ນັກການທູດອາວຸໂສຂອງສະຫະລັດທ່ານນຶ່ງໄດ້ກ່າວປ້ອງກັນການສະໜັບສະໜູນຂອງສະຫະລັດ ແກ່ກອງທັບກຳປູເຈຍວ່າ ມີເປົ້າໝາຍ ເພື່ອຊ່ວຍປັບປຸງຄວາມສາມາດໃນການຮັກສາສັນຕິພາບຢູ່ໃນຂົງເຂດ ແລະໃນການຊ່ວຍເຫລືອດ້ານມະນຸດສະທຳ.
ທ່ານ William Burns ຮອງ ລມຕ ການຕ່າງປະເທດສະຫະລັດ ຮັບຜິດຊອບເລື້ອງກິດຈະການການເມືອງ ໄດ້ຖະແຫລງເຊ່ນນັ້ນໃນວັນອາທິດວານນີ້ ຢູ່ນະຄອນຫລວງພະນົມເປັນ ໃນໂອກາດທີ່ກຳປູເຈຍຮັບຕ້ອນກອງທະຫານຈາກສະຫະລັດ ແລະ 23 ປະເທດຈາກພາກພື້ນເອເຊຍຕາເວັນອອກ ທີ່ໄປຮ່ວມໃນການເຝິກຊ້ອມຮັກສາຄວາມສະງົບ ທີ່ກຳປູເຈຍເປັນເຈົ້າພາບຈັດຂຶ້ນ.
ທ່ານ Burns ໄດ້ຖະແຫລງ ຫລັງຈາກທ່ານນາງ Mu Sochua ຜູ້ແທນຝ່າຍຄ້ານຂອງກຳປູເຈຍ ໄດ້ຕຳນິຕິຕຽນການສະໜັບສະໜູນຂອງສະຫະລັດ ໂດຍກ່າວວ່າການສະໜັບສະໜູນນັ້ນ ໄດ້ຖືກມອບໃຫ້ແກ່ພວກໜ່ວຍທະຫານຂອງກຳປູເຈຍທີ່ຖືກກ່າວຫາວ່າ ໄດ້ທຳການລະເມີດສິດທິມະນຸດ. ກຸ່ມປົກປ້ອງສິດທິມະນຸດ Human Rights Watch ກໍໄດ້ກ່າວຄຳຕິຕຽນທຳນອງດຽວກັນເມື່ອຕົ້ນເດືອນນີ້ ໂດຍກ່າວຫາພວກທະຫານຈາກໜ່ວຍນຶ່ງຂອງກອງທັບຂະເໝນວ່າ ໃຊ້ລົດຫຸ້ມເກາະໄປ ຍຶດເອົາທີ່ດິນຈາກພວກຊາວນາ.
ທ່ານ Burns ກ່າວວ່າ ສາຍພົວພັນທາງທະຫານຂອງສະຫະລັດກັບ ໝົດທຸກປະເທດ ແມ່ນຖືກຕ້ອງສອດຄ່ອງກັບກົດໝາຍຂອງສະຫະລັດ ແລະວ່າທາງວໍຊິງຕັນໄດ້ພິຈາລະນາສຶກສາເບິ່ງພວກປະກອບສ່ວນໃນການເຝິກຊ້ອມຄັ້ງນີ້ ຢ່າງລະອຽດຖີ່ຖ້ວນທັງໝົດແລ້ວ.
ການເຝິກຊ້ອມປະຕິບັດງານຮັກສາສັນຕິພາບເປັນເວລາສອງອາທິດຄັ້ງນີ້ ທີ່ໄດ້ເລີ່ມຂຶ້ນເມື່ອວັນທີ 12 ກໍລະກົດ ແມ່ນພາກສ່ວນນຶ່ງຂອງຄວາມພະຍາຍາມຂອງສະຫະລັດ ເພື່ອເຝິກແອບໜ່ວຍຮັກສາສັນຕິພາບທົ່ວໂລກ ທີ່ເອີ້ນວ່າ the Global Peace Operations Initiative ຫລື ໂຄງການລິເລີ່ມປະຕິບັດການຮັກສາສັນຕິພາບໂລກ.