ເກົາຫຼີເໜືອ ແລະ ເກົາຫຼີໃຕ້ ໄດ້ລະນຶກເຖິງ ວັນຄົບຮອບ 61 ປີ
ຂອງການເຊັນ ສັນຍາສະຫງົບເສິກເກົາຫຼີ ໃນວັນອາທິດມື້ນີ້
ດ້ວຍການຢູ່ໃນຄວາມສະຫງົບ ໃນທັງສອງຟາກ ຂອງເຂດ
ປອດທະຫານ ທີ່ມີການຍາມດ້ວຍອາວຸດສົງຄາມຕ່າງໆຢ່າງ
ໜາແໜ້ນ ທີ່ແບ່ງແຍກຄູ່ປໍລະປັກກັນດັ່ງກ່າວ ມາເປັນເວລາ
ສອງທົດສະຫວັດນັ້ນ.
ຢູ່ໃນເກົາຫຼີເໜືອ ວັນຄົບຮອບດັ່ງກ່າວ ຊຶ່ງເປັນມື້ທີ່ເອີ້ນວ່າ
“ໄຊຊະນະ ຂອງສົງຄາມປົດປ່ອຍປິຕຸພູມ” ບັນດາທະຫານ
ຜ່ານເສິກ ຊຶ່ງດຽວນີ້ໄດ້ມີ ອາຍຸ 70 ຫາ 80 ປີ ແລ້ວນັ້ນ ພາກັນ
ໃສ່ຊຸດທະຫານຕິດ ຫຼຽນກຽດຕິຍົດເຕັມໜ້າເອິກ ແລະໄດ້ຮັບ
ກຽດໃນພິທີຮັກຊາດທີ່ຈັດຂຶ້ນແບບບໍ່ຄຶກຄື້ນເທົ່າໃດ ໃນທົ່ວປະ
ເທດ. ບໍ່ມີການເດີນສວນສະໜາມ ຫຼື ການປາໄສ ຈາກບັນດາຜູ້ນຳເລີຍ.
ທີ່ເກົາຫຼີໃຕ້ ນາຍົກລັດຖະມົນຕີ Chung Hong-won ໄດ້ກ່າວຄຳປາໄສ ໃນພິທີສຳຫລັບ
ທະຫານຜ່ານເສິກ ແລະເວົ້າວ່າ ເຖິງແມ່ນວ່າ ເກົາຫລີເໜືອຈະຍັງເປັນໄພຂົ່ມຂູ່ ຢູ່ກໍຕາມ
ແຕ່ກໍບໍ່ຄວນປ່ອຍໃຫ້ມີສົງຄາມອີກ ຢູ່ໃນແຫລມເກົາຫລີ.
ສົງຄາມເກົາຫລີສິ້ນສຸດລົງໃນປີ 1953 ພາຍໃຕ້ສັນຍາສະຫງົບເສິກກັນ ແຕ່ບໍ່ໄດ້ມີການ
ເຊັນສັນຍາສັນຕິພາບ ສະນັ້ນໃນທາງເທັກນິກແລ້ວ ທັງສອງປະເທດແມ່ນຍັງ ຢູ່ໃນພາວະ
ສົງຄາມນຳກັນຢູ່. ວັນເສົາວານນີ້ ເກົາຫລີເໜືອ ໄດ້ຍິງລູກສອນໄຟອີກລູກນຶ່ງ ເຂົ້າໄປໃສ່
ເຂດນ່ານນ້ຳນອກຝັ່ງທະເລ ກ້ຳຕາເວັນອອກຂອງຕົນ ຊຶ່ງເປັນລູກສອນໄຟຂີປະນາວຸດ
ລູກທີ 7 ທີ່ເກົາຫລີເໜືອ ໄດ້ທົດລອງຍິງ ໃນປີນີ້.