ຄວາມສຳພັນ ທີ່ມີຄວາມສຳຄັນ ໃນດ້ານຍຸດທະສາດ ລະຫວ່າງ ສະຫະລັດ ແລະເທີກີ ມີຄວາມເຄັ່ງຕຶງເພີ້ມຂຶ້ນ ໃນຂະນະທີ່ພວກເຈົ້າໜ້າທີ່ໃນນະຄອນອັງກາຣາສືບຕໍ່ການປາບປາມ ພວກທີ່ຖືກກ່າວຫາວ່າ ວາງແຜນເຮັດລັດຖະປະຫານ ແລະພວກທີ່ເປັນໃຈ.
ວໍຊິງຕັນແມ່ນຕົກຢູ່ໃນສະພາບ ທີ່ຕ້ອງໄດ້ອອກຄຳເຕືອນກ່ຽວ ກັບການໃຊ້ມາດຕະການຜະເດັດການເພີ້ມຂຶ້ນ ໂດຍການປະກາດ ພາວະສຸກເສີນຂອງເທີກີ ແລະການສະແດງຄວາມສະໜັບສະໜຸນ ຕໍ່ລັດຖະບານທີ່ຖືກເລືອກແບບປະຊາທິປະໄຕ ທີ່ໄດ້ຕໍ່ສູ້ກັບການເຮັດລັດຖະປະຫານດັ່ງກ່າວ.
ພວກນັກຂ່າວ ທີ່ໄປເຕົ້າໂຮມກັນຢູ່ນອກສານ ເພື່ອສະໜັບສະໜຸນ ໝູ່ເພື່ອນ ທີ່ຖືກຈັບ ໃນຂໍ້ຫາ ພົວພັນກັບ ລັດຖະປະຫານ.
ແຫຼ່ງທີ່ມາຂອງຄວາມບໍ່ພໍໃຈ ພວມເພີ້ມທະວີຂຶ້ນ ກໍຍ້ອນ ມີຂ່າວລືໃນເທີກີວ່າ ສະຫະລັດ ມີບົດບາດໃນການພະຍາຍາມເຮັດລັດຖະປະຫານດັ່ງກ່າວ ຊຶ່ງເປັນສິ່ງທີ່ໂຄສົກກະຊວງການຕ່າງປະເທດສະຫະລັດ ທ່ານ John Kirby ໃນວັນພະຫັດ ວານນີ້ເອີ້ນວ່າ “ເປັນເລື້ອງທີ່ໜ້າຢາກຫົວ.”
ລັດຖະບານເທີກີ ໄດ້ສັ່ງປິດສື່ມວນຊົນ 130 ແຫ່ງ ຮວມທັງສະຖານີໂທລະພາບ ວິທະຍຸ ໜັງສືພິມແລະອົງການຂ່າວຕ່າງໆ ແລະນັກຂ່າວປະມານ 90 ຄົນໄດ້ຖືກຈັບຫຼືບໍ່ກໍມີການອອກໝາຍຈັບ.
ທ່ານ Kirby ກ່າວວ່າ “ພວກເຮົາເປັນຫ່ວງທີ່ສຸດ ເທີກີແມ່ນສຳຄັນສຳລັບພວກເຮົາໃນຖາ ນະເພື່ອນແລະພັນທະມິດ ແລະປະຊາທິປະໄຕຂອງພວກເຂົາເຈົ້າ ເປັນເລື້ອງສຳຄັນສຳ ລັບພວກເຮົາ.”
ມີພວກທະຫານປະມານ 1,700 ຄົນໄດ້ຖືກປົດອອກຈາກໜ້າທີ່ຮວມທັງນາຍພົນແລະພົນເຮືອເອກ 150 ຄົນ ທີ່ສົງໄສວ່າ ມີຄວາມສຳພັນກັບພວກເຮັດລັດຖະປະຫານທີ່ໄດ້ປະສົບກັບຄວາມລົ້ມແຫຼວ.
ເທີກີແມ່ນເປັນພັນທະມິດທີ່ສຳຄັນ ຂອງສະຫະລັດໃນການຕໍ່ສູ້ ຕ້ານໃນອັນທີ່ເອີ້ນວ່າກຸ່ມລັດອິສລາມທີ່ປະຕິບັດງານຢູ່ໃນອີຣັກແລະຊີເຣຍ ຊຶ່ງປະເທດທັງສອງ ຕ່າງກໍມີຊາຍແດນຕິດກັບເທີກີ ທີ່ເປັນສະມາຊິກຂອງອົງການເນໂຕ້.
ຖານທັບອາກາດ Incirlik ທີ່ສະຫະລັດໃຊ້ຮ່ວມກັນກັບກອງທັບເທີກີນັ້ນ ແມ່ນເພື່ອທຳການໂຈມຕີກຸ່ມລັດອິສລາມແລະຍັງເປັນສູນກາງການປະຕິບັດງານໃນ ການໃຫ້ຄວາມ ຊ່ອຍເຫລືອຂອງສະຫະລັດນຳດ້ວຍ.
Your browser doesn’t support HTML5
Turkey Press 1