ທ່ານ Donald Trump ຄາດວ່າ ຈະໄດ້ຮັບໄຊຊະນະ ໃນທັງໝົດ 5 ລັດຂອງການເລືອກຕັ້ງຂັ້ນຕົ້ນ ໃນວັນອັງຄານມື້ນີ້ ຊຶ່ງຈະເປັນການໂຮມເຂົ້າໃສ່ຈຳນວນຄະແນນສຽງຜູ້ແທນ ທີ່ທ່ານຕ້ອງການ ເພື່ອໃຫ້ໄດ້ຮັບການແຕ່ງຕັ້ງ ເປັນຕົວແທນຂອງພັກ Republican.
ການປ່ອນບັດເລືອກຕັ້ງຂັ້ນຕົ້ນ ຢູ່ທີ່ລັດ Pennsylvania Connecticut Delaware Maryland ແລະລັດ Rhode Island ມີຂຶ້ນຫລັງຈາກການປະກາດຂອງພວກຄູ່ແຂ່ງທີ່ຍັງ ເຫລືອຢູ່ຂອງທ່ານ Trump ວ່າ ເຂົາເຈົ້າຈະໂຄສະນາຫາສຽງແບບຍຸດທະສາດ ໃນຄວາມພະຍາຍາມເພື່ອກີດກັນບໍ່ໃຫ້ທ່ານ ໄດ້ຮັບຄະແນນສຽງຜູ້ແທນພຽງພໍຕາມທີ່ຕ້ອງການ.
ທ່ານ Trump ເອີ້ນຄວາມພະຍາຍາມຂອງສະມາຊິກສະພາສູງຈາກລັດ Texas ທ່ານ Ted Cruz ແລະຜູ້ປົກຄອງລັດ Ohio ທ່ານ John Kasich ນີ້ວ່າ “ໜ້າສົມເພດ.”
Your browser doesn’t support HTML5
Cruz, Kasich Join Forces Against Trump
ໃນຂັ້ນຕອນຂອງການເລືອກເອົາຜູ້ສະໝັກ ເປັນຕົວແທນຂອງພັກ ຂອບເຂດຂອງຄະແນນທັງໝົດ ໃນການເລືອກຕັ້ງຂັ້ນຕົ້ນໃນວັນອັງຄານມື້ນີ້ ຈະມີຄວາມສຳຄັນ ເພາະວ່າ ການໄດ້ ຮັບຄະແນນສຽງຜູ້ແທນ ທີ່ທ່ານ Trump ຈະໄດ້ຮັບ ຫຼາຍເທົ່າໃດນັ້ນ ຍິ່ງຈະເປັນຜົນດີໃຫ້ທ່ານ ທີ່ຈະໄດ້ບັນລຸຈຳນວນ 1 ພັນ 327 ຄະແນນນັ້ນ. ຖ້າຫາກທ່ານບໍ່ໄດ້ຈຳນວນທີ່ຕັ້ງໄວ້ນັ້ນ ທ່ານ Cruz ແລະ ທ່ານ Kasich ແມ່ນມີໂອກາດທີ່ຈະຖືກເລືອກໃຫ້ເປັນຕົວແທນຂອງພັກໄດ້ ໃນກອງປະຊຸມໃຫຍ່ຂອງພັກ ໃນເດືອນກໍລະກົດ ທີ່ຈະເຖິງນີ້.
ໃນການແຂ່ງຂັນຂອງພັກ Democratic ນັ້ນ ອະດີດລັດຖະມົນຕີການຕ່າງປະເທດ ທ່ານນາງ Hillary Clinton ໄດ້ເປັນຜູ້ນຳໃນການຢັ່ງຫາງສຽງຢູ່ໃນ 4 ຂອງຈຳນວນທັງໝົດ 5 ລັດ ທີ່ມີການປ່ອນບັດໃນວັນອັງຄານມື້ນີ້ ໂດຍທີ່ສະມາຊິກສະພາສູງຈາກລັດ Vermont ທ່ານ Bernie Sanders ນຳໜ້າແຕ່ພຽງລັດ Rhode Island ເທົ່ານັ້ນ.
ຜູ້ສະມັກສັງກັດພັກ Democratic ອະດີດລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ພົບປະກັບພວກທີ່ສະໜັບສະໜຸນານ ໃນະຄອນ New York City ວັນທີ 19 ເມສາ, 2016
ໃນການສະແດງອອກທີ່ເຂັ້ມແຂງ ໃນວັນອັງຄານມື້ນີ້ ອາດເຮັດໃຫ້ທ່ານນາງ Clinton ສາ ມາດທີ່ຈະກ້າວເຂົ້າໄປໃກ້ຫຼາຍຂຶ້ນ ໃນການທີ່ຈະຖືກເລືອກໃຫ້ເປັນຕົວແທນຂອງພັກ Democratic. ທ່ານນາງມີຄະແນນຜູ້ແທນໃນມື້ນີ້ ແມ່ນ 1 ພັນ 962 ຄະແນນ ຊຶ່ງຮ່ວມທັງທີ່ເອີ້ນວ່າ ຜູ້ແທນພິເສດຫຼື super delegates ຫຼາຍຮ້ອຍສຽງ ທີ່ໄດ້ປະຕິຍານວ່າ ຈະໃຫ້ການສະໜັບສະໜູນທ່ານນາງ. ໃນການລົງຄະແນນສຽງໃນ 5 ລັດ ຂອງວັນອັງຄານມື້ນີ້ ທີ່ມີຈຳນວນຄະແນນສຽງຜູ້ແທນ 462 ຄະແນນ ແລະຈະມີອີກ 276 ຄະແນນ ໃນເດືອນໜ້າ ຊຶ່ງນັ້ນໝາຍຄວາມວ່າທ່ານນາງ Clinton ຈຳເປັນທີ່ຈະຊະນະກາຍເຄິ່ງຂອງ ຈຳນວນທັງໝົດ ເພື່ອໃຫ້ໄດ້ເຖິງ 2 ພັນ 383 ຄະແນນນັ້ນ.
ເຖິງແມ່ນວ່າຈະປະເຊີນກັບບັນຫາຫຍຸ້ງຍາກລຳບາກກໍຕາມ ທ່ານ Sanders ໄດ້ສືບຕໍ່ປະຕິຍານວ່າ ທ່ານຍັງຈະສືບຕໍ່ການໂຄສະນາຫາສຽງຕໍ່ໄປ ຈົນເຖິງກອງປະຊຸມໃຫຍ່ຂອງພັກໃນເດືອນກໍລະກົດ ທີ່ຈະມາເຖິງນີ້.
ກາລຸນາອ່ານຂ່າວກ່ຽວກັບເລື້ອງນີ້ເພີ້ມເປັນພາສາອັງກິດ