ສະພາຕໍ່າຂອງສະຫະລັດໄດ້ຮັບຜ່ານ ຮ່າງກົດໝາຍມູນຄ່າ 59 ພັນລ້ານໂດລາ ເພື່ອນຳໄປໃຊ້ ຈ່າຍໃນການເພີ້ມກຳລັງທະຫານ ຂອງປະທານາທິບໍດີ ບາຣັກ ໂອບາມາ ໃນອັຟການິສຖານ.
ໃນວັນອັງຄານວານນີ້ ສະມາຊິກສະພາຕໍ່າສະຫະລັດ ໄດ້ລົງຄະແນນສຽງ 308 ຕໍ່ 114 ເຫັນພ້ອມນຳ ຮ່າງກົດໝາຍ ຊຶ່ງບັດນີ້ ຈະຖືກສົ່ງໄປໃຫ້ ປະທານາທິບໍດີ ລົງນາມເປັນກົດໝາຍ. ຮວມຢູ່ໃນຮ່າງກົດໝາຍ ສະບັບນີ້ ກໍມີ 37 ພັນລ້ານໂດລາ ເພື່ອນຳໄປໃຊ້ຈ່າຍ ໃນການສົ່ງທະຫານຕື່ມອີກ 30 ພັນຄົນ ໄປເພີ້ມຢູ່ໃນອັຟການິສຖານ ແລະຄ່າໃຊ້ຈ່າຍອື່ນໆ ຢູ່ໃນອີຣັກ. ສະພາສູງສະຫະລັດ ໄດ້ຮັບຮອງເອົາ ຮ່າງກົດໝາຍສະບັບດັ່ງກ່າວນີ້ແລ້ວ.
ລັດຖະສະພາສະຫະລັດ ໄດ້ອະນຸມັດເງິນຫຼາຍກວ່າ 1 ພັນຕື້ໂດລາ ເພື່ອເຮັດສົງຄາມ ຢູ່ໃນອີຣັກ ແລະອັຟການິສຖານ ນັບແຕ່ປີ 2001 ເປັນຕົ້ນມາ.
ມີສະມາຊິກ ພັກເດໂມແຄຣັດ 100 ກ່ວາຄົນ ລົງຄະແນນສຽງ ບໍ່ເຫັນພ້ອມ ກັບຮ່າງກົດໝາຍສະບັບນີ້ ຊຶ່ງບາງທ່ານກ່າວວ່າ ການຮົ່ວໄຫຼ ຂອງເອກະສານລັບ ຫຼາຍສິບພັນໜ້າ ກ່ຽວກັບກອງທັບສະຫະລັດ ໂດຍເວັບໄຊທ໌ WIKILEAKS ແມ່ນໄດ້ເນັ້ນຢໍ້າ ຄວາມສົງໄສບໍ່ແນ່ໃຈ ຂອງພວກເຂົາເຈົ້າ ກ່ຽວກັບຄວາມກ້າວໜ້າ ໃນການເຮັດສົງຄາມ ຢູ່ໃນອັຟການິສຖານ.
ແຕ່ແນວໃດກໍຕາມ ຮ່າງກົດໝາຍສະບັບນີ້ ໄດ້ຮັບການສະໜັບສະໜຸນ ຢ່າງແຂງຂັນ ຈາກສະມາຊິກ ຂອງພັກຣີພັບບລີກັນ ຊຶ່ງມີພຽງ 12 ຄົນທໍ່ນັ້ນ ທີ່ລົງຄະແນນສຽງ ບໍ່ເຫັນພ້ອມນຳ.