ທ້າມກາງການພະຍາຍາຄວບຄຸມການແຜ່ລະບາດຂອງໄວຣັສໂຄໂຣນາຂອງປະເທດ ແລະການກະກຽມການເລີ້ມໂຄສະນາຫາສຽງໃນການເລືອກຕັ້ງປະທານາທິບໍດີຂອງທ່ານຢູ່ນັ້ນ ປະທານາທິບໍດີສະຫະລັດ, ທ່ານດໍໂນລ ທຣຳ ໄດ້ປະກາດການປ່ຽນແປງພະນັກງານທີ່ສຳຄັນຢູ່ໃນທຳນຽບຂາວ.
ສະມາຊິກສະພາຕ່ຳ, ທ່ານມາກ ມີໂດສ໌, ຈາກລັດຄາໂຣໄລນາເໜືອ ໄດ້ເປັນຫົວໜ້າທີ່ປຶກສາຂອງທຳນຽບຂາວ ແທນທ່ານມາກ ມາວລ໌ວານີ, ທີ່ໄດ້ເປັນຫົວໜ້າທີ່ປຶກສາຂອງທຳນຽບຂາວຊົ່ວຄາວໄດ້ນານກວ່ານຶ່ງປີທີ່ຜ່ານມາ.
ປະທານາທິບໍດີທີ່ປະກາດການປ່ຽນແປງດັ່ງກ່າວໄດ້ສົ່ງຂໍ້ຄວາມຜ່ານທາງທວິດເຕີໃນວັນສຸກວານນີ້ວ່າ ທ່ານມາວລ໌ວານີ ຈະເປັນທູດພິເສດຂອງສະຫະລັດປະຈຳໄອຣ໌ແລນເໜືອ.
ທ່ານມີໂດສ໌, ທີ່ເປັນສະມາຊິກສະພາຕ່ຳມາໄດ້ສີ່ສະໄໝແລ້ວນັ້ນ ເປັນຜູ້ຈົງຮັກພັກດີທີ່ປົກປ້ອງປະທານາທິບໍດີ ແລະໄດ້ເປັນຜູ້ສະໜັບສະໜູນທີ່ແຂງແກ່ນຂອງທ່ານທຣຳ ໃນໄລຍະທີ່ມີການດຳເນີນຟ້ອງຮ້ອງປະທານາທິບໍດີນັ້ນ.
ປະທານາທິບໍດີໄດ້ສົ່ງຂໍ້ຄວາມຜ່ານທາງທວິດເຕີວ່າ “ຂ້າພະເຈົ້າໄດ້ຮູ້ຈັກ ແລະໄດ້ເຮັດວຽກກັບທ່ານມາກມາເປັນເວລານານແລ້ວ ແລະຄວາມສຳພັນກັບທ່ານແມ່ນດີຫລາຍ.”
ທ່ານມີໂດສ໌ ໄດ້ປະກາດໃນຕອນຕົ້ນປີນີ້ວ່າ ທ່ານຈະລາອອກຈາກການເຮັດວຽກໃນລັດຖະສະພາໄປໃນເມື່ອສຸດສະໄໝຂອງທ່ານລົງ. ທ່ານຈະເປັນຫົວໜ້າທີ່ປຶກສາຂອງທຳນຽບຂາວຄົນທີ່ສີ່ຂອງປະທານາທິບໍດີທຣຳ ໃນເວລາທີ່ດົນກວ່າສາມປີໜ້ອຍນຶ່ງ.
ທ່ານມາວລ໌ວານີ, ຫົວໜ້າທີ່ປຶກສາຂອງທຳນຽບຂາວ ທີ່ກຳລັງອອກຈາກຕຳແໜ່ງໄປ, ເປັນອະດີດສະມາຊິກສະພາຕ່ຳຈາກລັດຄາໂຣໄລນາໃຕ້ ອາດເປັນທີ່ຈື່ກັນໄດ້ດີທີ່ສຸດວ່າເປັນຄົນທີ່ເວົ້າຢູ່ກອງປະຊຸມນັກຂ່າວທີ່ເວົ້າວ່າ ນະໂຍບາຍຕ່າງປະເທດທີ່ມີການແລກປ່ຽນເພື່ອເປັນການຊ່ວຍເຫລືອກັນທີ່ເປັນເລື້ອງທຳມະດາ.
ແຕ່ວ່າຖ້ອຍຄຳດັ່ງກ່າວ ແມ່ນໄດ້ຂັດກັນໂດຍກົງກັບປະທານາທິບໍດີ ຜູ້ທີ່ຢືນຢັນຢູ່ຕະຫລອດວ່າ ທ່ານບໍ່ເຄີຍໄດ້ມີການພົວພັນກັບການແລກປ່ຽນການຊ່ວຍເຫລືອກັນໃດໆກັບຢູເຄຣນນັ້ນ.