ກຸ່ມລັດອິສລາມໄດ້ອ້າງວ່າ “ທະຫານ” ຂອງຕົນສອງຄົນ ເປັນຜູ້ທຳການໂຈມຕີໃນວັນອັງ ຄານວານນີ້ ຢູ່ວັດຄາໂທລິກ ໃນເມືອງ Normandy ປະເທດຝຣັ່ງ ບ່ອນທີ່ພວກເຂົາໄດ້ສັງຫານຄຸນພໍ່ອົງນຶ່ງ ຫລັງຈາກໄດ້ຈັບເພິ່ນ ເປັນໂຕປະກັນໂດຍການເອົາມີດຈີ້.
ສະຫະລັດ ໄດ້ປະນາມ “ດ້ວຍຄຳເວົ້າທີ່ແຮງສຸດ” ຕໍ່ການໂຈມຕີທີ່ “ໂຫດຮ້າຍ”ແລະໄດ້ສະແດງຄວາມເສົ້າສະຫລົດໃຈຕໍ່ຄອບຄົວ ແລະບັນດາໝູ່ເພື່ອນຂອງຄຸນ ພໍ່ Jacques Hamel ທີ່ໄດ້ຖືກຄົນຮ້າຍສັງຫານແລະບັນດາອອກຕົນຍາດໂຍມ ຂອງວັດ Saint-Etienne-du-Rouvray. ໂຄສົກ ສະພາຄວາມໝັ້ນຄົງແຫ່ງຊາດຂອງສະຫະລັດ ທ່ານ Ned Price ກ່າວວ່າ “ຝຣັ່ງ ແລະສະຫະລັດມີຄວາມໝັ້ນໝາຍຮ່ວມກັນ ທີ່ຈະປົກປ້ອງສິດເສລີພາບດ້ານສາສະໜາ ໃຫ້ແກ່ບັນດາຜູ້ເຊື່ອຖືຂອງທຸກໆສາສະໜາ ແລະຄວາມຮຸນແຮງມື້ນີ້ຈະບໍ່ເຮັດໃຫ້ຄວາມໝັ້ນໝາຍດັ່ງກ່າວສັ່ນຄອນ.
ປະທານາທິບໍດີຝຣັ່ງທ່ານ Francois Hollande ໄດ້ໄປຢ້ຽມຢາມບ່ອນທີ່ຖືກໂຈມຕີ ຊຶ່ງເປັນເມືອງໃນພາກເໜືອຂອງປະເທດ ໃນວັນອັງຄານວານນີ້ ແລະກ່າວວ່າ ພວກໂຈມຕີໄດ້ປະຕິຍານທີ່ຈະຈົງຮັກພັກດີຕໍ່ກຸ່ມລັດອິສລາມ ຫລື IS ກ່ອນຖືກຍິງຕາຍໂດຍຕຳຫລວດ.
ບັນດາເຈົ້າໜ້າທີ່ຕຳຫລວດຝຣັ່ງ ກ່າວວ່າ ຜູ້ໂຈມຕີສອງຄົນໄດ້ປາດຄໍຄຸນພໍ່ອາຍຸ 84 ປີ ກ່ອນຕຳຫລວດສາມາດເຂົ້າແຊກແຊງ. ປະທານາທິບໍດີ Hollande ໄດ້ປະນາມການສັງຫານນີ້ວ່າ ເປັນ “ການກໍ່ການຮ້າຍທີ່ປ່າເຖື່ອນ.”
ຕຳຫລວດກ່າວວ່າ ອີກຄົນນຶ່ງທີ່ໄດ້ຈັບໂຕປະກັນຢູ່ວັດດັ່ງກ່າວແມ່ນຢູ່ໃນສະພາບ “ເຄິ່ງຕາຍເຄິ່ງຍັງມີຊີວິດຢູ່” ຫລັງຈາກການໂຈມຕີ. ຕຳຫຼວດກ່າວວ່າ ພວກໂຈມຕີແມ່ນໃຜນັ້ນ ຍັງບໍ່ເປັນທີ່ຊາບໄດ້.
ພະສັນຕະປາປາ Francis ກໍໄດ້ປະນາມ ການໂຈມຕີຕໍ່ວັດສາສະໜາ Roman Catholic ດັ່ງກ່າວນີ້.
ອ່ານຂ່າວນີ້ເພີ້ມເປັນພາສາອັງກິດ