ການກ່າວຄຳປາໄສປະຈໍາປີຕໍ່ກອງປະຊຸມສະມັດຊາໃຫຍ່ສະຫະປະຊາຊາດໄດ້ເສັດສິ້ນລົງ ໂດຍຣັດເຊຍ ຮຽກຮ້ອງໃຫ້ທໍາການຍົກເລີກເຂດຫ້າມບິນເໜືອນ່ານຟ້າຂອງລີເບຍ ປາກິສ ຖານເນ້ນຄືນອີກເຖິງຄວາມໝາຍໝັ້ນຕັ້ງໃຈ ໃນການຕໍ່ສູ້ປາບປາມພວກກໍ່ການຮ້າຍຂອງຕົນ ແລະເກົາຫລີເໜືອແລະ Venezuela ຕໍາໜິຕິຕຽນນະໂຍບາຍຕ່າງໆຂອງສະຫະລັດອາເມ ຣິກາ.
ໃນວັນອັງຄານວານນີ້ ລັດຖະມົນຕີການຕ່າງປະເທດຣັດເຊຍ ທ່ານ Sergei Lavrov ກ່າວວ່າ ມັນສົມຄວນແກ່ເວລາແລ້ວທີ່ຈະຍົກເລີກເຂດຫ້າມບິນເໜືອລີເບຍທີ່ສະພາຄວາມໝັ້ນຄົງສະຫະປະຊາຊາດໃຫ້ການອະນຸມັດ ແລະປະຕິບັດການໂດຍກຸ່ມເນໂຕ້ນັ້ນ. ຂໍ້ກໍານົດຕ່າງໆເຫລົ່າ ນີ້ແມ່ນໄດ້ມີຂຶ້ນໃນເດືອນມີນາຜ່ານມາເພື່ອປົກປັກຮັກສາພວກພົນລະເຮືອນຈາກການໂຈມຕີຂອງພວກກໍາລັງຂອງອະດີດຜູ້ນໍາລີເບຍ ທ່ານມວມມາ ກາດດາຟີ ຊຶ່ງເວລານີ້ໄດ້ຖືກໂຄ່ນລົ້ມອອກຈາກອໍານາດໄປແລ້ວນັ້ນ.
ລັດຖະມົນຕີຕ່າງປະເທດປາກິສຖານ ທ່ານນາງ Hina Rabbani Khar ກ່າວວ່າ ປະເທດ
ຂອງທ່ານນາງໄດ້ຕັດສິນໃຈທີ່ຈະກວດລ້າງພວກກໍ່ການຮ້າຍໃຫ້ໝົດໄປ ບໍ່ພຽງແຕ່ພາຍໃນ
ປະເທດເທົ່ານັ້ນ ແຕ່ຈາກພາກພື້ນແລະໃນທົ່ວໂລກນໍາ. ທ່ານນາງ Rabbani Khar ໄດ້
ຮຽກຮ້ອງໃຫ້ມີການຮ່ວມໄມ້ຮ່ວມມືຂອງລະຫວ່າງຊາດຢ່າງພ້ອມພຽງກັນ ເພື່ອໃຫ້ຄວາມ
ຊ່ອຍເຫລືອແກ່ຄວາມຄວາມພະຍາຍາມດັ່ງກ່າວ.
ກ່ອນໜ້ານັ້ນ ໂຄສົກປະຈໍາທໍານຽບຂາວຂອງສະຫະລັດໄດ້ຮຽກຮ້ອງໃຫ້ປາກິສຖານທໍາການເຄື່ອນໄຫວໃນການຮັບມືກັບເຄືອຂ່າຍ Haqqani ທີ່ມີຄວາມເຊື່ອມໂຍງກັນກັບກຸ່ມຕາລີບັນ ຊຶ່ງທາງລັດຖະບານກຸງວໍຊິງຕັນກ່າວວ່າ ເປັນຜູ້ທໍາການໂຈມຕີຕ່າງໆໃນອັຟການິສຖານ ຈາກຖານປະຕິບັດງານຂອງພວກເຂົາໃນເຂດຊົນເຜົ່າ Waziristan ເໜືອຂອງປາກິສຖານນັ້ນ.
ທ່ານ Pak Kil Yon ຮອງລັດຖະມົນຕີຕ່າງປະເທດເກົາຫລີເໜືອຖິ້ມໂທດໃສ່ສະຫະລັດ
ສໍາລັບຄວາມເຄັ່ງຕຶງທີ່ເກີດຂຶ້ນໃນແຫລມເກົາຫລີ. ເກົາຫລີເໜືອແລະເກົາຫຼີໃຕ້ກໍາລັງທໍາ
ຄວາມພະຍາຍາມຢ່າງຊ້າໆເພື່ອປັບປຸງສາຍພົວພັນລະຫວ່າງກັນໃຫ້ດີຂຶ້ນຊຶ່ງສາຍພົວພັນ
ດັ່ງກ່າວໄດ້ຊຸດໂຊມລົງຫລັງຈາກເກົາຫລີເໜືອຍິງປືນໃຫຍ່ ໃສ່ເກາະນຶ່ງຂອງເກົາຫລີໃຕ້
ໃນເດືອນພະຈິກປີແລ້ວນີ້ ແລະຍິງເຮືອລົບເກົາຫລີໃຕ້ລໍານຶ່ງຫຼົ້ມ ທີ່ທາງລັດຖະບານກຸງ
ໂຊນຖິ້ມໂທດໃສ່ກຸງພຽງຢ້າງນັ້ນ.