ທ່ານ Donald Trump ທີ່ຄາດວ່າຈະໄດ້ຮັບການແຕ່ງຕັ້ງຈາກພັກຣີພັບບລີກັນໃຫ້ເປັນຜູ້ ສະໝັກປະທານາທິບໍດີ ຂອງພັກນັ້ນ ກ່າວວ່າ ທ່ານແມ່ນເປີດກວ້າງ ໃນການທີ່ຈະໂອ້ລົມ ກັບຜູ້ນຳຂອງເກົາຫລີເໜືອ ທ່ານກິມຈົງອຸນ ເພື່ອວ່າຈະພະຍາຍາມຫາທາງຍຸຕິໂຄງການອາວຸດນິວເຄລຍຂອງປະເທດດັ່ງກ່າວ.
ທ່ານ Trump ກ່າວລະຫວ່າງ ການໃຫ້ສຳພາດ ແກ່ອົງການຂ່າວຣອຍເຕີ້ໃນວັນອັງຄານ ວານນີ້ວ່າ ຂ້າພະເຈົ້າຈະໂອ້ລົມກັບລາວ ຂ້າພະເຈົ້າບໍ່ມີບັນຫາໃດໆທີ່ຈະໂອ້ລົມກັບລາວ.
ນອກນັ້ນແລ້ວ ທ່ານຍັງກ່າວວ່າ ທ່ານຈະໃຊ້ໃນອັນທີ່ທ່ານບັນຍາຍວ່າເປັນອິດທິພົນທາງ ດ້ານເສດຖະກິດທີ່ສະຫະລັດມີຕໍ່ຈີນເພື່ອກົດດັນລັດຖະບານຈີນໃຫ້ເອົາບົດບາດໃນການ ຊອກຫາຊ່ອງທາງແກ້ໄຂ.
ເກົາຫລີເໜືອກຳລັງຢູ່ພາຍໃຕ້ການລົງໂທດຫລາຍໆຮອບຂອງອົງການສະຫະປະຊາຊາດ ທີ່ແນໃສ່ໂຄງການນິວເຄລຍແລະການທົດລອງລູກສອນໄຟທີ່ຖືກຫ້າມຫລາຍໆຄັ້ງນັ້ນ.
ຈີນແລະສະຫະລັດ ພ້ອມທັງເກົາຫລີໃຕ້ ຣັດເຊຍ ແລະຍີປຸ່ນແມ່ນໄດ້ເຂົ້າຮ່ວມການເຈລະ ຈາກັບເກົາຫຼີເໜືອ ທີ່ແນໃສ່ເພື່ອຍຸຕິກິດຈະການນິວເຄລຍຂອງປະເທດດັ່ງກ່າວ ແຕ່ການ ດຳເນີນຄວາມພະຍາຍາມນີ້ໄດ້ແຕກຫັກລົງໃນປີ 2008.
ທ່ານກິມຈົງອຸນ ຜູ້ນຳຂອງເກົາຫຼີເໜືອ.
ທ່ານ Jake Sullivan ທີ່ປຶກສາຂອງຜູ້ທີ່ມີທ່າທາງວ່າ ຈະເປັນຄູ່ແຂ່ງຂອງທ່ານ Trump ໃນການເລືອກຕັ້ງ ໃນເດືອນພະຈິກ ກໍຄືອະດີດ ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ຕຳໜິຕິຕຽນຄຳເວົ້າຂອງທ່ານ Trump. ທ່ານໄດ້ເນັ້ນຄຳ ເວົ້າກ່ອນໜ້ານັ້ນທີ່ທ່ານ Trump ກ່າວວ່າ ທ່ານບໍ່ມີທ່າທາງວ່າຈະມີຄວາມສຳພັນທີ່ດີກັບ ນາຍົກລັດຖະມົນຕີອັງກິດ ທ່ານ David Cameron.
ທ່ານ Sullivan ກ່າວວ່າ ທ່ານ Donald Trump ໄດ້ສົບປະໝາດຕໍ່ພັນທະມິດທີ່ໃກ້ຊິດທີ່ ສຸດຂອງພວກເຮົາ ຫລັງຈາກນັ້ນ ກໍປິ່ນໜ້າໜີແລ້ວເວົ້າວ່າ ທ່ານມັກທີ່ຈະໂອ້ລົມກັບກິມຈົງອຸນ?
ທ່ານ Trump ກ່າວຕໍ່ອົງການຂ່າວຣອຍເຕີ້ວ່າ ທ່ານ Cameron ມີບັນຫາແຕ່ ທ່ານກໍແນ່ ໃຈວ່າທັງສອງຝ່າຍຈະມີຄວາມສຳພັນທີ່ດີຕໍ່ກັນ.
Your browser doesn’t support HTML5
US North Korea Trump