ປະທານາທິບໍດີສະຫະລັດທ່ານບາຣັກໂອບາມາຈະພົບປະກັນອີກກັບຜູ້ນຳຂອງລັດຖະສະພາ
ສະຫະລັດຢູ່ທີ່ທຳນຽບຂາວໃນວັນອັງຄານມື້ນີ້ ຫຼັງຈາກບໍ່ໄດ້ເກີດຄວາມກ້າວໜ້າໃນການເຈ
ລະຈາຫາລືກັນໃນມື້ວັນຈັນວານນີ້ ກ່ຽວກັບຂໍ້ຕົກລົງ ທີ່ຍັງບັນລຸກັນບໍ່ໄດ້ເພື່ອເພີ້ມຂີດຈຳກັດ ຂອງໜີ້ສິນຂອງຊາດນັ້ນ.
ກ່ອນທີ່ທັງສອງຝ່າຍຈະເຂົ້າຮ່ວມປະຊຸມກັນໃນມື້ວານນີ້ ທ່ານໂອບາມາໄດ້ກ່າວໃນກອງປະ
ຊຸມຖະແຫຼງຂ່າວທາງໂທລະພາບວ່າມັນເຖິງເວລາແລ້ວທີ່ຈະຕ້ອງຢຸດເຊົາຫຼິ້ນການເມືອງແລະ
ມາເຮັດຂໍ້ຕົກລົງກັນ. ທ່ານເວົ້າວ່າ ຍັງມີວຽກງານອີກຫຼາຍຢ່າງ ທີ່ຈະຕ້ອງໄດ້ກະທຳ ກ່ອນ
ວັນເສັ້ນຕາຍ ທີ 2 ສິງຫາ ຊຶ່ງສະຫະລັດຈະຜິດສັນຍາໃນການຊຳລະໜີ້ເປັນເທື່ອທຳອິດໃນ
ປະວັດສາດຂອງປະເທດ ຖ້າຫາກຕົກລົງກັນບໍ່ໄດ້.
ນອກນັ້ນ ທ່ານປະທານາທິບໍດີຍັງໄດ້ປະຕິເສດຕໍ່ທາງເລືອກອີກທາງນຶ່ງທີ່ສະເໜີໂດຍພັກຣີ
ພັບບລີກັນນັ້ນໂດຍກ່າວວ່າທ່ານຈະປະຕິເສດບໍ່ຍອມລົງນາມໃນມາດຕະການຊົ່ວຄາວໃດໆ ເພື່ອແກ້ໄຂວິກິດການໜີ້ສິນຂອງປະເທດນັ້ນ.
ປະທານສະພາຕໍ່າສະຫະລັດ ທ່ານ John Boehner ຊຶ່ງເປັນສະມາຊິກຂອງພັກຣີພັບບລີ
ກັນກ່າວໃນມື້ວັນຈັນວານນີ້ວ່າ ບໍ່ມີຮ່າງກົດໝາຍສະບັບໃດ ສາມາດຜ່ານສະພາຕໍ່າໄດ້ນອກ ຈາກວ່າຈະມີການຕັດການໃຊ້ຈ່າຍລົງແລະປະຕິເສດຕໍ່ການຂຶ້ນພາສີ. ພວກນິຍົມແນວທາງ
ເດີມກ່າວວ່າ ມັນບໍ່ມີຄວາມໝາຍຫຍັງເລີຍ ທີ່ຈະຂຶ້ນພາສີພວກຊາວອະເມຣິກັນ ທີ່ປະເທດ
ຊາດຄາດໝາຍໃຫ້ທຳການລົງທຶນຢູ່ໃນເສດຖະກິດແລະສ້າງວຽກເຮັດງານທຳນັ້ນ.
ລັດຖະມົນຕີກະຊວງການເງິນຂອງສະຫະລັດທ່ານ Timothy Geithner ກ່າວວ່າ ການບໍ່
ສາມາດເພີ່ມຂີດຈຳກັດຂຶ້ນ ຈາກຈໍານວນ 14 ພັນ 300 ຕື້ໂດລາ ສຳລັບກູ້ຢືມເງິນຢ່າງຖືກ
ຕ້ອງຕາມກົດໝາຍຂອງລັດຖະບານ ເພື່ອມາຈ່າຍໜີ້ນັ້ນ ຈະສ້າງຄວາມເສຍຫາຍຢ່າງຮ້າຍ
ແຮງຕໍ່ເສດຖະກິດຂອງສະຫະລັດ.