ບັນດາເຈົ້າໜ້າທີ່ຝ່າຍສໍາຫລວດທາງທໍລະນີວິທະຍາສະຫະລັດກ່າວວ່າແຜ່ນດິນໄຫວທີ່ມີຄວາມແຮງ 5.8 ຣິກເຕີ ໃນວັນອັງຄານວານນີ້ເປັນແຜ່ນດິນໄຫວທີຄວາມແຮງສຸດທີ່ໄດ້ເກີດຂຶ້ນໃນພາກຕາເວັນອອກຂອງສະຫະລັດນັບແຕ່ປີ 1944 ເປັນຕົ້ນມາ.
ແຜ່ນດິນໄຫວທີ່ມີຈຸດໃຈກາງໃນເມືອງ Mineral ຊຶ່ງເປັນເມືອງນ້ອຍໆແຫ່ງນຶ່ງໃນລັດ Virgi
nia ໄດ້ເຮັດໃຫ້ບ້ານເຮືອນສັ່ນສະເທືອນໄປໄກເຖິງນະຄອນຫລວງ Ottawa ຂອງການາດາ
ແລະເຮັດໃຫ້ມີການຍົກ ຍ້າຍລູກຄ້າແລະພະນັກງານອອກຈາກຮ້ານຄ້າຮ້ານຂາຍແລະທຸລະ
ກິດຢູ່ຕາມຫົວເມືອງໃຫຍ່ແຫ່ງຕ່າງໆໃນທົ່ວຂົງເຂດ.
ທີ່ກຸງວໍຊິງຕັນ ຊຶ່ງຕັ້ງຢູ່ຫ່າງຈາກຈຸດໃຈກາງແຜ່ນດິນໄຫວມາທາງທິດເໜືອ 144 ຫລັກກິໂລ
ແມັດ ສະຖານທີ່ທ່ອງທ່ຽວແລະອະນຸສາວະລີ ແຫ່ງຕ່າງໆໄດ້ອັດລົງ ໃນຂະນະທີ່ພວກນັກ
ກວດກາທໍາການປະເມີນຄວາມເສຍຫາຍນັ້ນ.
ບັນດາເຈົ້າໜ້າທີ່ກ່າວວ່າ ອະນຸສາວະລີວໍຊິງຕັນຊຶ່ງເປັນອະນຸສາວະລີສີ່ຫລ່ຽມຍອດແຫລມ
ສູງ 170 ແມັດ ຕັ້ງຢູ່ໃນສະໜາມຫລວງ ຫລືNational Mall ໄດ້ອັດລົງໂດຍບໍ່ມີກໍານົດ
ຫລັງຈາກພົບເຫັນຮອຍແຫງຫລາຍບ່ອນຢູ່ເທິງຍອດອະນຸສາວະລີນັ້ນ. ໂບດໃຫຍ່ແຫ່ງຊາດ
ທີ່ກຸງວໍຊິງຕັນ ຫລື Washington National Cathedral ກໍໄດ້ອັດລົງເຊ່ນກັນສໍາລັບ
ພວກນັກທ່ອງທ່ຽວຫລັງຈາກຍອດໂບດ 3 ຍອດໃນຈໍານວນທັງໝົດ 4 ຍອດ ໄດ້ຮັບ
ຄວາມເສຍຫາຍ.
ທາງການໄດ້ອົບພະຍົບພວກຜູ້ຄົນອອກຈາກຕຶກລັດຖະສະພາສະຫະລັດ ຈາກທໍານຽບຫ້າ
ແຈ ກະຊວງປ້ອງກັນປະເທດແລະຈາກພວກຕຶກອາຄານແຫ່ງຕ່າງໆຂອງລັດຖະບານ ຮວມ
ທັງຕຶກອາຄານສໍານັກງານໃຫຍ່ຂອງວິທະຍຸວີໂອເອຊຶ່ງໄດ້ອັດການອອກອາກາດລົງເປັນ
ການຊົ່ວຄາວຫລັງແຜ່ນດິນເລີ້ມສັ່ນສະເທືອນນັ້ນ.
ຢູ່ໃກ້ໆກັບຈຸດສູນກາງແຜ່ນດິນໄຫວ ໃນເຂດຊົນນະບົດແຫ່ງນຶ່ງໃນລັດ Virginia ສະຖາ
ນີພະລັງນີວເຄລຍ North Anna ກໍໄດ້ອັດລົງ ແລະຈໍາເປັນຕ້ອງແລ່ນເຄື່ອງປັ່ນໄຟຟ້າສໍາ
ຮອງທີ່ໃຊ້ນໍ້າມັນກາຊວນແລ່ນ ຊຶ່ງມີເຄື່ອງປັ່ນໄຟຟ້າໜ່ວຍນຶ່ງບໍ່ເດີນ. ບັນດາເຈົ້າໜ້າທີ່
ກ່າວວ່າ ປະຊາຊົນໃນເຂດດັ່ງກ່າວບໍ່ໄດ້ຕົກຢູ່ໃນສະພາບທີ່ເປັນອັນຕະລາຍແຕ່ຢ່າງໃດ
ແລະວ່າໂຮງໄຟຟ້າແຫ່ງນີ້ແມ່ນໄດ້ມີການອອກແບບເພື່ອໃຫ້ຕ້ານ ຢັນກັບຄວາມແຮງ
ຂອງແຜ່ນດິນໄຫວໄດ້ເຖິງ 6.2 ຣິກເຕີ.
ບໍ່ມີລາຍງານແຈ້ງໃຫ້ຊາບກ່ຽວກັບຄວາມເສຍທີ່ຮ້າຍແຮງຫລືມີຜູ້ບາດເຈັບລົ້ມຕາຍ ແຕ່
ບັນດາເຈົ້າໜ້າທີ່ເຕືອນວ່າ ມີທ່າທາງວ່າ ຈະມີແຜ່ນດິນໄຫວຂະໜາດບໍ່ແຮງປານໃດຕິດ
ຕາມມາໃນອີກຫລາຍມື້ຂ້າງໜ້ານີ້.