ຜູ້ນຳສອງປະເທດ ທີ່ສ້າງມົນລະພິດແກັສ ເຮືອນແກ້ວ ອັນດັບ
ສູງສຸດຂອງໂລກ ໄດ້ຕົກລົງກັນວ່າຈະເອົາບາດກ້າວຕ່າງໆ ເພື່ອ
ຈະຄວບຄຸມໃນການປ່ອຍອາຍພິດ ອອກມາສູ່ໂລກ. ສຳຫລັບ
ປະເທດຈີນ ແລ້ວ ແມ່ນໄດ້ຕັ້ງວັນເວລາເປັນ ເທື່ອທຳອິດໃນການ
ປ່ອຍອາຍພິດຂອງຕົນ ໃນລະດັບທີ່ສູງສຸດນັ້ນໄວ້ ແລະ ສະຫະລັດ
ກໍໄດ້ໃຫ້ສັນຍາໄວ້ ຕາມທີ່ຕົນໄດ້ປະກາດໄປ.
ບັນດານັກຊ່ຽວຊານກ່າວວ່າ ມັນເປັນບາດກ້າວທີ່ດີ ຖ້າປະເທດ
ດັ່ງກ່າວ ຈະປະຕິບັດໄປຕາມຄຳໝັ້ນສັນຍານັ້ນ. ແຕ່ຫາກວ່າ ມັນ
ອາດຈະບໍ່ເປັນການພຽງພໍ ທີ່ຈະປ້ອງກັນ ຜົນກະທົບອັນຮ້າຍແຮງ
ຕ່າງໆຕໍ່ການປ່ຽນແປງຂອງດິນຟ້າອາກາດ. ຜູ້ສື່ຂ່າວວີໂອເອ
Steve Baragona ມີລາຍງານກ່ຽວກັບເລື່ອງນີ້ ຊຶ່ງໄຊຈະເລີນສຸກ ຈະນຳມາສະເໜີທ່ານ
ໃນອັນດັບຕໍ່ໄປ.
Your browser doesn’t support HTML5
ຟັງລາຍງານ ສຫລ ແລະ ຈີນ ຮ່ວມກັນ ປະກາດ ເປົ້າໝາຍ ການຫລຸດຜ່ອນ ປ່ອຍຄວັນພິດ carbon dioxide.
ພວກທໍ່ຄວັນຕ່າງໆຂອງປະເທດຈີນ ໄດ້ສົ່ງ carbon dioxide ອອກມາຫຼາຍກວ່າປະເທດ
ອື່ນໆໃດ ແລະ ຫຼາຍກວ່າສະຫະລັດ ທີ່ເປັນປະເທດທີ່ມີເສດຖະກິດໃຫຍ່ທີ່ສຸດ. ນັກຊ່ຽວຊານ ນະໂຍບາຍທາງດ້ານດິນຟ້າອາກາດ ຈາກມະຫາວິທະຍາໄລ Duke ທ່ານ Tim Profeta ກ່າວວ່າ ສະນັ້ນ ໃນຄຳປະກາດ ເມື່ອວັນພຸດຜ່ານມານີ້ ໂດຍປະທານາທິບໍດີສະຫະລັດ ທ່ານ ບາຣັກ ໂອບາມາ ແລະ ປະທານປະເທດຈີນ ທ່ານ ສີ ຈິ້ນຜິງ ຈຶ່ງແມ່ນເປັນບາດກ້າວທີ່ສຳຄັນ.
ທ່ານ Tim Profeta ເວົ້າວ່າ “ທ່ານ ບໍ່ສາມາດແກ້ໄຂບັນຫານີ້ໄດ້ໂດຍລຳພັງ ແຕ່ສະຫະລັດ ແລະ ຈີນ ເທົ່ານັ້ນ ແຕ່ກໍບໍ່ມີທາງອື່ນໃດ ທີ່ທ່ານ ຈະແກ້ໄຂບັນຫານີ້ໄດ້ ຖ້າປາດສະຈາກ ການປະຕິບັດງານຂອງ ສະຫະລັດ ແລະ ຈີນ.”
ທ່ານ ສີ ໄດ້ສັນຍາ ເປັນຄັ້ງທຳອິດ ວ່າ ການປ່ອຍຄວັນພິດຂອງຈີນ ຈະຢູ່ອັນດັບສູງສຸດ ໃນປີ 2030. ປະເທດຈີນ ວາງເປົ້າໝາຍໄວ້ວ່າ ຈະຄວບຄຸມພະລັງງານ ໃນຈຳນວນ 20 ເປີເຊັນ ທີ່ຕົນຕ້ອງການນັ້ນ ໃຫ້ປາດສະຈາກ ກາຣບອນ ພາຍໃນເວລາດັ່ງກ່າວ.
ນັ້ນ ໝາຍຄວາມວ່າ ຈະຕ້ອງໄດ້ເພີ້ມພະລັງງານ ທີ່ທົດແທນຄືນໃໝ່ໃຫ້ໄດ້ ຫຼາຍກວ່າ ການຜະລິດຈາກບັນດາໂຮງງານ ໄຟຟ້າຖ່ານຫິນຂອງປະເທດທີ່ມີຢູ່ໃນປັດຈຸບັນນີ້.
ປະທານາທິບໍດີ ສະຫະລັດ ທ່ານ Barack Obama (ຊ້າຍ) ຈັບມືກັບ ປະທານປະເທດຈີນ ທ່ານ Xi Jinping ໃນລະຫວ່າງ ກອງປະຊຸມຖະແຫລງ ຂ່າວ ຢູ່ທີ່ ຫໍສາລາ ປະຊາຊົນ ໃນປັກກິ່ງ, ວັນທີ 12 ພະຈິກ 2014.
ປະທານາທິບໍດີ ໂອບາມາໄດ້ໝາຍໝັ້ນ ວ່າຈະຕັດການປ່ອຍຄວັນພິດຂອງສະຫັດລັດ ລົງ ໃນປະມານນຶ່ງສ່ວນສີ່ ຊຶ່ງຕ່ຳກວ່າ ລະດັບໃນປີ 2005 ນັ້ນ ໃຫ້ໄດ້ພາຍໃນປີ 2025. ທຳນຽບຂາວ ກ່າວວ່າ ນັ້ນ ແມ່ນ 2 ເທົ້າຕົວ ຂອງບາດກ້າວ ການຫລຸດລົງ ໃນປັດຈຸບັນນີ້.
ປະທານາທິບໍດີ ສະຫະລັດ ທ່ານ ບາຣັກ ໂອບາມາ ເວົ້າວ່າ “ອັນນີ້ ແມ່ນເປົ້າໝາຍ ທີ່ມີຄວາມໄຝ່ສູງ. ແຕ່ມັນກໍເປັນເປົ້າໝາຍ ທີ່ສາມາດບັນລຸໄດ້.”
ແຕ່ມັນກໍຈະເປັນເປົ້າໝາຍ ທີ່ຈະຕ້ອງໄດ້ປະເຊີນໜ້າກັບ ການຄັດຄ້ານ ຈາກ ບັນດາຜູ້ນຳໃນລັດຖະສະພາ ທີ່ກຳລັງຈະເຂົ້າຮັບໜ້າທີ່ໃໝ່ ອັນມີທ່າທາງວ່າ ຈະລວມທັງ ຜູ້ນຳສຽງສ່ວນຫຼາຍໃນສະພາສູງ ຄືທ່ານ Mitch McConnell ນັ້ນນຳ.
ທ່ານ Mitch McConnell ເວົ້າວ່າ “ ໃນຂະນະທີ່ ຂ້າພະເຈົ້າອ່ານເບິ່ງຂໍ້ຕົກລົງສະບັບນີ້ ຈີນ ແມ່ນບໍ່ຕ້ອງເຮັດຫຍັງເລີຍ ສຳຫລັບລະຍະ 16 ປີຕໍ່ໄປນີ້ ໃນຂະນະດຽວກັນ ກົດລະບຽບຂອງການປ່ອຍອາຍພິດຄຣາບອນຕ່າງໆ ແມ່ນກຳລັງສ້າງຄວາມຫຍຸ້ງຍາກ ຢູ່ໃນລັດຂອງຂ້າພະເຈົ້າ ແລະ ຢູ່ລັດອື່ນໆໃນທົວປະເທດນັ້ນ.”
ທ່ານ Profeta ກ່າວວ່າ ເຖິງແມ່ນ ທັງສອງຝ່າຍ ຈະບັນລຸເປົ້າໝາຍຂອງເຂົາເຈົ້າກໍຕາມ ແຕ່ຂໍ້ຕົກລົງອັນນີ້ເທົ່ານັ້ນ ຈະບໍ່ພຽງພໍ ທີ່ຈະຫລີກເວັ້ນ ຜົນກະທົບຕ່າງໆ ຂອງການປ່ຽນແປງຂອງດິນຟ້າອາກາດໄດ້ ຢ່າງກະທັນຫັນ.
ທ່ານ Profeta ເວົ້າວ່າ “ທ່ານ ບໍ່ສາມາດ ມອງເບິ່ງແຕ່ຕົວເລກນີ້ ເທົ້ານັ້ນ ແລ້ວ ຄິດວ່າມັນເປັນການພຽງພໍ ແລະເພິ່ງພໍໃຈ ວ່າຈະຫລຸດຜ່ອນ ແກັສເຮືອນແກ້ວ ໃນລະຍະ ສັດຕະວັດຕໍ່ໄປນີ້. ຄວາມສຳຄັນຂອງບາດກ້າວອັນນີ້ ແມ່ນວ່າ ທັງສອງປະເທດດັ່ງກ່າວ ກຳລັງເອົາບາດກ້າວຕ່າງໆ ເພື່ອຈະກ້າວໄປ ໃນທິດທາງທີ່ຖືກຕ້ອງ ແລະ ຫວັງວ່າ ຈະເປັນແຮງດົນບັນດານໃຫ້ດຳເນີນການ ຢ່າງວ່ອງໄວຂຶ້ນໃນອະນາຄົດ.”
ບັນດານັກຊ່ຽວຊານ ຫວັງວ່າ ຂໍ້ຕົກລົງລະຫວ່າງສະຫະລັດກັບຈີນ ຈະເປັນຜົນ ໃນຄວາມກ້າວໜ້າ ອັນຈະມີຂໍ້ຕົກລົງລະດັບໂລກ ຢູ່ກອງປະຊຸມສຸດຍອດເລື່ອງດິນຟ້າອາກາດ ທີ່ປະເທດເປຣູ ໃນເດືອນທັນວາ ທີ່ຈະມາເຖິງນີ້.