ຄາດວ່າ ປະທານາທິບໍດີ Mahmoud Ahmadinejad ແຫ່ງອິຣ່ານ ຈະນຳສະເໜີ ເຫດຜົນແລະຂໍ້ໂຕ້ແຍ້ງ ຂອງປະເທດຂອງທ່ານ ສຳລັບໂຄງການນີວເຄລຍ ໃນລະຫວ່າງການກ່າວປາໄສ ຕໍ່ນັດທຳອິດຂອງກອງປະຊຸມວ່າດ້ວຍສົນທິສັນຍາຫ້າມແຜ່ຜາຍອາວຸດນິວເຄລຍ ໃນມື້ນີ້.
ທ່ານ Ahmadinejad ເດີນທາງໄປຮອດນະຄອນນິວຢອກໃນຕອນ ເຊົ້າວັນຈັນມື້ນີ້ ແລະຄາດວ່າທ່ານຈະນຳສະເໜີການປ່ຽນແປງຫລາຍ ຢ່າງໃນສົນທິສັນຍາ ຕລອດທັງຈະທຳການເຍາະເຍີ້ຍຄວາມພະຍາຍາມຕ່າງໆຂອງນາໆຊາດທີ່ນຳພາໂດຍສະຫະລັດ ເພື່ອຈະທຳການລົງໂທດ ຮອບໃໝ່ຕໍ່ປະເທດຂອງທ່ານ ຍ້ອນການຫລອມທາດຢູເຣນຽມຂອງຕົນນັ້ນ.
ລັດຖະມຸນຕີການຕ່າງປະເທດຂອງສະຫະລັດ ທ່ານນາງຮີນລາຣີ ຄລິນຕັນໄດ້ກ່າວອອກມາໃນວັນອາທິດວານນີ້ວ່າ ຜູ້ນຳອິຣ່ານຈະພະຍາຍາມ ຫັນເຫຄວາມສົນໃຈຂອງຜູ້ຄົນ ອອກຈາກການທ່ີປະເທດຂອງທ່ານບໍ່ຍອມປະຕິບັດຕາມ ສົນທິສັນຍາວ່າດ້ວຍການຫ້າມແຜ່ຜາຍອາວຸດນິວເຄລຍນັ້ນ.
ເປັນທີ່ຄາດກັນວ່າ ທ່ານນາງຮີນລາຣີ ກໍຈະກ່າວຄຳປາໄສໃນຕອນໄຂກອງປະຊຸມໃນວັນຈັນມື້ນີ້ ເຊັ່ນກັນ ທ່ີສຳນັກງານໃຫຍ່ອົງການສະຫະປະຊາຊາດ ທ່ີນະຄອນນີວຢອກນັ້ນ.
189 ປະເທດທີ່ລົງນາມຮັບຮອງເອົາສົນທິສັນຍາດັ່ງກ່າວ ເຕົ້າໂຮມກັນໃນທຸກໆ 5 ປີ ເພື່ອທຳການໂອ້ລົມສົນທະນາກັນ ເຣື່ອງການປະຕິບັດ ຕາມ ແລະເສີມສ້າງໃຫ້ສົນທິສັນຍາແຂງແຮງຂຶ້ນ ຊຶ່ງມີວັດຖຸປະສົງເພື່ອສະກັດກັ້ນການແຜ່ຜາຍພວກອາວຸດນີວເຄລຍນັ້ນ.