ທ່ານ Mahmoud Jibril ຜູ້ນໍາສະພາປົກຄອງຊົ່ວຄາວລີເບຍແລະທ່ານ Mohamed
Kamel Amr ລັດຖະມົນຕີການຕ່າງປະເທດອີຈິບໄດ້ອອກເວທີສະຫະປະຊາຊາດເປັນ
ເທື່ອທໍາອິດໃນວັນເສົາວານນີ້ ໃນຂະນະທີ່ພວກທ່ານກ່າວປາໄສຕໍ່ກອງປະຊຸມປະຈໍາປີ
ຂອງສະມັດຊາໃຫຍ່ສະຫະປະຊາຊາດ.
ທ່ານ Jibril ໄດ້ຮຽກຮ້ອງໃຫ້ປະຊາຄົມນາໆຊາດຍົກເລີກການລົງໂທດຕ່າງໆຕໍ່ປະເທດ
ຂອງທ່ານ ຊຶ່ງທ່ານກ່າວວ່າ ປະເທດລີເບຍໃໝ່ກໍາລັງຈະຟື້ນຊິວິດຄືນມາເປັນປະເທດນຶ່ງ
ທີ່ມີຄວາມໝັ້ນໝາຍຕໍ່ປະຊາທິປະໄຕ ຄວາມສະເໝີພາບ ແລະເຂົ້າຮ່ວມຄືນໃໝ່ກັບປະ
ຊາຄົມນາໆຊາດ.
ຜູ້ນໍາໃໝ່ຂອງລີເບຍກ່າວຕື່ມວ່າ ປະເທດຂອງທ່ານມີຫລາຍຄົນໂພດທີ່ດໍາລົງຊີວິດຢູ່ໃນ
ຄວາມທຸກຈົນ ໂດຍບໍ່ມີການຮັກສາສຸຂະພາບແລະການສຶກສາທີ່ພຽງພໍ. ທ່ານໄດ້ຮຽກ
ຮ້ອງໃຫ້ສະພາຄວາມໝັ້ນຄົງສະຫະປະຊາຊາດຍົກເລີກການກັກຊັບສິນຂອງປະເທດ
ຂອງທ່ານ ເພື່ອວ່າລີເບຍຈະມີເງິນໃຊ້ຈ່າຍສໍາລັບການພັດທະນາສ້າງສາປະເທດ. ສະພາ
ຄວາມໜັ້ນຄົງໄດ້ປ່ອຍຊັບສິນຂອງລີເບຍທີ່ກັກໄວ້ນັ້ນໃນມູນຄ່າຫລາຍກວ່າ 16 ຕື້ໂດ
ລາ ແຕ່ບໍ່ໄດ້ຍົກເລີກການລົງໂທດທັງໝົດ.
ສ່ວນທ່ານ Mohamed Kamel Amr ລັດຖະມົນຕີການຕ່າງປະເທດອີຈິບ ໄດ້ກ່າວ
ຕໍ່ກອງປະຊຸມວ່າ ທ່ານເປັນໂຕແທນຂອງອີຈິບໃນຍຸກໃໝ່ ແລະມີໂສມໜ້າໃໝ່. ທ່ານ
Amr ໄດ້ກ່າວຊົມເຊີຍປະຊາຊົນອີຈິບ ທີ່ໄດ້ໂຄ່ນລົ້ມປະທານາທິບໍດີ ໂຮສນີ ມູບາຣັກ
ທີ່ໄດ້ປົກຄອງປະເທດມາເປັນເວລາດົນນານໃນເດືອນກຸມພາຜ່ານມານັ້ນ ໂດຍກ່າວ
ວ່າພວກເຂົາເຈົ້າຢືນຂຶ້ນເພື່ອຄວາມເຊື່ອຖືຂອງເຂົາເຈົ້າໃນການປະຕິຮູບໄປສູ່ລະບອບ
ປະຊາທິປະໄຕ ເພື່ອສິດທິມະນຸດແລະເພື່ອເສລີພາບພື້ນຖານຕ່າງໆ.