ພວກເຮົາໄດ້ ໂຕຊະນະເລີດແລ້ວ ໃນການປະກວດໝີຕຸ້ຍຂອງລັດອາລາສກາ! ໝີຊື່ວ່າ ເກຣເຊີ (Grazer) ໄດ້ຮັບໄຊຊະນະດ້ວຍຄະແນນສຽງທີ່ນິຍົມຊົມຊອບ ໃນວັນອັງຄານວານນີ້ ເຊິ່ງເອົາຊະນະໝີທີ່ມີຊື່ວ່າ ຊັ້ງ (Chunk). ດ້ວຍໄຊຊະນະໃນຄັ້ງນີ້ ໝີໂຕແມ່ ກໍແກ້ແຄ້ນໃນການເສຍຊີວິດຂອງລູກໝີນາງ ໂດຍນ້ຳມືຂອງໝີໂຕຜູ້ຂະໜາດໃຫຍ່ທີ່ມີນ້ຳໜັກເຖິງ 544 ກິໂລກຣາມ ເມື່ອລະດູຮ້ອນທີ່ຜ່ານມານີ້ ທີ່ແມ່ນ້ຳ ບຣຸກສ໌ ຢູ່ພາຍໃນສວນອຸດທະຍານແລະປ່າສະຫງວນແຫ່ງຊາດ ແຄັດມາຍ (Katmai) ຂອງລັດອາລາສກາ.
ເທື່ອນີ້ ເປັນການເອົາຊະນະ ຊັ້ງ ຄັ້ງທີສອງຢ່າງຂາດລອຍຂອງ ເກຣເຊີ ໃນການປະກວດເຊິ່ງມີບັນດາແຟນໆ ໄດ້ພາກັນປ່ອນບັດລົງຄະແນນໃຫ້ແກ່ໝີທີ່ພວກເຂົາເຈົ້າເຊື່ອວ່າ ເປັນຕົວຢ່າງທີ່ດີທີ່ສຸດໃນການກຽມພ້ອມສຳລັບລະດູໜາວທີ່ໃກ້ຈະມາເຖິງນີ້ ໂດຍທີ່ພວກໝີດັ່ງກ່າວ ສະສົມເອົາໄຂມັນໄວ້ຕະຫຼອດໄລຍະລະດູຮ້ອນ. ການປະກວດປະຈຳປີຄັ້ງນີ້ ເປັນພິທີນຶ່ງໃນການສະເຫຼີມສະຫຼອງຄວາມມຸ້ງໝັ້ນຂອງພວກໝີສີນ້ຳຕານ 2,200 ໂຕ ທີ່ດຳລົງຊີວິດໃນປ່າສະຫງວນແຫ່ງຊາດຢູ່ແຫຼມຂອງລັດອາລາສກາ.