລື້ອງນີ້ ຈຶ່ງບໍ່ແມ່ນພຽງບັນຫາດ້ານມະນຸດສະທຳ ມັນເປັນບັນຫາທາງເສດຖະ
ກິດ ແລະບັນຫາດ້ານຄວາມໝັ້ນຄົງ ແລະເພາະສະນັ້ນ ມັນຈຶ່ງເປັນບຸລິມມະສິດ
ອັນນຶ່ງ ຂອງນະໂຍບາຍຕ່າງປະເທດ.”
ທ່ານນາງໂອບາມາໄດ້ຢຸດແວ່ທີ່ຍີ່ປຸ່ນກ່ອນ ບ່ອນທີ່ທ່ານນາງໄດ້ພົບປະກັບນາຍົກລັດຖະ
ມົນຕີ Shinzo Abe ແລະທ່ານນາງ Akie ພັນລະຍາຂອງທ່ານ Abe. ໜ່ວຍສັນຕິພາບ
Peace Corps ຂອງສະຫະລັດ ກັບອົງການຄູ່ຕຳແໜ່ງ ກໍຄື ອົງການ Overseas Cooperation Volunteers ຫລື ໜ່ວຍອາສາສະໝັກຮ່ວມມືໃນຕ່າງປະເທດ ຂອງຍີ່ປຸນ
ຈະທຳງານຮ່ວມກັນ ກ່ຽວກັບການປຸກລະດົມໃນເລື້ອງນີ້.
ກ່ອນອອກຈາກຍີ່ປຸ່ນ ທ່ານນາງ Obama ຈະໄປຢ້ຽມຢາມນະຄອນ Kyoto ເພື່ອຊົມວັດສາສະໜາພຸດ ແລະສາສະໜາ Shinto.
Your browser doesn’t support HTML5
Michelle Obama Japan
ຜູ້ອຳນວຍການອາວຸໂສຝ່າຍກິດຈະການເອເຊຍ ຂອງສະພາຄວາມໝັ້ນຄົງແຫ່ງຊາດສະຫະລັດ ທ່ານ Evan Medeiros ກ່າວວ່າ ຢູ່ກຳປູເຈຍນັ້ນ ທ່ານນາງ Obama ຈະເວົ້າ
ເຖິງເລື້ອງຄວາມຈຳເປັນໃນການມີລະບົບການເມືອງ ທີ່ເປີດກ້ວາງແລະຮວມເອົາທຸກພັກ
ຝ່າຍ ແລະໃນການອະນຸຍາດໃຫ້ສັງຄົມພົນລະເມືອງ ໄດ້ມີບົດບາດໃນການປົກຄອງທີ່ດີ.
ທ່ານ Phil Robertson ຜູ້ອຳນວຍການປະຈຳເອເຊຍ ຂອງກຸ່ມ Human Rights Watch ກ່າວວ່າ ໃນເລື້ອງການສຶກສາຂອງເດັກຍິງນັ້ນ ກຳປູເຈຍແມ່ນຍັງກຳລັງພະຍາຍາມຢ່າງໜັກຢູ່.
ທ່ານ Phil Robertson ກ່າວວ່າ “ແລະ ຄວາມຈິງແລ້ວ ພວກເຮົາຫາກໍເປີດເຜີຍ
ລາຍງານສະບັບນຶ່ງເມື່ອອາທິດແລ້ວນີ້ ກ່ຽວກັບພວກແມ່ຍິງກັບເດັກສາວ ຢູ່ໃນ
ພາກສ່ວນຕັດຫຍິບ ຊຶ່ງເປັນອຸດສາຫະກຳສົ່ງອອກທີ່ສຳຄັນຂອງກຳປູເຈຍ ແລະ
ຫລາຍກ່ວາ 92 ສ່ວນຮ້ອຍຂອງໜ່ວຍແຮງງານໃນອຸດສາຫະກຳນັ້ນ ແມ່ນແມ່ຍິງ
ແລະເດັກສາວ. ພວກເຮົາພົບວ່າ ມີການລະເມີດສິດທິຢ່າງເປັນລະບົບ ຢູ່ໃນພວກ
ໂຮງງານຕັດຫຍິບຂອງ ກຳປູເຈຍ ທີ່ຜະລິດສິນຄ້າສົ່ງໄປໃຫ້ບໍລິສັດຕ່າງໆ ເຊັ່ນ
Gap ແລະບໍລິສັດອື່ນໆຢູ່ຕ່າງປະເທດ ແລະບັນຫາທີ່ພວກເຮົາພົບເຫັນ ກໍແມ່ນ
ພວກເດັກສາວທີ່ໄປເຮັດວຽກຢູ່ໂຮງຈັກໂຮງງານເຫລົ່າ ຈະດ້ວຍເຈດຕະນາແລະ
ຈຸດປະສົງອັນໃດກໍຕາມ ມັນໝາຍເຖິງຈຸດອາວະສານຂອງ ການສຶກສາຂອງພວກ
ເຂົາເຈົ້າ.”
ກຳປູເຈຍແມ່ນນຶ່ງໃນ 11 ປະເທດ ທີ່ປະກອບສ່ວນໃນການປຸກລະດົມ Let Girls Learn
ຊຶ່ງນອກນັ້ນແລ້ວ ກໍມີປະເທດ Albania, Benin, Burkina Faso, Georgia, Ghana, Moldova, Mongolia, Mozambique, Togo ແລະ Uganda.
ທ່ານນາງ Michelle Obama ຊຶ່ງເປັນສະຕີໝາຍເລກນຶ່ງ ຄົນທຳອິດຂອງສະຫະລັດ ທີ່
ໄປຢ້ຽມຢາມກຳປູເຈຍ ມີກຳໜົດຈະເດີນທາງໄປຍັງເມືອງ Siem Reap ຊຶ່ງຢູ່ທີ່ນັ້ນທ່ານ
ນາງຈະໄດ້ພົບປະກັບຄູ່ຕຳແໜ່ງ ກຳປູເຈຍ ທ່ານນາງ Bun Rany ພັນລະຍາຂອງນາຍົກ
ລັດຖະມົນຕີ Hun Sen ແລະໂອ້ລົມກັບພວກນັກສຶກສາແລະອາສາສະໝັກ ແລະເບິ່ງ
ໂຄງການປະຊາຄົມຈຳນວນນຶ່ງ ທີ່ກ່າວກັນວ່າ ເສີມຂະຫຍາຍໂອກາດດ້ານການສຶກສາ
ຂອງພວກເດັກສາວ. ກ່ອນເດີນທາງກັບຄືນສູ່ວໍຊິງຕັນ ພັນລະຍາຂອງປະທານາທິບໍດີ
ໂອບາມາ ຈະໄປຊົມ ອັງກໍວັດ.
Your browser doesn’t support HTML5
Michelle Obama Japan