ມີພວກເດັກນ້ອຍເກືອບ 70 ລ້ານຄົນ ທີ່ມີອາຍຸຕ່ຳກວ່າ 5 ປີ ອາດເສຍຊີວິດລົງ ແຕ່ປະຈຸບັນນີ້ ຈົນເຖິງປີ 2030 ຖ້າຫາກວ່າລັດຖະບານແລະຄູ່ພາຄີຂອງພວກເຂົາເຈົ້າ ບໍ່ເພີ້ມການ ດຳເນີນຄວາມພະຍາຍາມເພື່ອໃຫ້ບັນລຸເປົ້າໝາຍໃນການພັດທະນາ ນັ້ນແມ່ນຄຳເຕືອນຂອງ ອົງການເດັກນ້ອຍຂອງສະຫະປະຊາຊາດ ຫຼື UNICEF.
ໃນລາຍງານປະຈຳປີຂອງອົງການດັ່ງກ່າວກ່ຽວກັບພວກເດັກນ້ອຍ ທີ່ນຳອອກເຜີຍແຜ່ ໃນວັນອັງຄານມື້ນີ້ ອົງການ UNICEF ໄດ້ຮຽກຮ້ອງໃຫ້ລັດຖະບານ ພວກໃຫ້ຄວາມອຸບປະຖຳແລະອົງການທີ່ບໍ່ຂຶ້ນກັບລັດຖະບານຕ່າງໆໃຫ້ເພັ່ງເລັງໃສ່ກຸ່ມພວກເດັກນ້ອຍ ທີ່ດ້ອຍໂອກາດ ແລະໃຫ້ປິດຊ່ອງຫວ່າງນັ້ນເສຍໂດຍໃຫ້ໂອກາດທີ່ດີຂຶ້ນໃນອະນາຄົດ ແກ່ພວກເດັກນ້ອຍເຫຼົ່ານີ້.
“ຄວາມບໍ່ສະເໝີພາບທີ່ໃຫຍ່ຫຼວງ ແລະອັນຕະລາຍນີ້ ແມ່ນຍັງຜົນໃຫ້ຫຼາຍໄປກວ່າ ການລະເມີດສິດທິ ແລະບັ່ນທອນອະນາຄົດຂອງພວກເດັກນ້ອຍແຕ່ລະຄົນ,” ນັ້ນຄືຄຳເວົ້າຜູ້ ອຳນວຍການຂອງອົງການ UNICEF ທ່ານ Anthony Lake ໄດ້ລະບຸໄວ້ໃນລາຍງານ. ທ່ານຍັງໄດ້ກ່າວອີກວ່າ “ພວກເຂົາເຈົ້າໄດ້ລົງເລິກ ເຂົ້າໃນລະບົບຂອງຄົນລຸ້ນຕໍ່ໄປ ຂອງການບໍ່ມີຄວາມກ້າວໜ້າ ແລະຄວາມບໍ່ສະເໝີພາບ ທີ່ເປັນບ່ອນທຳລາຍ ຄວາມທ່ຽງດຸນຂອງສັງຄົມ ເຖິງແມ່ນແຕ່ການຮັກສາຄວາມປອດໄພຂອງປະເທດໃນທົ່ວທຸກຫົນແຫ່ງ.”
ວິກິດການພວກເຂົ້າເມືອງແລະພວກອົບພະຍົບໄດ້ມີຜົນກະທົບຕໍ່ຢູໂຣບ ແມ່ນນຶ່ງໃນຕົວຢ່າງກ່ຽວກັບວ່າຄວາມບໍ່ສະເໝີພາບ ໄດ້ຂັບດັນໃຫ້ໂລກບໍ່ມີສະຖຽນລະພາບ ທ່ານ Justin Forsyth ຮອງຜູ້ອຳນວຍການຂອງອົງການ UNICEF ໄດ້ກ່າວໄວ້.
ພະນັກງານຂອງອົງການ UNICEF ຢ້ຽມຢາມ ເມືອງ Freetown, Sierra Leone.
“ການປະສົບປະສານຂອງການປົກຄອງທີ່ບໍ່ຖືກຕ້ອງ ບັນຫາຂັດແຍ້ງ ພ້ອມທັງຄວາມ ບໍ່ສະເໝີພາບ ເປັນເຊື້ອໄຟ ຈຸດຂະນວນຈູດຄະນວນ ພາໃຫ້ມີຍົກຍ້າຍຂອງປະຊາ ຊົນເປັນຈຳ ນວນຫລວງຫລາຍ,” ຊຶ່ງທ່ານໄດ້ກ່າວເຖິງການອົບພະຍົບລົບໜີ ໄປຈາກ ອາຟຣິກາເໜືອ.
ທ່ານ Forsyth ຍັງກ່າວອີກວ່າ ສະພາບການດັ່ງກ່າວນີ້ ສາມາດທີ່ຈະປັບປຸງໄດ້ ດ້ວຍການລົງທຶນທີ່ໜ້ອຍໆໃສ່ດ້ານສຸຂະພາບ ແລະການສຶກສາ. “ພວກເຮົາສາມາດຊ່ອຍຊີວິດຂອງພວກເດັກນ້ອຍໄດ້ ປະມານ 147 ລ້ານຄົນ ຈາກການຕາຍທີ່ອາຍຸຕ່ຳກ່ວາ 5 ປີ ພຽງແຕ່ 2 ເປີເຊນ ເພີ້ມຂຶ້ນ ໃນການໃຊ້ຈ່າຍຢູ່ໃນ 74 ປະເທດ ຊຶ່ງມັນໝາຍເຖິງເງິນຈຳນວນ 30 ພັນລ້ານໂດລາ ຕໍ່ປີ.”
ອົງການ UNICEF ຮຽກຮ້ອງໃຫ້ປະເທດຕ່າງໆ ທຳການວາງແຜນການເພື່ອວ່າປະເທດ ຊາດຂອງພວກເຂົາເຈົ້າຈະສາມາດບັນລຸເປົ້າໝາຍຕ່າງໆ ທີ່ພວກເຂົາເຈົ້າໄດ້ຕັ້ງໄວ້ໃນການວາງແຜນພັດທະນາແບບຍືນຍົງ ພາຍໃນປີ 2030.
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ