ໃນຂະນະທີ່ສະມາຊິກ ທີມໂອນອຳນາດ ຂອງປະທານາທິບໍດີ ທີ່ຖືກເລືອກໃໝ່ ທ່ານ Donald Trump ຍັງອະພິປາຍກັນວ່າ ໃຜຄວນຈະເຂົ້າຮັບໜ້າທີ່ເປັນລັດຖະມົນຕີຕ່າງ ປະເທດຢູ່ນັ້ນ ທ່ານ Trump ໄດ້ດຳເນີນການໄປໜ້າ ໃນວັນສຸກວານນີ້ ໂດຍແຕ່ງຕັ້ງຜູ້ເຂົ້າຮັບຕຳແໜ່ງອີກສອງທ່ານ.
ທ່ານນາງ Kathleen Troia “KT” McFarland ຈະເຂົ້າຮັບໜ້າທີ່ເປັນຜູ້ຮອງ ທີ່ປຶກສາດ້ານຄວາມໝັ້ນຄົງແຫ່ງຊາດ ແລະທ່ານ Donald F. McGahn ຈະຮັບໜ້າທີ່ຜູ້ຊ່ວຍປະທານາທິບໍດີ ແລະທີ່ປຶກສາຂອງທຳນຽບຂາວ.
ຕຳແໜ່ງທັງສອງນີ້ ບໍ່ຕ້ອງການທີ່ຈະຕ້ອງໄດ້ຮັບການຢືນຢັນຈາກສະພາສູງ.
ຢູ່ໃນຖະແຫລງການສະບັບນຶ່ງ ທ່ານ Trump ໄດ້ກ່າວເຖິງປະສົບພະການອັນ ກ້ວາງຂວາງແລະພອນສະຫວັນ ຂອງທ່ານນາງ McFarland ແລະກ່າວວ່າ ທ່ານ McGahn “ມີຄວາມສະຫລຽວສະຫລາດທາງດ້ານກົດໝາຍ ມີບຸກຄະ ລິກລັກສະນະທີ່ດີເລີດແລະເຂົ້າໃຈຢ່າງເລິກເຊິ່ງເຖິງກົດໝາຍລັດຖະທຳມະນູນ.”
ໂດຍໄດ້ປະເຊີນໜ້າກັບການຖືກຕິຕຽນກ່ຽວກັບການບໍ່ມີປະສົບພະການໃນການຄັດເລືອກຂັ້ນຕົ້ນນັ້ນ ທ່ານ Trump ພົບເຫັນໃນໂຕຂອງທ່ານນາງ McFarland ອາຍຸ 65 ປີ ຊຶ່ງເປັນຜູ້ທີ່ໄດ້ຮັບໃຊ້ພາຍໃຕ້ສາມປະທານາທິບໍດີມາກ່ອນ ເຖິງແມ່ນວ່າບໍ່ໄດ້ຮັບໃຊ້ ຫຼັງຈາກປະທານາທິບໍດີ Ronald Reagan ມາແລ້ວ.
ທ່ານ Donald McGahn ຜູ້ທີ່ປະທານາທິບໍດີຖືກເລືອກໃໝ່ ທ່ານ Donald Trump ແຕ່ງຕັ້ງໃຫ້ເປັນທີ່ປຶກສາທຳນຽບຂາວ.
ທ່ານນາງ McFarland ຍັງໄດ້ເຮັດວຽກເປັນນັກວິເຄາະດ້ານຄວາມໝັ້ນຄົງແຫ່ງຊາດ ແລະລາຍງານຂ່າວໃຫ້ແກ່ໂທລະພາບ Fox News. ທ່ານນາງໄດ້ລົງສະ ໝັກ ແຕ່ບໍ່ສຳເລັດ ໃນນາມພັກຣີພັບບລິກັນ ເອົາສະມາຊິກສະພາສູງລັດ New York ໃນປີ 2006.
ຮູບພາບສະແດງໃຫ້ເຫັນ ປະທານາທິບໍດີທີ່ຖືກເລືອກໃໝ່ ທ່ານ Donald Trump ຢືນຢູ່ກັບອະດີດ ຜູ້ປົກຄອງລັດ Massschusetts ທ່ານ Mitt Romney ແລະອະດີດເຈົ້າຄອງນະຄອນ New York ທ່ານ Rudy Giuliani.
ທ່ານ McGahn ອະດີດປະທານຄະນະກຳມາທິການເລືອກຕັ້ງລັດຖະບານກາງ ໄດ້ຮັບໜ້າທີ່ເປັນທະນາຍຄວາມ ຂອງທ່ານ Trump ລະຫວ່າງການໂຄສະນາຫາສຽງ ແລະເປັນນຶ່ງໃນສະມາຊິກ ຂອງການຈັດຕັ້ງພັກຣີພັບບລິກັນ ທີ່ເຫັນພ້ອມກັບຜູ້ສະໝັກຈາກພາຍນອກ.