ທ່ານ Joseph Yun ຮອງລັດມົນຕີ ຊ່ອຍວ່າການກະຊວງການຕ່າງປະເທດ ສະຫະລັດ ວັນທີ 18 ພຶດສະພາ 2011
ເຈົ້າໜ້າທີ່ຂັ້ນອາວຸໂສສະຫະລັດທ່ານນຶ່ງເດີນທາງໄປຍັງມຽນມາເພື່ອທໍາການເຈລະຈາຫາລືກັນໃນລະດັບສູງກັບບັນດາສະມາຊິກຂອງລັດ ຖະບານໃນນາມພາຍໃຕ້ການນໍາພາຂອງພົນລະເຮືອນໃໝ່ນັ້ນ.
ຮອງລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ ທ່ານ Joseph Yun
ໄດ້ເດີນທາງໄປເຖິງນະຄອນຢ່າງກຸ້ງໃນວັນພຸດມື້ນີ້ ແລະຄາດວ່າຈະເດີນທາງກົງໄປຍັງເມືອງ
Naypyitaນະຄອນຫຼວງດ້ານການປົກຄອງຂອງມຽນມາ.
ໂຄສົກປະຈໍາກະຊວງການຕ່າງປະເທດສະຫະລັດກ່າວຢູ່ທີ່ກຸງວໍຊິງຕັນໃນວັນອັງຄານວານນີ້
ວ່າ ທ່ານ Yun ຍັງຈະຊອກຫາຊ່ອງທາງເພື່ອພົບປະກັບທ່ານນາງອອງຊານຊູຈີ ຜູ້ນຳປະຊາ
ທິປະໄຕຂອງມຽນມາຕະຫຼອດທັງພວກຜູ້ນໍາດ້ານການເມືອງ ທຸລະກິດແລະຊົນກຸ່ມນ້ອຍອື່ນໆ
ເຊ່ນກັນ. ຜູ້ຕາງໜ້າຄົນນຶ່ງຂອງກຳລັງປະຊາທິປະໄຕແຫ່ງຊາດ ທີ່ໄດ້ ແຍກໂຕອອກຈາກ ພັກສັນນິບາດແຫ່ງຊາດເພື່ອປະຊາທິປະໄຕຂອງທ່ານນາງອອງຊານຊູຈີທີ່ເຂົ້າຮ່ວມໃນການ
ເລືອກຕັ້ງປີກາຍນີ້ ກ່າວວ່າ ທ່ານຄາດວ່າຈະໄດ້ພົບກັບທ່ານ Yun ໃນທ້າຍອາທິດນີ້.
ການຢ້ຽມຢາມເປັນເວລາ 4 ມື້ຂອງທ່ານ Yun ນັບວ່າເປັນການຢ້ຽມຢາມເທື່ອທໍາອິດໂດຍເຈົ້າໜ້າທີ່ຂັ້ນອາວຸໂສຂອງສະຫະລັດ ນັບແຕ່ລັດຖະບານຊຸດໃໝ່ພາຍໃຕ້ການນໍາພາຂອງປະທານາທິບໍດີ Thein Sein ຂຶ້ນດໍາລົງຕໍາແໜ່ງໃນທ້າຍເດືອນມີນາປີນີ້ເປັນຕົ້ນມາ. ແຕ່ໂຄສົກກະຊວງການຕ່າງປະເທດສະຫະລັດກ່າວເນ້ນວ່າ ລັດຖະບານກຸງວໍຊິງຕັນບໍ່ໄດ້ປ່ຽນທັດສະນະຄວາມເຫັນຂອງຕົນທີ່ວ່າການເລືອກຕັ້ງຂອງມຽນມາໃນເດືອນພະຈິກປີແລ້ວນີ້ດໍາເນີນໄປຢ່າງບໍ່ຍຸຕິທໍາ.
ເປັນເວລາ 2 ປີປາຍຜ່ານມາແລ້ວ ສະຫະລັດໄດ້ດໍາເນີນນະໂຍບາຍການພົວພັນກັບມຽນ
ມາແບບ 2 ດ້ານຄວບຄູ່ກັນໄປ ແມ່ນແຕ່ໃນຂະນະທີ່ຕົນທໍາຄວາມກົດດັນໃຫ້ລັດຖະບານ
ມຽນມາປັບປຸງປະວັດການເຄົາລົບນັບຖືດ້ານສິດທິມະນຸດຂອງຕົນໃຫ້ດີຂຶ້ນກໍຕາມ.
ປະທານາທິບໍດີບາຣັກ ໂອບາມາໄດ້ຕໍ່ການລົງໂທດດ້ານເສດຖະກິດຂອງສະຫະລັດຕໍ່ມຽນມາ
ອີກໃນຕົ້ນສັບປະດານີ້ ໂດຍກ່າວວ່າ ການປາບປາມຢ່າງຂະໜານໃຫຍ່ຕໍ່ພວກຝ່າຍຄ້ານນິ
ຍົມປະຊາທິປະໄຕໃນປະເທດນັ້ນຍັງບໍ່ທັນໄດ້ຮັບການແກ້ໄຂເທື່ອ.