ລາຍງານສະບັບນຶ່ງຂອງສະຫະປະຊາຊາດເວົ້າວ່າ ເກົາຫລີເໜືອ ສືບຕໍ່ລະເມີດການລົງ
ໂທດຂອງສາກົນ ໂດຍການດໍາເນີນຄວາມພະຍາຍາມຂົນສົ່ງອາວຸດໄປໃຫ້ມຽນມາແລະ
ຊີເຣຍ ແລະໂດຍການນໍາເຂົ້າສິນຄ້າຟຸມເຟືອຍ.
ບົດລາຍງານດັ່ງກ່າວ ຊຶ່ງເຮັດຂຶ້ນໂດຍຄະນະນັກຊ່ຽວຊານຂອງສະຫະປະຊາຊາດຍັງໄດ້
ເວົ້າວ່າ ລູກສອນໄຟຂີປະນາວຸດຮຸ່ນໃໝ່ KN-08 ທີ່ໄດ້ນຳອອກສະແດງໃນການສວນສະ
ໜາມຂອງທະຫານ ໃນເດືອນເມສາຜ່ານມານັ້ນ ອາດເປັນຂອງປອມ.
ການສວນສະໜາມດັ່ງກ່າວ ແມ່ນສ່ວນນຶ່ງໃນການສະເຫລີມສະຫລອງວັນຄ້າຍວັນເກີດ ຄົບຮອບຮ້ອຍປີຂອງຜູ້ກໍ່ຕັ້ງເກົາຫລີເໜືອ ທ່ານ ກິມອິນ ຊຸງ.
ພ້ອມດຽວກັນນັ້ນ ບົດລາຍງານທີ່ມີ 74 ໜ້າດັ່ງກ່າວ ຍັງໄດ້ກ່າວວ່າບໍ່ມີການລະເມີດທີ່
ກ່ຽວຂ້ອງກັບອາວຸດນີວເຄລຍ, ອາວຸດເຄມີ ຫລືອາວຸດຊີວະພາບ ຫລືລູກສອນໄຟຂີປະ
ນາວຸດ ແຕ່ຢ່າງໃດ.
ບົດລາຍງານທີ່ໄດ້ຍື່ນໃຫ້ຄະນະກໍາມະການຂອງສະພາຄວາມໝັ້ນຄົງຂອງສະຫະປະຊາ
ຊາດ ທີ່ຕິດຕາມເບິ່ງການລົງໂທດ ໄດ້ຖືກພິມເຜີຍແຜ່ໃນວັນສຸກຜ່ານມານີ້. ອົງການຂ່າວ
ເອພີ ໄດ້ອ້າງຄໍາເວົ້າຂອງນັກການທູດຜູ້ນຶ່ງ ຢູ່ໃນຄະນະປະຕິບັດງານສະຫະປະຊາຊາດ
ຂອງເກົາຫລີເໜືອ ທີ່ປະຕິເສດການຄົ້ນພົບດັ່ງກ່າວ.
ສະພາຄວາມໝັ້ນຄົງຂອງສະຫະປະຊາຊາດ ໄດ້ທໍາການລົງໂທດຕໍ່ເກົາຫລີ ເໜືອລຸນຫລັງ
ທີ່ປະເທດດັ່ງກ່າວ ໄດ້ທໍາການທົດລອງນີວເຄລຍຄັ້ງທໍາອິດໃນປີ 2006 ແລະກໍໄດ້ເພີ້ມ
ການລົງໂທດຂຶ້ນ ພາຍຫລັງທີ່ປະເທດນີ້ ໄດ້ທໍາການທົດລອງນີວເຄລຍຄັ້ງທີສອງໃນປີ
2009. ມາດຕະການດັ່ງກ່າວ ແມ່ນແນໃສ່ ປ້ອງກັນບໍ່ໃຫ້ລັດຖະບານນະຄອນພຽງຢາງ ໄດ້ຮັບວັດຖຸທີ່ຕ້ອງການສຳຫຼັບ ໂຄງການອາວຸດນີວເຄລຍ ແລະລູກສອນໄຟຂີປະນາວຸດ ຂອງຕົນນັ້ນ.