ບັນດາເຈົ້າໜ້າທີ່ສຸກເສີນ ໄດ້ພາກັນເລັ່ງອົບພະຍົບປະຊາຊົນຫຼາຍພັນຄົນອອກຈາກຂົງເຂດນ້ຳຖ້ວມຮຸນແຮງໃນວັນອັງຄານມື້ນີ້ ລຸນຫຼັງພາຍຸໄຕ້ຝຸ່ນ ຢາກິ ໄດ້ພັດເຂົ້າສູ່ພາກເໜືອຂອງຫວຽດນາມ, ສົ່ງຜົນເຮັດໃຫ້ມີຜູ້ເສຍຊີວິດ 63 ຄົນ ແລະສູນຫາຍອີກ 40 ຄົນ.
ພາຍຸໄຕ້ຝຸ່ນ ຢາກິ ໄດ້ພັດເຂົ້າມາໃນວັນເສົາແລ້ວນີ້ ດ້ວຍລົມແຮງສູງກວ່າ 149 ກິໂລແມັດຕໍ່ຊົ່ວໂມງ, ເຮັດໃຫ້ມັນກາຍເປັນພາຍຸໄຕ້ຝຸ່ນພັດເຂົ້າຫວຽດນາມທີ່ມີພະລັງແຮງທີ່ສຸດໃນຮອບ 30 ປີ, ອີງຕາມກົມອຸຕຸນິຍົມທິທະຍາ.
ພາຍຸດັ່ງກ່າວ ສົ່ງຜົນເຮັດໃຫ້ຂົວຫຼາຍແຫ່ງຫັກພັງລົງມາ, ຫຼັງຄາຂອງຕຶກອາຄານຫຼາຍຫຼັງພັງລົງ, ໂຮງງານຫຼາຍແຫ່ງໄດ້ຮັບຄວາມເສຍຫາຍ ແລະ ເຮັດໃຫ້ເກີດນ້ຳຖ້ວມ ພ້ອມດ້ວຍເຫດການດິນເຈື່ອນໄວວາຢ່າງກວ້າງຂວາງ.
ນັກອຸຕຸນິຍົມວິທະຍາກ່າວວ່າ ທາງພາກເໜືອຂອງປະເທດແຫ່ງນີ້ ມີປະຊາກອນ ອາໄສຢູ່ໜາແໜ້ນ ແລະເປັນສູນກາງການຜະລິດອັນສໍາຄັນ ສໍາລັບບໍລິສັດເທັກ ໂນໂລຈີທົ່ວໂລກ ລວມທັງບໍລິສັດ Samsung, ປັດຈຸບັນ ກໍາລັງຕໍ່ສູ້ກັບໄພນໍ້າ ຖ້ວມເປັນ “ປະຫວັດການ.”
ພາບທາງອາກາດ ສະແດງໃຫ້ເຫັນຂົວຂ້າມແມ່ນໍ້າແດງ ພົງ ຈົວ (Phong Chau) ທີ່ຕັ້ງຢູ່ໃນແຂວງ ພູ ທໍ່ (Phu Tho) ຫັກພັງລົງ, ວັນທີ 9 ກັນຍາ 2024, ລຸນຫຼັງພາຍຸໄຕ້ຝຸ່ນ ຢາກິ ພັດຖະຫຼົ່ມເຂົ້າທາງພາກເໜືອຂອງຫວຽດນາມ.
ທາງການໄດ້ອອກຄຳເຕືອນກ່ຽວກັບໄພນ້ຳຖ້ວມ ແລະດິນເຈື່ອນສໍາລັບ 429 ຊຸມຊົນໃນທົ່ວ 17 ແຂວງພາກເໜືອຂອງປະເທດ.
ເຮືອນຊັ້ນດຽວຢູ່ໃນບາງສ່ວນຂອງເມືອງ ໄທ ຫງວຽນ (Thai Nguyen) ແລະ ເມືອງ ເຢັນ ບາຍ (Yen Bai) ໄດ້ຈົມຢູ່ໃຕ້ນໍ້າເກືອບໝົດຫຼັງໃນຊ່ວງບໍ່ເທົ່າໃດ ຊົ່ວໂມງທໍາອິດຂອງວັນອັງຄານມື້ນີ້, ໂດຍມີປະຊາຊົນໃນເມືອງລໍຖ້າການຊ່ວຍ ເຫລືອຢູ່ເທິງຫຼັງຄາ.
ໜ່ວຍກູ້ໄພ ໄດ້ທໍາການພະຍາຍາມໄປເຖິງບໍລິເວນທີ່ຢູ່ອາໄສຂອງປະຊາຊົນ ເພື່ອກອບກູ້ເອົາບັນດາຜູ້ເຖົ້າ ແລະເດັກນ້ອຍອອກມາ. ຢູ່ໃນສື່ສັງຄົມອອນລາຍ, ບັນດາຍາດພີ່ນ້ອງຂອງຜູ້ທີ່ຍັງຕິດຄ້າງຢູ່ໃນຂົງເຂດໄພນ້ຳຖ້ວມ ໄດ້ອອກມາປະກາດຂໍຄວາມຊ່ວຍເຫລືອ ແລະເຄື່ອງຊ່ວຍເຫລືອຕ່າງໆໃຫ້ແກ່ຜູ້ທີ່ໄດ້ຮັບຜົນ ກະທົບ.
ໃນ ຮາໂນ່ຍ, ບັນດາຊຸມຊົນຢູ່ລຽບຕາມແຄມແມ່ນ້ຳແດງທີ່ກໍາລັງຖ້ວມລົ້ນຂຶ້ນມາ ເຊິ່ງໄຫຼຢ່າງວ່ອງໄວ ແລະຮຸນແຮງ, ໂດຍໄຫຼຜ່ານນະຄອນຫຼວງນັ້ນ, ກໍຍັງມີບາງສ່ວນທີ່ຈົມຢູ່ໃຕ້ນ້ຳ, ໂດຍມີການບັງຄັບໃຫ້ປະຊາຊົນຕ້ອງອົບພະຍົບອອກໄປທາງເຮືອ.
ບໍລິເວນເຂດ ຮວ່ານ ກຽມ (Hoan Kiem) ກໍມີການບັງຄັບໃຫ້ປະຊາຊົນ 460 ຄົນ ຕ້ອງຍົກຍ້າຍອອກໃນວັນອັງຄານນີ້ເຊັ່ນກັນ.