ສະຫະລັດ, ອັງກິດ, ຝຣັ່ງ ແລະ ເຢຍຣະມັນ ໄດ້ຮຽກຮ້ອງຕໍ່ຄະນະ ກຳມະການລົງໂທດ ອີຣ່ານ ຂອງສະຫະປະຊາຊາດ ໃຫ້ມີເຄື່ອນໄຫວກ່ຽວກັບການທົດລອງລູກສອນໄຟຂີປະນາວຸດ, ທີ່ພວກເຂົາເຈົ້າກ່າວວ່າ ໄດ້ລະເມີດມະຕິຂອງອົງການສະຫະປະຊາຊາດ.
4 ປະເທດດັ່ງກ່າວນັ້ນ, ທັງໝົດແມ່ນສະມະຊິກຂອງສະພາຄວາມໝັ້ນຄົງ ສະຫະປະຊາຊາດ, ໄດ້ສົ່ງຈົດໝາຍ ຫາຄະນະກຳມະ ການລົງໂທດ ໂດຍກ່າວວ່າ ການຍິງລູກສອນໄຟຂີປະນາວຸດແມ່ນການລະເມີດທີ່ຮ້າຍແຮງ ແລະ ຂໍໃຫ້ຄະນະກຳມະການດຳເນີນ “ການເຄື່ອນໄຫວຢ່າງເໝາະສົມ.”
ທູດຂອງປະເທດ ອັງກິດ ທ່ານ Matthew Rycroft ໄດ້ກ່າວວ່າ ການເຄື່ອນໄຫວໃດໆກໍ ຕາມ ແມ່ນຈະອີງຕາມທັດສະນະຂອງຜູ້ຊ່ຽວຊານດ້ານເທັກນິກ ກ່ຽວກັບ ການຍິງດັ່ງກ່າວໂດຍເວົ້າ ວ່າ “ມັນມີຄວາມກະຈ່າງແຈ້ງໃນທັດສະນະຂອງພວກເຮົາວ່າ ມັນແມ່ນການລະເມີດມະຕິຂອງສະພາຄວາມໝັ້ນຄົງຫຼາຍປະການ, ເຊິ່ງຍັງມີຜົນບັງຄັບໃຊ້ຢູ່ ຫຼັງຈາກຂໍ້ຕົກ ລົງນິວເຄລຍ ອີຣ່ານ. ມັນມີຄວາມສຳຄັນຫຼາຍທີ່ຄະນະກຳມະ ການລົງໂທດຈະພິຈາລະນາຢ່າງຮອບຄອບ ແລະ ລາຍງານມາຄືນໃຫ້ກັບພວກເຮົາ.”
ມະຕິ 1929 ໄດ້ຫ້າມ ບໍ່ໃຫ້ອີຣ່ານ ທຳການຍິງລູກສອນໄຟຂີປະນາວຸດ ທີ່ມີຄວາມສາມາດສົ່ງຫົວລະເບີດນິວເຄລຍ. ອົງການຂ່າວ Reuters ໄດ້ອ້າງຄຳເວົ້າໃນຈົດໝາຍໂດຍກ່າວວ່າ ລູກສອນໄຟຂີປະນາວຸດນີ້ “ມີຄວາມສາມາດໃນການນຳສົ່ງຫົວລະເບີດນິວເຄລຍ.”
ຈົດໝາຍດັ່ງກ່າວນີ້ແມ່ນເປັນບາດກ້າວທຳອິດ ໄປສູ່ການລົງໂທດທີ່ ເປັນໄດ້ສຳລັບ ອີຣ່ານ, ເຖິງແມ່ນວ່າ ການລົງໂທດນັ້ນແມ່ນຈະຕ້ອງໄດ້ຖືກຮັບຮອງໂດຍ ສະມາຊິກຮ່ວມໃນສະພາຄວາມໝັ້ນຄົງເຊັ່ນ, ຣັດເຊຍ ແລະ ຈີນ ກໍຕາມ.
ທ່ານ Rycroft ໄດ້ກ່າວວ່າ “ຂ້າພະເຈົ້າຈະໃຫ້ສະມາຊິກສະພາຄວາມໝັ້ນຄົງເວົ້າພວກເພື່ອພວກເຂົາເຈົ້າເອງ. ແຕ່ຂ້າພະເຈົ້າຄິດວ່າ ທຸກໆ ຄົນຈະຮູ້ເຖິງຄວາມສຳຄັນຂອງຂໍ້ຕົກລົງ ອີຣ່ານ. ພວກເຮົາຢາກເຫັນມັນໄດ້ຮັບການການຈັດຕັ້ງປະຕິ ບັດມັນຢ່າງຖືກຕ້ອງ, ຍຸດຕະທຳ ແລະ ຢ່າງເຕັມທີ່ໂດຍທຸກໆຝ່າຍ.”
ຂໍ້ຕົກລົງ ນິວເຄລຍ ອີຣ່ານ, ໄດ້ຖືກລົງນາມໂດຍ ອີຣ່ານ ແລະ 6 ປະເທດມະຫາອຳນາດໃຫຍ່, ຊຶ່ງເລີ້ມມີຜົນບັງຄັບໃນການຈັດຕັ້ງປະຕິ ບັດຂັ້ນຕອນທຳອິດໃນວັນອາທິດທີ່ຜ່ານມາ.