ປະທານາທິບໍດີຢູເຄຣນ ທ່ານ Petro Poroshenko ໄດ້ເດີນທາງ
ໄປເຖິງເຢຍຣະມັນ ເພື່ອທຳການເຈລະຈາ ກັບນາຍົກລັດຖະມົນຕີ
Angela Merkel ແລະ ບັນດາຜູ້ແທນທີ່ສຳຄັນຂອງເຢຍຣະມັນ
ເພື່ອຫາທາງຂໍຄວາມຊ່ອຍເຫຼືອທາງດ້ານທະຫານ ຈາກບັນດາ
ປະເທດຕາເວັນຕົກ ເພື່ອຍຸດຕິການກໍ່ກະບົດ ຂອງພວກນິຍົມ
ຣັດເຊຍ ໃນປະເທດຂອງທ່ານນັ້ນ.
ລາຍລະອຽດຕ່າງໆ ຂອງການເຈລະຈາຮ່ວມກັນນັ້ນ ແມ່ນບໍ່ໄດ້
ເປີດເຜີຍໃຫ້ຊາບ. ແຕ່ການພົບປະກັນໃນວັນຈັນມື້ນີ້ ມີຂຶ້ນຫລັງ
ຈາກມີຄຳເຕືອນ ຈາກນັກການທູດລະດັບສູງສຸດຂອງເຢຍຣະມັນ
ຕໍ່ການຈັດສົ່ງອາວຸດສົງຄາມຮ້າຍແຮງໃຫ້ແກ່ Kyiv ເພື່ອຕອບໂຕ້
ການລຸກຮືຂຶ້ນມາໄດ້ເກືອບປີໜຶ່ງແລ້ວ ໂດຍພວກທີ່ໜູນຫຼັງໂດຍມົສກູ ຢູ່ໃກ້ໆເຂດຊາຍແດນ ຕິດກັບຣັດເຊຍ.
ລັດຖະມົນຕີ ຕ່າງປະເທດເຢຍຣະມັນ ທ່ານ Frank Walter-Steinmeier ກ່າວຖະແຫລງ ເມື່ອວັນພະຫັດຜ່ານມາ ຢູ່ວໍຊິງຕັນວ່າ ການມອບອາວຸດແບບນັ້ນ ໃຫ້ແກ່ຢູເຄຣນ ອາດສົ່ງຜົນໃຫ້ການຂັດແຍ້ງ ກັນນັ້ນ ລຸກລາມອອກໄປຈົນ “ຄວບຄຸມບໍ່ໄດ້.” ທ່ານ ແລະ ບັນດາເຈົ້າໜ້າທີ່ປະເທດຢູໂຣບຄົນອື່ນໆ ຍັງໄດ້ເຕືອນວ່າ ທັງເຢຍຣະມັນ ຫຼື ຝຣັ່ງ ຈະບໍ່ສະໜັບ
ສະໜູນການເຄື່ອນໄຫວໃດໆ ຂອງສະຫະລັດທີ່ຈະສົ່ງອາວຸດຮ້າຍແຮງ ໄປໃຫ້ຢູເຄຣນນັ້ນ.
ກອງປະຊຸມ ບັນດາຜູ້ນຳສະຫະພາບຢູໂຣບ ໃນທ້າຍອາທິດນີ້ ຢູ່ທີ່ນະຄອນ Brussels ແມ່ນຄາດກັນວ່າ ຈະຫວນຄືນໄປເບິ່ງມາດຕາການລົງໂທດທາງເສດຖະກິດ ທີ່ໄດ້ວາງໃຊ້ຕໍ່ມົສກູ ຍ້ອນການສະໜັບ ສະໜູນການລຸກຮືຂຶ້ນດັ່ງກ່າວ ຊຶ່ງໄດ້ເອົາຊີວິດ ຫຼາຍກວ່າ 6,000 ຄົນໄປແລ້ວ ນັບຕັ້ງແຕ່ ເດືອນເມສາ 2014 ເປັນຕົ້ນມາ.
Your browser doesn’t support HTML5
Petro Porochenko meet with Angela Merkel