ຂໍ້ມູນການສຳຫຼວດຈຳນວນປະຊາກອນສະບັບໃໝ່ຂອງ ສະຫະລັດ ໄດ້ສະແດງໃຫ້ເຫັນ ລາຍໄດ້ສຳລັບຄອບຄົວປະຊາຊົນ ອາເມຣິກັນ ເພີ່ມຂຶ້ນຫຼາຍກວ່າ 5 ເປີເຊັນໃນປີ 2015 ທີ່ຜ່ານມາ, ເຊິ່ງເປັນການສົ່ງສັນ ຍານໃນສິ່ງທີ່ບັນດາວິເຄາະກຳລັງຍົກຍ້ອງວ່າ ເປັນຈຸດຕ່າວປີ້ນໃນການຟື້ນຕົວຄືນ ຈາກພາວະເສດຖະກິດຕົກຕ່ຳໂລກ ທີ່ໄດ້ເລີ່ມຂຶ້ນ ໃນປີ 2007.
ຂໍ້ມູນດັ່ງກ່າວ ເຊິ່ງໄດ້ຖືກເປີດເຜີຍໃນວັນອັງຄານວານນີ້, ສະແດງໃຫ້ເຫັນການເພີ່ມຂຶ້ນ 5.2 ເປີເຊັນໃນທົ່ວທຸກພາກພື້ນຂອງປະເທດ ແລະ ທຸກກຸ່ມອາຍຸຄົນ, ເປັນການສິ້ນສຸດ ຂອງລາຍໄດ້ຊົບເຊົາ ທີ່ມີມາ 8 ປີ. ນອກນັ້ນມັນຍັງໄດ້ສະແດງໃຫ້ເຫັນວ່າ ລະດັບຄວາມ ທຸກຍາກໃນປະເທດໄດ້ຫຼຸດລົງ 1.2 ເປີເຊັນ, ເຊິ່ງຫຼຸດລົງ 3 ລ້ານ 5 ແສນຄົນ ເປັນປະມານ 8 ເປີເຊັນ. ເປັນການຫຼຸດລົງຫຼາຍທີ່ສຸດພາຍໃນ 1 ປີໃນຮອບເກືອບເຄິ່ງສັດຕະວັດ.
ມີປະຊາຊົນ ອາເມຣິກັນ 43 ລ້ານຄົນ ໄດ້ຖືກລະບຸວ່າ ດຳລົງຊີວິດຢູ່ໃນຄວາມທຸກຍາກ ໃນປີ 2015, ເຊິ່ງຫຼຸດລົງ 3 ລ້ານ 5 ແສນຄົນຈາກປີ 2014. ພ້ອມກັນນັ້ນ, ຈຳນວນປະຊາ ຊົນ ອາເມຣິກັນ ທີ່ບໍ່ມີປະກັນສຸຂະພາບກໍໄດ້ສືບຕໍ່ຫຼຸດລົງໃນແຕ່ລະປີ, ຄືຫຼຸດລົງ 1.3 ເປີ ເຊັນ ຈາກຈຳນວນກາຍ 9 ເປີເຊັນໜ້ອຍໜຶ່ງ.
ເຖິງແມ່ນວ່າຈະໄດ້ບັນລຸຜົນຢ່າງຫຼວງຫຼາຍ, ຂໍ້ມູນໄດ້ສະແດງໃຫ້ເຫັນວ່າ ລາຍໄດ້ປານ ກາງຍັງຄົງຢູ່ທີ່ 1.6 ເປີເຊັນຕ່ຳກວ່າປີ 2007, ເຊິ່ງແມ່ນປີທີ່ການຫວ່າງງານໃນ ສະຫະລັດ ໄດ້ເລີ່ມສູງຂຶ້ນແລະ ຕະຫຼາດ ຊື້ຂາຍເຮືອນໄດ້ດິ່ງຕ່ຳລົງ. ວິກິດການດັ່ງກ່າວໄດ້ສ້າງພາວະ ເສດຖະ ກິດຕົກຕ່ຳຄັ້ງໃຫຍ່ໃນປີ 2008, ເຊິ່ງໄດ້ປ່ຽນແປງຕະຫຼາດຕ່າງໆໃນ ຢູໂຣບ ແລະ ເອເຊຍ ແລະ ໄດ້ກະຕຸ້ນໃຫ້ມີການສູນເສຍວຽກງານຢ່າງຫຼວງຫຼາຍ ພ້ອມກັບການຕັດການໃຊ້ຈ່າຍຕ່າໆຂອງລັດຖະບານໃນ ສະຫະລັດ ແລະ ຕ່າງປະເທດລົງ.