ນັກຂ່າວສອງຄົນ ກຳລັງຖືກດຳເນີນຄະດີຢູ່ໃນເທິກີ ໃນວັນສຸກ
ມື້ນີ້ ໃນຂໍ້ຫາວ່າເຂົາເຈົ້າເປີດເຜີຍຄວາມລັບຂອງລັດຖະບານ
ແລະໃຫ້ການຊ່ອຍເຫລືອແກ່ອົງ ການກໍ່ການຮ້າຍ ຢູ່ໃນລາຍ
ງານເຂົາເຈົ້າ ກ່ຽວກັບການລັກລອບອາວຸດໄປສູ່ຊີເຣຍ ຕາມ
ທີ່ມີການກ່າວຫານັ້ນ.
ທ່ານ Can Dundar ແລະທ່ານ Erdem Gul ຈາກໜັງສືພິມ
Cumhuriyet ອາດຈະໄດ້ຮັບໂທດຕິດຄຸກຕະຫລອດຊີວິດ ຖ້າ
ຫາກເຂົາເຈົ້າຖືກພົບເຫັນວ່າ ມີຄວາມຜິດໃນຂໍ້ຫາເຫລົ່ານີ້.
ເຂົາເຈົ້າໄດ້ຖືກກ່າວຫາວ່າ ພິມເຜີຍແຜ່ຮູບພາບ ທີ່ເກີດຂຶ້ນໃນ
ເດືອນມັງກອນປີ 2014ຂອງພວກລົດບັນທຸກໄປສູ່ຊີເຣຍ ທີ່ໜັງສືພິມໄດ້ກ່າວວ່າ ເປັນການພິສູດໃຫ້ເຫັນວ່າເທິກີ ໄດ້ລັກລອບອາວຸດເຂົ້າໄປຊີເຣຍ.
ເທີກີກ່າວວ່າ ພວກນັກຂ່າວ ໄດ້ໃຫ້ການຊ່ວຍເຫລືອແກ່ຂະບວນການເຄື່ອນໄຫວອິສລາມ
ທີ່ນຳພາໂດຍ ນັກສອນສາສະໜາ Fethullah Gulen ທີ່ມີຫ້ອງການຢູ່ໃນສະຫະລັດ.
ເທິກີ ມີປະຫວັດການເຄົາລົບນັບຖືສິດທິມະນຸດທີ່ຂີ້ຮ້າຍຫຼາຍ ແລະປະຫວັດກ່ຽວ ກັບການ
ຕັ້ງຂໍ້ກ່າວຫາທີ່ພົວພັນກັບລາຍງານຂອງພວກນັກຂ່າວ. ບັນດາອົງການ ອິດສະຫຼະພາບ
ດ້ານສື່ມວນຊົນ ກົດດັນໃຫ້ Ankara ຍົກເລີກຂໍ້ຫາຕໍ່ທ່ານ Dundar ແລະ ທ່ານ Gul.
ທ່ານ Dundar ເປັນຫົວໜ້າບັນນາທິການໜັງສືພິມ Cumhuriyet ແລະທ່ານ Gul ເປັນ
ຫົວໜ້າຫ້ອງການຢູ່ນະຄອນ Ankara.