ການສືບສວນພາຍໃຕ້ການນຳພາຂອງພັກຣີພັບບລິກັນ ກ່ຽວກັບການໂຈມຕີກໍ່ການຮ້າຍປີ 2012 ຢູ່ບ່ອນຕັ້ງດ້ານການທູດສະຫະລັດແຫ່ງນຶ່ງ ໃນລີເບຍ ທີ່ີໄດ້ສັງຫານຊາວອາເມຣິ ກັນສີ່ຄົນ ໄດ້ສີ້ນສຸດລົງໃນວັນອັງຄານວານນີ້ ໂດຍບໍ່ມີການກ່າວຫາໃໝ່ໃດໆ ກ່ຽວກັບບົດບາດໃນເວລານັ້ນ ຂອງລັດຖະມົນຕີຕ່າງປະເທດ ທ່ານນາງ Hillary Clinton ຊຶ່ງໃນເວລານີ້ຈະຖືກສະເໜີຊື່ເປັນຜູ້ສະໝັກ ປະທານາທິບໍດີ ໃນເລືອກຕັ້ງປີ 2016 ຂອງພັກເດໂມແຄຣັດ.
ທ່ານນາງ Clinton ທີ່ໄດ້ສັງເກດການເບິ່ງສະຖານະການໃນຂະນະທີ່ເຫດການ ດັ່ງກ່າວ ເກີດຂຶ້ນໃນວັນທີ 11 ກັນຍາ ປີ 2012 ກ່າວຢູ່ບ່ອນໂຄສະນາຫາສຽງວ່າ ຄະນະກຳມະ ການສືບສວນສະພາຕໍ່າ “ບໍ່ໄດ້ພົບເຫັນຫຍັງ ບໍ່ມີຫຍັງທີ່ກົງກັນຂ້າມ” ໃນການພົບເຫັນ ກ່ຽວກັບການໂຈມຕີ ໃນການສືບສວນຫຼາຍໆ ຄັ້ງກ່ອນໜ້ານີ້.
ທ່ານນາງກ່າວວ່າ “ມັນເປັນທີ່ແຈ້ງຂາວວ່າ ເຖິງເວລາແລ້ວທີ່ຈະເຄື່ອນໄຫວໄປໜ້າ.”
ກົງສຸນສະຫະລັດ ທີ່ຖືກໂຈມຕີໄຟໄໝ້ ທີ່ເມືອງ Benghazi ປະເທດ Libya ໃນເດືອນກັນຍາ ປີ 2012.
ສ່ວນໃຫຍ່ຂອງສະມາຊິກພັກຣີພັບບລິກັນຢູ່ໃນຄະນະກຳມະການ ພົບເຫັນວ່າກອງທັບເປັນຜູ້ມີຄວາມຜິດ ຍ້ອນບໍ່ສາມາດຕອບໂຕ້ຄືນຕໍ່ການໂຈມຕີ ໃນຂະນະທີ່ມັນເກີດຂຶ້ນນັ້ນ. ປະທານຄະນະກຳມະການ ສະມາຊິກສະພາຕໍ່າ ທ່ານ Trey Gowdy ກ່າວວ່າ “ບໍ່ມີກຳລັງທະຫານສະຫະລັດ ຖືກສົ່ງໄປເມືອງ Benghazi” ເຖິງແມ່ນວ່າມີຄຳສັ່ງຈາກ ປະທານາທິບໍດີ Barack Obama ແລະເວລານັ້ນ ທ່ານ Leon Banetta ເປັນລັດຖະມົນຕີປ້ອງກັນປະເທດ.
ຜູ້ສະໝັກເປັນປະທານາທິບໍດີ ສະຫະລັດ ອະດີດລັດຖະມົນຕີຕ່າງປະເທດ ທ່ານນາງ Hillary Rodham Clinton ກຳລັງໃຫ້ການຕໍ່ໜ້າຄະນະກຳມະການສຶບສວນ ທີ່ລັດຖະສະພາສະຫະລັດ.
“ບໍ່ມີຫຍັງຖືກສົ່ງໄປ Libya ໃນເວລາທີ່ຊາວອາເມຣິກັນສອງຄົນຖືກສັງຫານ ເກືອບແປດຊົ່ວໂມງ ຫລັງຈາກການໂຈມຕີໄດ້ເລີ້ມຂຶ້ນ” ທ່ານ Gowdy ໄດ້ກ່າວຢູ່ໃນລາຍງານທີ່ນຳອອກເຜີຍແຜ່ 800 ໜ້າ ກ່ຽວກັບການໂຈມຕີ ຫລັງຈາກສອງປີ ທີ່ໄດ້ໃຊ້ເງິນ 7 ລ້ານໂດລາ ໃນການສືບສວນ.
ຜູ້ຊາຍຄົນນຶ່ງຍ່າງຢູ່ກົງສຸນສະຫະລັດ ທີ່ຖືກໄຟໄໝ້ ທີ່ເມືອງ Benghazi.
ບັນດາຜູ້ນຳທະຫານໄດ້ກ່າວຊໍ້າແລ້ວຊໍ້າອີກວ່າ ເຂົາເຈົ້າບໍ່ມີຂໍ້ມູນສືບລັບໃດໆທີ່ຢັ້ງຢືນກ່ຽວກັບສິ່ງທີ່ເກີດຂຶ້ນໃນ Libya ຫລືຊັບພະຍາກອນເພື່ອທຳການຕອບໂຕ້. ແຕ່ຫລັງຈາກໄດ້ພິມເຜີຍແຜ່ລາຍງານແລ້ວ ກະຊວງປ້ອງກັນປະເທດກ່າວວ່າ ຕົນ “ໄດ້ປ່ຽນແປງຢ່າງຫລວງຫລາຍ ເພື່ອປັບປຸງການຕອບໂຕ້ຂອງພວກເຮົາ ອີງຕາມບົດຮຽນທີ່ໄດ້ຖອດຖອນຈາກເຫດຮ້າຍດັ່ງກ່າວ.”