ກອງປະຊຸມສະມັດຊາໃຫຍ່ອົງການສະຫະປະຊາຊາດ ໄດ້ສະໜັບສະໜູນມະຕິທີ່ບໍ່ມີຂໍ້ ຜູກມັດ ກ່ຽວກັບ ປາແລັສໄຕນ໌ ໃນວັນພຸດວານນີ້ ໂດຍຮຽກຮ້ອງໃຫ້ ອິສຣາແອລ ຍຸຕິ “ການມີໜ້າທີ່ຜິດກົດໝາຍ” ຂອງຕົນ ຢູ່ໃນເຂດກາຊາ ແລະການຍຶດຄອງເຂດແວັສແບ້ັງ ພາຍໃນນຶ່ງປີ.
ມະຕິດັ່ງກ່າວ ຍັງຮຽກຮ້ອງໃຫ້ ອິສຣາແອລ ຖອນກຳລັງຂອງຕົນ ແລະຍົກຍ້າຍພວກຕັ້ງຖິ່ນຖານໃໝ່ ອອກໄປຈາກດິນແດນຂອງປາແລສໄຕນ໌ ທີ່ຖືກປົກຄອງຢູ່ນັ້ນ “ໂດຍບໍ່ມີການຊັກຊ້າໃດໆ.”
ການລົງຄະແນນສຽງໃນບັນດາສະມາຊິກຈຳນວນ 193 ປະເທດຂອງອົງການຈັດຕັ້ງ ຂອງໂລກ ໃນວັນພຸດວານນີ້ ແມ່ນ 124 ຕໍ່ 14 ສຽງ ໂດຍມີ 43 ປະເທດບໍ່ອອກສຽງ.
ເອກອັກຄະລັດຖະທູດຂອງປາແລສໄຕນ໌ ປະຈຳສະຫະປະຊາຊາດ ໄດ້ຍິນດີນຳການລົງ ຄະແນນສຽງ ໂດຍກ່າວວ່າ “ມະຕິນີ້ ເປັນນິມິດໝາຍຂອງຈຸດຫັນປ່ຽນ ໃນການສູ້ຊົນ ຂອງພວກເຮົາເພື່ອ ເສລີພາບ ແລະຄວາມເປັນທຳ.”
ແຕ່ເອກອັກຄະລັດຖະທູດຂອງອິສຣາແອລ ປະຈຳສະຫະປະຊາຊາດ ໄດ້ເອີ້ນການລົງ ຄະແນນສຽງວ່າ “ເປັນການຕັດສິນທີ່ໜ້າອັບອາຍ ທີ່ໜູນຫຼັງການທູດລັດທິກໍ່ການຮ້າຍ ຂອງອຳນາດການປົກຄອງ ປາແລສໄຕນ໌” ແລະບໍ່ໄດ້ປະນາມ “ພວກຄາດຕະກອນກຸ່ມຮາມາສ” ຜູ້ທີ່ໄດ້ໂຈມຕີ ອິສຣາແອລ ເມື່ອວັນທີ 7 ຕຸລາ.